ਸਲਮਾਨ ਖਾਨ ਨੂੰ ਕੀ ਬਿਸ਼ਨੋਈ ਸਮਾਜ ਦੇਵੇਗਾ ਮਾਫੀ?

ਮੁੰਬਈ ’ਚ ਸਲਮਾਨ ਖਾਨ ਦੇ ਘਰ ਦੇ ਬਾਹਰ ਹੋਈ ਗੋਲੀਬਾਰੀ ਦੀ ਘਟਨਾ ਪਿਛਲੇ ਕੁਝ ਸਮੇਂ ਤੋਂ ਸੁਰਖੀਆਂ ’ਚ ਬਣੀ ਹੋਈ ਹੈ। ਮਾਮਲੇ ਦੇ ਕੁਝ ਮੁਲਜ਼ਮਾਂ ਨੂੰ ਜਿੱਥੇ ਪਹਿਲਾਂ ਹੀ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ, ਉੱਥੇ ਹੀ ਬਿਸ਼ਨੋਈ ਭਾਈਚਾਰੇ ਵੱਲੋਂ ਜਾਰੀ ਤਾਜ਼ਾ ਬਿਆਨ ਨੂੰ ਲੈ ਕੇ ਇੱਕ ਵਾਰ ਫਿਰ ਖ਼ਬਰਾਂ ਸੁਰਖੀਆਂ ਬਣ ਗਈਆਂ ਹਨ।

ਆਲ-ਇੰਡੀਆ ਬਿਸ਼ਨੋਈ ਸੁਸਾਇਟੀ ਦੇ ਪ੍ਰਧਾਨ ਦੇਵੇਂਦਰ ਬੁਡੀਆ ਨੇ ਇੱਕ ਅਧਿਕਾਰਤ ਬਿਆਨ ਸਾਂਝਾ ਕੀਤਾ ਜਿਸ ਵਿੱਚ ਕਿਹਾ ਗਿਆ ਹੈ ਕਿ ਜੇਕਰ ਅਭਿਨੇਤਾ ਖੁਦ ਮੁਆਫੀ ਮੰਗਣ ਦਾ ਫੈਸਲਾ ਕਰਦਾ ਹੈ ਤਾਂ ਉਹ ਸਲਮਾਨ ਖਾਨ ਨੂੰ ਮੁਆਫ ਕਰਨ ਬਾਰੇ ਵਿਚਾਰ ਕਰਨਗੇ। ਉਸ ਨੇ ਕਿਹਾ, ਆਈ.ਏ.ਐੱਨ.ਐੱਸ. ਮੁਤਾਬਕ, ‘ਜੇਕਰ ਸਲਮਾਨ ਖਾਨ ਖੁਦ ਇਸ ਮਾਮਲੇ ’ਚ ਮਾਫੀ ਮੰਗਦੇ ਹਨ, ਤਾਂ ਹੀ ਉਹ ਇਸ ਨੂੰ ਸਵੀਕਾਰ ਕਰਨਗੇ। ਕਾਲੇ ਹਿਰਨ ਦੇ ਸ਼ਿਕਾਰ ਦੀ ਗ਼ਲਤੀ ਸੋਮੀ ਅਲੀ ਖਾਨ ਨੇ ਨਹੀਂ, ਸਗੋਂ ਸਲਮਾਨ ਖਾਨ ਨੇ ਕੀਤੀ ਸੀ।

ਦੇਵੇਂਦਰ ਬੁਡੀਆ ਨੇ ਸੋਮੀ ਅਲੀ ਦਾ ਜ਼ਿਕਰ ਇਸ ਲਈ ਜੋੜਿਆ ਕਿਉਂਕਿ ਅਭਿਨੇਤਰੀ ਨੇ ਹਾਲ ਹੀ ’ਚ ਬਿਸ਼ਨੋਈ ਭਾਈਚਾਰੇ ਨੂੰ ਅਪੀਲ ਕੀਤੀ ਸੀ ਕਿ ਉਹ ਸਲਮਾਨ ਖਾਨ ਨੂੰ ਮੁਆਫ ਕਰ ਦੇਣ। ਆਪਣੇ ਬਿਆਨ ਵਿੱਚ, ਉਸਨੇ ਸਲਮਾਨ ਖਾਨ ਲਈ ਆਪਣੀ ਚਿੰਤਾ ਜ਼ਾਹਰ ਕੀਤੀ ਅਤੇ ਕਿਹਾ, “ਮੈਂ ਬਿਸ਼ਨੋਈ ਭਾਈਚਾਰੇ ਨੂੰ ਅਪੀਲ ਕਰਨਾ ਚਾਹੁੰਦੀ ਹਾਂ ਕਿ ਸਲਮਾਨ ਖਾਨ ਨੂੰ ਨੁਕਸਾਨ ਪਹੁੰਚਾਉਣ ਨਾਲ ਕਾਲਾ ਹਿਰਨ ਵਾਪਸ ਨਹੀਂ ਆਵੇਗਾ। ਜੋ ਵੀ ਮੇਰੇ ਨਾਲ ਹੋਇਆ, ਉਹ ਬਦਲਿਆ ਨਹੀਂ ਜਾ ਸਕਦਾ; ਬੀਤ ਚੁੱਕੇ ਨੂੰ ਬੀਤ ਜਾਣ ਦਿਓ। ਮੈਂ ਆਪਣੇ ਨਾਲ ਸ਼ਾਂਤੀ ਬਣਾ ਲਈ ਹੈ। ਮੇਰੀ ਜ਼ਿੰਦਗੀ ਹੁਣ ਨੋ ਮੋਰ ਟੀਅਰਸ ਨੂੰ ਪੂਰੀ ਤਰ੍ਹਾਂ ਸਮਰਪਿਤ ਹੈ।”

ਫਿਲਹਾਲ ਬਿਸ਼ਨੋਈ ਸਮਾਜ ਦੇ ਇਸ ਬਿਆਨ ’ਤੇ ਸਲਮਾਨ ਖਾਨ ਜਾਂ ਉਨ੍ਹਾਂ ਦੇ ਪਰਿਵਾਰ ਦੇ ਕਿਸੇ ਨੇ ਵੀ ਪ੍ਰਤੀਕਿਰਿਆ ਨਹੀਂ ਦਿੱਤੀ ਹੈ।