ਰੋਹਿਤ ਸ਼ੈੱਟੀ ਦੀ ਆਉਣ ਵਾਲੀ ‘ਸਿੰਘਮ’ ’ਚ ਅਰਜੁਨ ਕਪੂਰ ਨਿਭਾਉਣਗੇ ਖਲਨਾਇਕ ਦਾ ਕਿਰਦਾਰ

ਦਰਸ਼ਕ ਰੋਹਿਤ ਸ਼ੈੱਟੀ ਦੀ ਕਾਪ ਯੂਨੀਵਰਸ ਫ਼ਿਲਮ ‘ਸਿੰਘਮ ਅਗੇਨ’ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ। ‘ਸਿੰਘਮ’ ਤੇ ‘ਸਿੰਘਮ ਰਿਟਰਨਜ਼’ ਨੂੰ ਮਿਲੇ ਜ਼ਬਰਦਸਤ ਪਿਆਰ ਤੋਂ ਬਾਅਦ ਹੁਣ ‘ਸਿੰਘਮ ਅਗੇਨ’ ਪਰਦੇ ’ਤੇ ਦਸਤਕ ਦੇਣ ਜਾ ਰਹੀ ਹੈ। ਅਜੇ ਦੇਵਗਨ, ਰਣਵੀਰ ਸਿੰਘ, ਕਰੀਨਾ ਕਪੂਰ ਖ਼ਾਨ, ਦੀਪਿਕਾ ਪਾਦੁਕੋਣ ਤੋਂ ਬਾਅਦ ਹੁਣ ਫ਼ਿਲਮ ਦੇ ਵਿਲੇਨ ਦਾ ਲੁੱਕ ਸਾਹਮਣੇ ਆਇਆ ਹੈ। ਇਕ ਲੀਡ ਹੀਰੋ ਵਿਲੇਨ ਬਣ ਕੇ ਫ਼ਿਲਮ ’ਚ ਸ਼ਾਨਦਾਰ ਐਂਟਰੀ ਕਰਨ ਜਾ ਰਿਹਾ ਹੈ। ਸੰਜੇ ਦੱਤ ਤੇ ਬੌਬੀ ਦਿਓਲ ਤੋਂ ਬਾਅਦ ਹੀਰੋ ਤੋਂ ਵਿਲੇਨ ’ਚ ਬਦਲੇ ਇਸ ਅਦਾਕਾਰ ਨੂੰ ਦੇਖ ਕੇ ਪ੍ਰਸ਼ੰਸਕ ਹਿੱਟ ਹੈ ਬੌਸ ਆਖ ਰਹੇ ਹਨ।

‘ਸਿੰਘਮ’ ਫਰੈਂਚਾਇਜ਼ੀ ’ਚ ਪਹਿਲੀ ਵਾਰ ਕਈ ਵੱਡੇ ਸੁਪਰਸਟਾਰ ਇਕੋ ਫਰੇਮ ’ਚ ਕਾਮੇਡੀ ਤੇ ਐਕਸ਼ਨ ਦਾ ਛੋਹ ਦਿੰਦੇ ਇਕੱਠੇ ਨਜ਼ਰ ਆਉਣ ਵਾਲੇ ਹਨ। ਫ਼ਿਲਮ ਦੇ ਨਿਰਦੇਸ਼ਕ ਰੋਹਿਤ ਸ਼ੈੱਟੀ ਨੇ ਆਪਣੀ ਫ਼ਿਲਮ ਤੋਂ ਅਰਜੁਨ ਕਪੂਰ ਦੇ 2 ਲੁੱਕ ਸ਼ੇਅਰ ਕੀਤੇ ਹਨ, ਜਿਸ ’ਚ ਉਹ ਕਾਫ਼ੀ ਵੱਖਰੇ ਨਜ਼ਰ ਆ ਰਹੇ ਹਨ। ਪਹਿਲੀ ਨਜ਼ਰ ’ਚ ਅਦਾਕਾਰ ਨੂੰ ਪਛਾਣਨਾ ਮੁਸ਼ਕਿਲ ਹੈ। ਪਹਿਲੀ ਨਜ਼ਰ ’ਚ ਲੋਕ ਉਸ ਦਾ ਲੁੱਕ ‘ਪੁਸ਼ਪਾ’ ਦੇ ਪੁਸ਼ਪਰਾਜ ਵਰਗਾ ਹੀ ਦੇਖ ਰਹੇ ਹਨ।

ਪਹਿਲੀ ਝਲਕ ’ਚ ਅਰਜੁਨ ਕਪੂਰ ਨੇ ਆਪਣੇ ਹੱਥ ’ਚ ਖ਼ੂਨ ਨਾਲ ਰੰਗਿਆ ਗੰਡਾਸਾ ਫੜਿਆ ਹੋਇਆ ਹੈ ਤੇ ਅਦਾਕਾਰ ਦੇ ਦੰਦਾਂ ਤੇ ਚਿਹਰੇ ’ਤੇ ਖ਼ੂਨ ਦੇ ਛਿੱਟੇ ਦਿਖਾਈ ਦੇ ਰਹੇ ਹਨ। ਪਹਿਲੇ ਪੋਸਟਰ ’ਚ ਉਸ ਦੇ ਪਿੱਛੇ ਕੁਝ ਲੋਕ ਵੀ ਨਜ਼ਰ ਆ ਰਹੇ ਹਨ। ਦੂਜੇ ਪੋਸਟਰ ’ਚ ‘ਗੁੰਡੇ’ ਅਦਾਕਾਰ ਰਣਵੀਰ ਸਿੰਘ ਤੇ ਅਰਜੁਨ ਕਪੂਰ ਇਕ-ਦੂਜੇ ਦੀਆਂ ਅੱਖਾਂ ’ਚ ਦੇਖ ਰਹੇ ਹਨ।

ਪੋਸਟਰ ਨੂੰ ਦੇਖ ਕੇ ਪ੍ਰਸ਼ੰਸਕ ਆਪਣੀ ਪ੍ਰਤੀਕਿਰਿਆ ਦੇ ਰਹੇ ਹਨ। ਇਕ ਯੂਜ਼ਰ ਨੇ ਲਿਖਿਆ, ‘‘ਅਰਜੁਨ ਇਕ ਵਿਲੇਨ ਦੇ ਤੌਰ ’ਤੇ ਬਹੁਤ ਚੰਗੇ ਹਨ।’’ ਇਕ ਹੋਰ ਨੇ ਲਿਖਿਆ, ‘‘ਭਰਾ, ਇਹ ਬਿਲਕੁਲ ਖ਼ਤਰਨਾਕ ਲੱਗ ਰਿਹਾ ਹੈ।’’ ਰੋਹਿਤ ਸ਼ੈੱਟੀ ਦੀ ‘ਸਿੰਘਮ ਅਗੇਨ’ 15 ਅਗਸਤ, 2024 ਨੂੰ ਆਜ਼ਾਦੀ ਦਿਵਸ ਦੇ ਮੌਕੇ ’ਤੇ ਰਿਲੀਜ਼ ਹੋਵੇਗੀ।