ਨੈਨਸੀ ਤਿਆਗੀ ਨੇ ਕਾਨਸ 2024 ’ਚ ਰਚਿਆ ਇਤਿਹਾਸ

ਕਾਨਸ ਫਿਲਮ ਫੈਸਟੀਵਲ 2024 ਅੱਜਕਲ੍ਹ ਸੁਰਖੀਆਂ ’ਚ ਹੈ। ਰੈੱਡ ਕਾਰਪੇਟ ’ਤੇ ਵੱਖ-ਵੱਖ ਸੈਲੇਬਿ੍ਰਟੀ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ’ਤੇ ਸਾਹਮਣੇ ਆ ਰਹੀਆਂ ਹਨ। ਇਨ੍ਹਾਂ ਤਸਵੀਰਾਂ ’ਚ ਇਕ ਅਜਿਹੀ ਤਸਵੀਰ ਸੀ ਜਿਸ ਬਾਰੇ ਹੁਣ ਹਰ ਕੋਈ ਚਰਚਾ ਕਰ ਰਿਹਾ ਹੈ। ਨੈਨਸੀ ਤਿਆਗੀ ਦਾ ਨਾਂ ਸੋਸ਼ਲ ਮੀਡੀਆ ’ਤੇ ਘੁੰਮ ਰਿਹਾ ਹੈ। ਹੁਣ ਹਰ ਕੋਈ ਇਸ ਗੱਲ ਦੀ ਚਰਚਾ ਕਰ ਰਿਹਾ ਹੈ ਕਿ ਉੱਤਰ ਪ੍ਰਦੇਸ਼ ਦੇ ਇਕ ਛੋਟੇ ਜਿਹੇ ਪਿੰਡ ਬਰਨਾਵਾ ਦੀ ਰਹਿਣ ਵਾਲੀ ਨੈਨਸੀ ਤਿਆਗੀ ਕਾਨਸ ਫਿਲਮ ਫੈਸਟੀਵਲ ‘ਚ ਕਿਸ ਤਰੀਕੇ ਨਾਲ ਪਹੁੰਚੀ।

ਕਾਨਸ ਫਿਲਮ ਫੈਸਟੀਵਲ ਦੇ ਰੈੱਡ ਕਾਰਪੇਟ ’ਤੇ, ਜਿੱਥੇ ਮਸ਼ਹੂਰ ਹਸਤੀਆਂ ਨੇ ਵੱਡੇ ਡਿਜ਼ਾਈਨਰਾਂ ਦੁਆਰਾ ਡਿਜ਼ਾਈਨ ਕੀਤੇ ਕੱਪੜੇ ਪਹਿਨੇ ਹਨ। ਇਸ ਦੇ ਨਾਲ ਹੀ ਨੈਨਸੀ ਤਿਆਗੀ ਦੁਆਰਾ ਪਹਿਨੀ ਗਈ ਪਹਿਰਾਵੇ ਨੂੰ ਉਨ੍ਹਾਂ ਨੇ ਖੁਦ ਡਿਜ਼ਾਈਨ ਕੀਤਾ ਅਤੇ ਬਣਾਇਆ ਸੀ।

ਇੰਨਾ ਹੀ ਨਹੀਂ ਨੈਨਸੀ ਤਿਆਗੀ ਨੇ ਰੈੱਡ ਕਾਰਪੇਟ ’ਤੇ ਹਿੰਦੀ ‘ਚ ਬੋਲ ਕੇ ਲੋਕਾਂ ਦੀ ਤਾਰੀਫ ਵੀ ਜਿੱਤੀ ਹੈ। ਕਾਨਸ ਫਿਲਮ ਫੈਸਟੀਵਲ ਦੇ ਰੈੱਡ ਕਾਰਪੇਟ ’ਤੇ ਜਦੋਂ ਨੈਨਸੀ ਤਿਆਗੀ ਨੂੰ ਅੰਗਰੇਜ਼ੀ ’ਚ ਸਵਾਲ ਪੁੱਛਿਆ ਗਿਆ ਤਾਂ ਉਸ ਨੇ ਬਿਨਾਂ ਝਿਜਕ ਹਿੰਦੀ ’ਚ ਜਵਾਬ ਦਿੱਤਾ। ਰੈੱਡ ਕਾਰਪੇਟ ’ਤੇ ਹਿੰਦੀ ’ਚ ਬੋਲਣ ਲਈ ਹਰ ਕੋਈ ਨੈਨਸੀ ਦੀ ਤਾਰੀਫ ਕਰ ਰਿਹਾ ਹੈ।

ਦੱਸ ਦੇਈਏ ਕਿ ਨੈਨਸੀ ਨੇ ਆਪਣੇ ਕਾਨਸ ਫਿਲਮ ਫੈਸਟੀਵਲ ਲੁੱਕ ਦੀਆਂ ਤਸਵੀਰਾਂ ਆਪਣੇ ਇੰਸਟਾਗ੍ਰਾਮ ’ਤੇ ਸ਼ੇਅਰ ਕੀਤੀਆਂ ਹਨ।
ਉਸ ਨੇ ਕੈਪਸ਼ਨ ਵਿੱਚ ਲਿਖਿਆ ਕਿ ਉਸ ਨੇ 30 ਦਿਨਾਂ ਵਿੱਚ ਆਪਣਾ ਗੁਲਾਬੀ ਗਾਊਨ ਬਣਾ ਲਿਆ ਹੈ। ਇਸ ਗਾਊਨ ਦਾ ਭਾਰ 20 ਕਿਲੋਗ੍ਰਾਮ ਹੈ ਅਤੇ ਇਸ ਨੂੰ ਬਣਾਉਣ ਲਈ 1000 ਮੀਟਰ ਕੱਪੜੇ ਦੀ ਵਰਤੋਂ ਕੀਤੀ ਗਈ ਹੈ। ਭੂਮੀ ਪੇਡਨੇਕਰ ਸਮੇਤ ਕਈ ਮਸ਼ਹੂਰ ਹਸਤੀਆਂ ਨੇ ਨੈਨਸੀ ਦੇ ਇਸ ਇੰਸਟਾਗ੍ਰਾਮ ਪੋਸਟ ‘ਤੇ ਟਿੱਪਣੀਆਂ ਕੀਤੀਆਂ ਹਨ।