7.16C Vancouver 7.16C VancouverApr 24, 2024 1:10 PM - Connect Newsroom
ਅਦਾਕਾਰਾ ਸਾਹਿਬਾ ਬਾਲੀ ਹਾਲ ਹੀ ਵਿੱਚ ਰਿਲੀਜ਼ ਹੋਈ ਇਮਤਿਆਜ਼ ਅਲੀ ਦੀ ਫਿਲਮ ‘ਚਮਕੀਲਾ’ ਵਿੱਚ ਇੱਕ ਪੱਤਰਕਾਰ ਦੀ ਭੂਮਿਕਾ ਨਿਭਾਅ ਕੇ ਵਾਹ-ਵਾਹੀ ਖੱਟ ਰਹੀ ਹੈ। ਇਸ ਇੰਟਰਵਿਊ ਦੌਰਾਨ ਜਿੱਥੇ ਉਨ੍ਹਾਂ ਨੇ ਫਿਲਮ ਚਮਕੀਲਾ ਬਾਰੇ ਗੱਲਬਾਤ ਕੀਤੀ,ਉੱਥੇ ਹੀ ਫਿਲਮ ਦੇ ਸੈੱਟ ਤੇ ਸੁਪਰਸਟਾਰ ਦਿਲਜੀਤ ਦੋਸਾਂਝ ਨਾਲ ਮਿਲਣ ਦੇ ਅਨੁਭਵ ਸਾਂਝੇ ਕੀਤੇ।
ਦਿਲਜੀਤ ਦੇ ਸੁਪਰਸਟਾਰਡਮ ਅਤੇ ਸਫਲਤਾ ਬਾਰੇ ਪੁੱਛੇ ਜਾਣ ’ਤੇ ਸਾਹਿਬਾ ਨੇ ਕਿਹਾ, ‘ਮੈਂ ਤੁਹਾਨੂੰ ਇਹ ਨਹੀਂ ਦੱਸ ਸਕਦੀ ਕਿ ਇਹ ਕਿੰਨਾ ਵਧੀਆ ਅਨੁਭਵ ਸੀ, ਕਿਉਂਕਿ ਉਸ ਦੇ ਸਹਿ-ਅਦਾਕਾਰ ਹੋਣ ਤੋਂ ਪਹਿਲਾਂ, ਮੈਂ ਉਨ੍ਹਾਂ ਦੀ ਬਹੁਤ ਵੱਡੀ ਫੈਨ ਰਹੀ ਹਾਂ। ਬਾਲੀ ਨੇ ਅੱਗੇ ਕਿਹਾ ਕਿ ਜਿਸ ਦਿਨ ਅਸੀਂ ਫਿਲਮ ਦੀ ਸ਼ੂਟਿੰਗ ਕਰ ਰਹੇ ਸੀ, ਮੈਂ ਉਨ੍ਹਾਂ ਨੂੰ ਮਿਲਣ ਅਤੇ ਉਨ੍ਹਾਂ ਨਾਲ ਗੱਲਬਾਤ ਕਰਨ ਲਈ ਬਹੁਤ ਉਤਸ਼ਾਹਿਤ ਸੀ।
ਉਨ੍ਹਾਂ ਨੇ ਦਿਲਜੀਤ ਨਾਲ ਕੰਮ ਕਰਨ ਬਾਰੇ ਆਪਣਾ ਤਜ਼ਰਬਾ ਸਾਂਝਾ ਕਰਦਿਆਂ ਕਿਹਾ ਕਿ ਉਹ ਲਗਭਗ ਅੱਧੇ ਘੰਟੇ ਤੱਕ ਅਦਾਕਾਰ ਨੂੰ ਪਛਾਣਨ ਵਿੱਚ ਅਸਫਲ ਰਹੀ। ਸਾਹਿਬਾ ਬਾਲੀ ਨੇ ਕਿਹਾ ਕਿ ਦਿਲਜੀਤ ਬਹੁਤ ਖੁਸ਼ਮਿਜ਼ਾਜ ਅਦਾਕਾਰ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਮੈਂ ਫਿਲਮ ਦੇ ਸੈੱਟ ’ਤੇ ਦਿਲਜੀਤ ਨਾਲ ਹੀ ਬੈਠੀ ਹੋਈ ਸੀ ਅਤੇ ਆਲੇ-ਦੁਆਲੇ ਦੇਖ ਰਹੀ ਸੀ ਅਤੇ ਦਿਲਜੀਤ ਦੀ ਜ਼ੋਰਦਾਰ ਐਂਟਰੀ ਦੀ ਉਡੀਕ ਕਰ ਰਹੀ ਸੀ।
ਉਸ ਨੇ ਕਿਹਾ ਕਿ ਮੈਨੂੰ ਅਹਿਸਾਸ ਹੀ ਨਹੀਂ ਹੋਇਆ ਕਿ ਪਿਛਲੇ ਅੱਧੇ ਘੰਟੇ ਤੋਂ ਮੇਰੇ ਕੋਲ ਬੈਠਾ ਸਹਿ ਅਦਾਕਾਰ ਦਿਲਜੀਤ ਹੀ ਸੀ। ਉਹ ਚੁੱਪ-ਚਾਪ ਬੈਠੇ ਹੋਏ ਸ਼ੂਟ ਦੀ ਉਡੀਕ ਕਰ ਰਹੇ ਸਨ। ਬਾਲੀ ਨੇ ਕਿਹਾ ਕਿ ਜਦੋਂ ਮੈਨੂੰ ਪਤਾ ਲੱਗਾ ਕਿ ਇਹ ਦਿਲਜੀਤ ਸੀ ਤਾਂ ਮੈਂ ਉਨ੍ਹਾਂ ਨਾਲ ਗੱਲਾਂ ਕਰਨੀਆਂ ਸ਼ੁਰੂ ਕਰ ਦਿੱਤੀਆਂ। ਉਸ ਨੇ ਕਿਹਾ ਕਿ ਉਹ ਪੂਰੇ ਸ਼ਾਂਤ ਅਤੇ ਧਿਆਨ ’ਚ ਬੈਠੇ ਹੋਏ ਸਨ ਅਤੇ ਮੈਨੂੰ ਯਕੀਨ ਨਹੀਂ ਹੋਇਆ ਕਿ ਇਹ ਉਹ ਹੀ ਦਿਲਜੀਤ ਹੈ, ਜਿਹੜਾ ਕਿ ਗਾਇਕ ਅਤੇ ਪਰਫਾਰਮਰ ਹੈ।
