ਜਾਹਨਵੀ ਕਪੂਰ ਦੀ 'ਗੁੱਡ ਲੱਕ ਜੈਰੀ' 'ਤੇ ਰਣਜੀਤ ਬਾਵਾ ਹੋਏ ਗਰਮ, ਟਵੀਟ ਕਰ ਦਾਗੇ ਸਵਾਲ

ਬਾਲੀਵੁੱਡ ਫਿਲਮਾਂ ਵਿਚ ਪੰਜਾਬ, ਇਸ ਦੇ ਸੱਭਿਆਚਾਰ ਅਤੇ ਪੰਜਾਬੀਆਂ ਨੂੰ ਰੂੜ੍ਹੀਵਾਦੀ ਰੂਪ ਵਿਚ ਪੇਸ਼ ਕਰਨ ਨੂੰ ਲੈ ਕੇ ਹਾਲ ਹੀ ਦੇ ਸਮੇਂ ਵਿਚ ਦਿਲਜੀਤ ਦੋਸਾਂਝ, ਐਮੀ ਵਿਰਕ ਵਰਗੇ ਕਈ ਪਾਲੀਵੁੱਡ ਅਦਾਕਾਰਾਂ ਨੇ ਨਾਰਾਜ਼ਗੀ ਜ਼ਾਹਰ ਕੀਤੀ ਹੈ। ਇਸੇ ਲੜੀ ਤਹਿਤ ਹੁਣ ਗਾਇਕ-ਅਦਾਕਾਰ ਰਣਜੀਤ ਸਿੰਘ ਵੀ ਜਾਹਨਵੀ ਕਪੂਰ ਦੀ ਨਵੀਂ ਫਿਲਮ 'ਗੁੱਡ ਲੱਕ ਜੈਰੀ' ਵਿਚ ਪੰਜਾਬ ਦੇ ਕਿਰਦਾਰ ਨੂੰ ਲੈ ਕੇ ਕਾਫੀ ਨਾਰਾਜ਼ ਹਨ। ਟਵਿੱਟਰ 'ਤੇ ਰਣਜੀਤ ਬਾਵਾ ਨੇ ਫਿਲਮ ਪ੍ਰਤੀ ਆਪਣਾ ਗੁੱਸਾ ਜ਼ਾਹਰ ਕੀਤਾ।

ਉਨ੍ਹਾਂ ਦਾ ਕਹਿਣਾ ਹੈ ਕਿ 'ਗੁੱਡ ਲੱਕ ਜੈਰੀ' ਵਿਚ ਇਕ ਵਾਰ ਫਿਰ ਪੰਜਾਬ ਨੂੰ ਡਰੱਗ ਸਟੇਟ ਵਜੋਂ ਪੇਸ਼ ਕੀਤਾ ਗਿਆ ਹੈ। ਟਵੀਟ ਵਿਚ ਉਨ੍ਹਾਂ ਨੇ ਪੰਜਾਬ ਦੇ ਮੁੱਖ ਮੰਤਰੀ ਨੂੰ ਵੀ ਟੈਗ ਕਰਦੇ ਪੁੱਛਿਆ ਕਿ ਕੀ ਪੰਜਾਬ ਨੂੰ ਸਿਰਫ਼ ਡਰੱਗ ਸਟੇਟ ਵਜੋਂ ਹੀ ਦਿਖਾਓਗੇ?

ਉਨ੍ਹਾਂ ਨੇ ਇਸ ਨਾਲ #ਸ਼ੇਮ, #ਟਾਰਗੇਟ, #ਸਟੇਟ, #ਬਾਲੀਵੁੱਡ ਹੈਸ਼ਟੈਗਸ ਯੂਜ਼ ਕੀਤੇ।

ਉਨ੍ਹਾਂ ਟਵੀਟ ਵਿਚ ਲਿਖਿਆ, - "ਗੁੱਡ ਲੱਕ ਜੈਰੀ ਮੂਵੀ ਵਿਚ ਇਕ ਵਾਰ ਪੰਜਾਬ ਨੂੰ ਚਿੱਟਾ (ਨਸ਼ਾ) ਵਾਲਾ ਦਿਖਾਇਆ ਗਿਆ। ਪੰਜਾਬ ਨੂੰ ਬਸ ਹੁਣ ਬਾਲੀਵੁੱਡ ਮੂਵੀਜ਼ ਵਿਚ ਡਰੱਗ ਸਟੇਟ ਹੀ ਦਿਖਾਓਗੇ?'"

ਹਾਲਾਂਕਿ, ਬਾਅਦ ਵਿਚ ਉਨ੍ਹਾਂ ਨੇ ਇਹ ਪੋਸਟ ਹਟਾ ਦਿੱਤੀ।

'ਗੁੱਡ ਲੱਕ ਜੈਰੀ' ਪੰਜਾਬ ਵਿਚ ਰਹਿਣ ਵਾਲੀ ਇੱਕ ਬਿਹਾਰੀ ਕੁੜੀ ਦੀ ਕਹਾਣੀ ਹੈ, ਜੋ ਕੈਂਸਰ ਨਾਲ ਪੀੜਤ ਆਪਣੀ ਮਾਂ ਨੂੰ ਬਚਾਉਣ ਲਈ ਜਲਦ ਤੋਂ ਜਲਦ ਪੈਸਾ ਕਮਾਉਣ ਦੀ ਕੋਸ਼ਿਸ਼ ਕਰਦੀ ਹੈ। ਇਸ ਨਾਲ ਉਹ ਡਰੱਗ ਸਮੱਗਲਿੰਗ ਦੇ ਧੰਦੇ ਵਿਚ ਪੈ ਜਾਂਦੀ ਹੈ।