ਕੈਨੇਡੀਅਨ ਪੁਲਾੜ ਯਾਤਰੀ ਨੇ ਪੀ.ਐਮ.ਕਾਰਨੀ ਨਾਲ ਵਿਸ਼ੇਸ਼ ਲਾਈਵ ਸੰਪਰਕ ਦੌਰਾਨ ਕੀਤੀ ਗੱਲਬਾਤ

ਕੈਨੇਡੀਅਨ ਪੁਲਾੜ ਯਾਤਰੀ ਜੇਰੇਮੀ ਹੈਨਸਨ ਨੇ ਬੁੱਧਵਾਰ ਸ਼ਾਮ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨਾਲ ਇੱਕ ਵਿਸ਼ੇਸ਼ ਲਾਈਵ ਸੰਪਰਕ ਦੌਰਾਨ ਗੱਲਬਾਤ ਕੀਤੀ। ਇਸ 10 ਮਿੰਟ ਦੀ ਗੱਲਬਾਤ ਵਿਚ ਪੀ.ਐਮ. ਕਾਰਨੀ ਨੇ ਹੈਨਸਨ ਅਤੇ ਉਨ੍ਹਾਂ ਦੀ ਟੀਮ ਦੇ ਹੌਸਲੇ ਦੀ ਸ਼ਲਾਘਾ ਕੀਤੀ। ਗੱਲਾਂ-ਗੱਲਾਂ ਵਿਚ ਜਿੱਥੇ ਪੁਲਾੜ ਯਾਨ ਵਿਚ ਮੌਜੂਦ ਮੈਪਲ ਸਿਰਪ ਦੀ ਚਰਚਾ ਹੋਈ, ਉੱਥੇ ਹੀ ਪੀ.ਐਮ. ਨੇ ਅੰਤਰਰਾਸ਼ਟਰੀ ਸਹਿਯੋਗ ਅਤੇ ਮਿਸ਼ਨ ਦੇ ਜੋਖਮਾਂ ਬਾਰੇ ਵੀ ਸਵਾਲ ਪੁੱਛੇ।

ਜੇਰੇਮੀ ਹੈਨਸਨ ਨੇ ਬੜੇ ਮਾਣ ਨਾਲ ਕੈਨੇਡਾ ਅਤੇ ਅਮਰੀਕਾ ਦੇ ਝੰਡਿਆਂ ਵੱਲ ਇਸ਼ਾਰਾ ਕਰਦਿਆਂ ਕਿਹਾ ਕਿ ਸਾਡੀ ਏਕਤਾ ਹੀ ਸਾਡੀ ਸਭ ਤੋਂ ਵੱਡੀ ਤਾਕਤ ਹੈ। ਇਸ ਮੌਕੇ ਕਾਰਨੀ ਨੇ ਆਰਟੇਮਿਸ II ਮਿਸ਼ਨ ਦੇ ਕਰੂ ਨੂੰ ਕੈਨੇਡਾ ਆਉਣ ਦਾ ਵੀ ਸੱਦਾ ਦਿੱਤਾ। ਇਸ ਗੱਲਬਾਤ ਵਿਚ ਇੰਡਸਟਰੀ ਮਿਨਿਸਟਰ ਮੇਲਾਨੀ ਜੋਲੀ ਵੀ ਸ਼ਾਮਲ ਸਨ। ਇਹ ਸੰਪਰਕ ਉਦੋਂ ਹੋਇਆ ਜਦੋਂ ਆਰਟੇਮਿਸ II ਮਿਸ਼ਨ ਦਾ ਓਰੀਅਨ ਕੈਪਸੂਲ ਚੰਦਰਮਾ ਦੀ ਪਰਿਕਰਮਾ ਕਰਕੇ ਵਾਪਸ ਧਰਤੀ ਵੱਲ ਵਧ ਰਿਹਾ ਹੈ।

ਸ਼ੁੱਕਰਵਾਰ ਸ਼ਾਮ ਨੂੰ ਇਹ ਸੈਨ ਡਿਏਗੋ ਨੇੜੇ ਪ੍ਰਸ਼ਾਂਤ ਮਹਾਸਾਗਰ ਵਿਚ ਆਪਣੀ ਇਤਿਹਾਸਕ ਲੈਂਡਿੰਗ ਕਰੇਗਾ। ਨਾਸਾ ਮੁਤਾਬਕ, ਇਸ ਮਿਸ਼ਨ ਦੌਰਾਨ ਇਕੱਠਾ ਕੀਤਾ ਗਿਆ ਡੇਟਾ ਭਵਿੱਖ ਵਿਚ ਚੰਦਰਮਾ 'ਤੇ ਲੰਬੇ ਸਮੇਂ ਤੱਕ ਰਹਿਣ ਦੀਆਂ ਯੋਜਨਾਵਾਂ ਲਈ ਮਦਦਗਾਰ ਸਾਬਤ ਹੋਵੇਗਾ। ਇਸ ਮਿਸ਼ਨ ਨੇ ਮਿਲਕੀ ਵੇਅ ਦੇ ਕੇਂਦਰੀ ਖੇਤਰ ਦੀਆਂ ਖੂਬਸੂਰਤ ਤਸਵੀਰਾਂ ਵੀ ਭੇਜੀਆਂ ਹਨ, ਜੋ ਬ੍ਰਹਿਮੰਡ ਦੀ ਵਿਸ਼ਾਲਤਾ ਦਾ ਸਬੂਤ ਦਿੰਦੀਆਂ ਹਨ।