‘ਖੋਸਲਾ ਕਾ ਘੋਸਲਾ’ ਫ਼ਿਲਮ ਫ਼ਿਰ ਹੋ ਰਹੀ ਰਿਲੀਜ਼

ਅੱਜ-ਕੱਲ੍ਹ ਫ਼ਿਲਮ ਇੰਡਸਟਰੀ ’ਚ ਪੁਰਾਣੀਆਂ ਫ਼ਿਲਮਾਂ ਨੂੰ ਰੀ-ਰਿਲੀਜ਼ ਕਰਨ ਦਾ ਟਰੈਂਡ ਜ਼ੋਰਾਂ ’ਤੇ ਹੈ। ਪਹਿਲਾਂ ਵੀ ‘ਲੈਲਾ ਮਜਨੂੰ’, ਵੀਰ ਜਾਰਾ, ਰਹਿਨਾ ਹੈ ਤੇਰੇ ਦਿਲ ਮੇ, ਅਤੇ ਜੋਸ਼ ਵਰਗੀਆਂ ਕਈ ਫ਼ਿਲਮਾਂ ਥੀਏਟਰ ’ਚ ਰੀ-ਰਿਲੀਜ਼ ਕੀਤੀਆਂ ਜਾ ਚੁੱਕੀਆਂ ਹਨ। ਇਸ ਲਿਸਟ ’ਚ ਹੁਣ ਅਨੁਪਮ ਖੇਰ ਦੀ ਕਲਟ ਕਲਾਸਿਕ ਫਿਲਮ ‘ਖੋਸਲਾ ਕਾ ਘੋਸਲਾ’ ਦਾ ਨਾਂ ਵੀ ਸ਼ਾਮਲ ਹੋ ਚੁੱਕਾ ਹੈ। ਦਿਬਾਕਰ ਬੈਨਰਜੀ ਦੇ ਡਾਇਰੈਕਸ਼ਨ ’ਚ ਬਣੀ ਇਹ ਫ਼ਿਲਮ ਇਕ ਵਾਰ ਫ਼ਿਰ ਵੱਡੇ ਪਰਦੇ ’ਤੇ ਆਉਣ ਲਈ ਤਿਆਰ ਹੈ।

ਸਾਲ 2006 ’ਚ ਰਿਲੀਜ਼ ਹੋਈ ‘ਖੋਸਲਾ ਕਾ ਘੋਸਲਾ’ ਠੀਕ 18 ਸਾਲ ਬਾਅਦ ਵੱਡੇ ਪਰਦੇ ’ਤੇ ਵਾਪਸੀ ਕਰਨ ਵਾਲੀ ਹੈ ਅਤੇ ਇਸ ਖ਼ਬਰ ਤੋਂ ਬਾਅਦ ਹੀ ਫ਼ਿਲਮ ਦੇ ਫੈਨਜ਼ ਕਾਫ਼ੀ ਖ਼ੁਸ਼ ਹਨ। ਅਨੁਪਮ ਖੇਰ ਅਤੇ ਬੋਮਨ ਈਰਾਨੀ ਦੀ ਮੁੱਲ ਕਿਰਦਾਰਾਂ ਵਾਲੀ ਇਹ ਫ਼ਿਲਮ ਹੁਣ ਅਕਤੂਬਰ ’ਚ ਸਿਨੇਮਾਘਰਾਂ ’ਚ ਵਾਪਸੀ ਕਰਨ ਵਾਲੀ ਹੈ।

ਖੋਸਲਾ ਕਾ ਘੋਸਲਾ ਇਕ ਕਾਮੇਡੀ ਫ਼ਿਲਮ ਹੈ। ਇਸ ਫ਼ਿਲਮ ਨੇ ਪਿਛਲੇ ਕਈ ਸਾਲਾਂ ’ਚ ਇੰਡਸਟਰੀ ’ਚ ਬਣੀ ਬਿਹਤਰੀਨ ਕਾਮੇਡੀ ਫ਼ਿਲਮਾਂ ਦੀ ਲਿਸਟ ’ਚ ਆਪਣਾ ਨਾਂਅ ਸ਼ਾਮਲ ਕੀਤਾ ਹੈ। ਇਹ ਫਿਲਮ 22 ਸਤੰਬਰ 2006 ’ਚ ਰਿਲੀਜ਼ ਹੋਈ ਸੀ ਅਤੇ ਹੁਣ 18 ਅਕਤੂਬਰ ਨੂੰ ਵੱਡੇ ਪਰਦੇ ’ਤੇ ਆਉਣ ਲਈ ਬਿਲਕੁੱਲ ਤਿਆਰ ਹੈ। ਫ਼ਿਲਮ ਨੇ 54ਵੇਂ ਨੈਸ਼ਨਲ ਫ਼ਿਲਮ ਐਵਾਰਡ ’ਚ ਬੈਸਟ ਫੀਚਰ ਫ਼ਿਲਮ ਦਾ ਐਵਾਰਡ ਵੀ ਜਿੱਤਿਆ ਸੀ।