ਦਿਲਜੀਤ ਦੌਸਾਂਝ ਵੀ ਆਪਣੇ ਸਾਥੀਆਂ ਸਮੇਤ ਹੜ੍ਹ ਪੀੜਤਾਂ ਲਈ ਯਤਨਸ਼ੀਲ

ਕੌਮਾਂਤਰੀ ਪੱਧਰ 'ਤੇ ਸੰਗੀਤ ਦੇ ਖੇਤਰ ਵਿੱਚ ਪ੍ਰਸਿੱਧੀ ਖੱਟਣ ਵਾਲੇ ਦਿਲਜੀਤ ਦੋਸਾਂਝ ਨੇ ਆਸਟ੍ਰੇਲੀਆ ਵਿੱਚ ਚੱਲ ਰਹੇ ਆਪਣੇ ਸਟੇਜ ਪ੍ਰੋਗਰਾਮਾਂ ਦੌਰਾਨ ਆਪਣੇ ਦਿਲ 'ਚੋਂ ਪੰਜਾਬ ਦੇ ਹੜ੍ਹ ਦਾ ਦਰਦ ਨਹੀਂ ਵਿਸਾਰਿਆ। ਉਸ ਨੇ ਆਪਣੀ ਟੀਮ ਅਤੇ ਸਾਂਝ ਫਾਊਡੇਸ਼ਨ ਨਾਲ ਮਿਲ ਕੇ ਪੀੜਤਾਂ ਲਈ ਵੱਡੇ ਯਤਨ ਕੀਤੇ ਹਨ। ਦਿਲਜੀਤ ਅਤੇ ਉਸ ਦੀ ਫਾਊਂਡੇਸ਼ਨ ਨੇ ਬਹੁਤ ਸਾਰੇ ਪਿੰਡਾਂ ਨੂੰ ਗੋਦ ਲਿਆ ਹੈ ਅਤੇ ਇਸ ਸਾਰੇ ਕੰਮ ਦੀ ਦੇਖ-ਰੇਖ ਉਸ ਦੀ ਮੈਨੇਜਰ ਸੋਨਾਲੀ ਸਿੰਘ ਕਰ ਰਹੀ ਹੈ।

ਇਸ ਮਾਮਲੇ ਵਿੱਚ ਜੋਮੈਟੋ ਵੀ ਦਿਲਜੀਤ ਨਾਲ ਕੰਮ ਕਰਨ ਲਈ ਅੱਗੇ ਵਧਿਆ। ਵਿਦੇਸ਼ਾਂ ਵਿੱਚ ਵੱਸਦਾ ਪੰਜਾਬੀ ਭਾਈਚਾਰਾ ਇਹ ਦਰਦ ਵੰਡਾਉਣ ਵਿੱਚ ਪਿੱਛੇ ਨਹੀਂ ਰਿਹਾ। ਕੈਨੇਡਾ ਦੇ ਸਰੀ ਤੋਂ ਲੈ ਕੇ ਅਮਰੀਕਾ, ਇੰਗਲੈਂਡ,ਇਟਲੀ ਅਤੇ ਆਸਟ੍ਰੇਲੀਆ ਤੱਕ ਭਾਈਚਾਰੇ ਦੇ ਲੋਕ ਅੱਗੇ ਆਏ ਹਨ। ਇਕ ਵੱਡੇ ਉਦਮ ਸਦਕਾ ਸਰੀ ਵਿੱਚ ਕੁਨੈਕਟ ਮੀਡੀਆ ਨੈਟਵਰਕ ਨੇ ਪੰਜਾਬੀਆਂ ਦਾ ਦਰਦ ਵੰਡਾਉਣ ਲਈ ਇਕ ਦਿਨ ਵਿੱਚ ਹੀ ਸਾਢੇ ਸੱਤ ਲੱਖ ਡਾਲਰ ਤੋਂ ਵੱਧ ਇਕੱਠੀ ਕਰ ਲਈ।