ਦਿਲਜੀਤ ਦੋਸਾਂਝ ਦੇ ਨਾਲ ਹਾਨੀਆ ਦੀ ਪੰਜਾਬੀ ਫ਼ਿਲਮ ਸ਼ਾਇਦ ਨਾ ਹੋਵੇ ਰਿਲੀਜ਼

Jasmine Singh

ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੋਸਾਂਝ ਦੀ ਪਾਕਿਸਤਾਨੀ ਅਭਿਨੇਤਰੀ ਹਾਨੀਆ ਆਮਿਰ ਨਾਲ ਆਉਣ ਵਾਲੀ ਪੰਜਾਬੀ ਫ਼ਿਲਮ 'ਤੇ ਸੰਕਟ ਦੇ ਬੱਦਲ ਛਾ ਰਹੇ ਲੱਗਦੇ ਹਨ। ਸ਼ਾਇਦ ਹੁਣ ਇਹ ਫ਼ਿਲਮ ਸਿਨੇਮਾ ਘਰਾਂ 'ਚ ਨਹੀਂ ਉਤਰ ਸਕੇਗੀ। 'ਸਰਦਾਰ ਜੀ 3' ਟਾਇਟਲ ਵਾਲੀ ਇਹ ਫ਼ਿਲਮ ਪਹਿਲਗਾਮ ਦੇ ਹਮਲੇ ਪਿਛੋਂ ਪਾਕਿਸਤਾਨ 'ਤੇ ਲੱਗੀਆਂ ਪਾਬੰਦੀਆਂ ਕਾਰਨ ਇਕ ਅਨਿਸ਼ਚਿਤ ਭਵਿੱਖ ਦਾ ਸਾਹਮਣਾ ਕਰ ਰਹੀ ਹੈ।

ਫ਼ਿਲਮ ਫੈਡਰੇਸ਼ਨ ਆਫ ਵੈਸਟਰਨ ਇੰਡੀਆ ਸਿਨੇਮਾ ਨੇ ਭਾਰਤੀ ਪ੍ਰੋਡਕਸ਼ਨਾਂ 'ਚ ਪਾਕਿਸਤਾਨੀ ਅਦਾਕਾਰਾ ਸੰਗੀਤਕਾਰਾਂ ਅਤੇ ਹੋਰ ਮੈਂਬਰਾਂ ਦੀ ਸ਼ਮੂਲੀਅਤ 'ਤੇ ਮੁੜ ਤੋਂ ਪਾਬੰਦੀ ਲਗਾ ਦਿੱਤੀ ਹੈ। ਅਜਿਹਾ ਪਹਿਲਗਾਮ 'ਚ ਹੋਏ ਅੱਤਵਾਦੀ ਹਮਲੇ ਤੋਂ ਤੁਰੰਤ ਬਾਅਦ ਕੀਤਾ ਗਿਆ ਹੈ, ਜਿਸ 'ਚ ਕਈ ਲੋਕਾਂ ਦੀਆਂ ਜਾਨਾਂ ਚਲੀਆਂ ਗਈਆਂ ਹਨ। ਫੈਡਰੇਸ਼ਨ ਨੂੰ ਭਾਰਤ ਦੇ ਫਿਲਮ ਉਦਯੋਗ 'ਚ ਇਕ ਪ੍ਰਮੁੱਖ ਸੰਸਥਾ ਵਜੋਂ ਮੰਨਿਆ ਜਾਂਦਾ ਹੈ। ਉਸ ਵਲੋਂ ਸਰਹੱਦ ਪਾਰ ਦੇ ਸੰਬੰਧ 'ਚ ਅਪਣਾਏ ਗਏ ਸਖਤ ਰੁਖ ਕਾਰਨ ਹਾਨੀਆ ਆਮਿਰ ਅਤੇ ਦਿਲਜੀਤ ਦੋਸਾਂਝ ਦੀ ਸ਼ਮੂਲੀਅਤ ਵਾਲਾ ਇਹ ਪ੍ਰਾਜੈਕਟ ਅਣਮਿੱਥੇ ਸਮੇਂ ਲਈ ਰੁਕ ਗਿਆ ਹੈ।

ਉਮੀਦ ਸੀ ਕਿ ਇਹ ਫ਼ਿਲਮ ਜੂਨ 2025 'ਚ ਰਿਲੀਜ਼ ਹੋ ਜਾਵੇਗੀ। ਦਿਲਜੀਤ ਦੋਸਾਂਝ ਨੇ ਫ਼ਿਲਮ 'ਚ ਹਾਨੀਆ ਦੀ ਸ਼ਮੂਲੀਅਤ ਸੰਬੰਧੀ ਪੁਸ਼ਟੀ ਕੀਤੀ ਸੀ ਪਰ ਉਸ ਨੇ ਫੈਡ਼ਰੇਸ਼ਨ ਵਲੋਂ ਲਾਈਆਂ ਪਾਬੰਦੀਆਂ ਬਾਰੇ ਕੋਈ ਟਿੱਪਣੀ ਨਹੀਂ ਕੀਤੀ।