ਕਿਉਂ ਵੇਖਣੀ ਚਾਹੀਦੀ ਹੈ ਪੰਜਾਬੀ ਫ਼ਿਲਮ 'ਗੁਰੂ ਨਾਨਕ ਜਹਾਜ਼'

ਪੰਜਾਬੀ ਸਿਨੇਮਾ ਦੇ ਖ਼ੇਤਰ 'ਚ ਇਨ੍ਹੀਂ ਦਿਨ੍ਹੀਂ 'ਗੁਰੂ ਨਾਨਕ ਜਹਾਜ਼' ਦੇ ਹਰ ਪਾਸੇ ਚਰਚੇ ਚੱਲ ਰਹੇ ਹਨ। ਅਸਲ 'ਚ ਇਹ ਫ਼ਿਲਮ ਸਾਡੇ ਭੁੱਲ ਚੁੱਕੇ ਇਤਿਹਾਸ ਨੂੰ ਉਸ ਦੇ ਸ਼ੁੱਧ ਰੂਪ 'ਚ ਅਤੇ ਜ਼ੋਰਦਾਰ ਢੰਗ ਨਾਲ ਪੇਸ਼ ਕਰਨ ਦੀ ਕੋਸ਼ਿਸ਼ ਹੈ। ਅਜਿਹਾ ਰੋਜ਼ ਨਹੀਂ ਹੁੰਦਾ ਕਿ ਕੋਈ ਫ਼ਿਲਮ ਤੁਹਾਨੂੰ ਇਤਿਹਾਸ 'ਚ ਵਾਪਸ ਲੈ ਜਾਵੇ ਪਰ ਪੰਜਾਬੀ ਫ਼ਿਲਮ 'ਗੁਰੂ ਨਾਨਕ ਜਹਾਜ਼' ਅਜਿਹਾ ਹੀ ਕਰਦੀ ਜਾਪਦੀ ਹੈ। ਇਹੋ ਕਾਰਨ ਹੈ ਕਿ ਫਿਲਮ ਦੇਖਣੀ ਜ਼ਰੂਰੀ ਹੈ। ਇਸ ਫਿਲਮ ਨੇ ਸਾਨੂੰ ਭੁੱਲ ਚੁੱਕੇ ਇਤਿਹਾਸ ਤੋਂ ਜਾਣੂੰ ਕਰਵਾਉਂਦਿਆਂ ਇਹ ਦੱਸਣ ਦਾ ਯਤਨ ਕੀਤਾ ਹੈ ਕਿ 376 ਪੰਜਾਬੀ ਪ੍ਰਵਾਸੀਆਂ ਨੂੰ ਕੈਨੇਡਾ ਤੋਂ ਲੈ ਕੇ ਭਾਰਤ ਵੱਲ ਸਫਰ ਕਰਨ ਵਾਲੇ ਸਮੁੰਦਰੀ ਜਹਾਜ਼ ਨੂੰ ਕਾਮਾਗਾਟਾਮਾਰੂ ਨਹੀਂ ਸਗੋਂ ਅਸਲ 'ਚ 'ਗੁਰੂ ਨਾਨਕ ਜਹਾਜ਼' ਕਿਹਾ ਜਾਂਦਾ ਸੀ।

ਹੁਣ ਤੱਕ ਤਾਂ ਇਹ ਹੀ ਮੰਨ ਲਿਆ ਗਿਆ ਕਿ ਉਸ ਜਹਾਜ਼ ਦਾ ਨਾਂਅ ਕਾਮਾਗਾਟਾਮਾਰੂ ਸੀ ਪਰ ਫਿਲਮ ਨੇ ਨਾਂ ਸਿਰਫ ਇਸ ਨਾਂ ਨੂੰ ਚੁਣੋਤੀ ਦਿੱਤੀ ਸਗੋਂ ਡੂੰਘੀ ਖੋਜ ਨਾਲ ਇਤਿਹਾਸਕ ਤੱਤਾਂ ਰਾਹੀਂ ਸੱਚ ਨੂੰ ਪੇਸ਼ ਕੀਤਾ। ਇਹ ਸਾਡੇ ਸਾਹਮਣੇ ਉਨ੍ਹਾਂ ਕਹਾਣੀਆਂ ਨੂੰ ਲਿਆਉਂਦੀ ਹੈ, ਜਿਹੜੀਆਂ ਸਕੂਲਾਂ ਦੀਆਂ ਪਾਠ ਪੁਸਤਕਾਂ 'ਚ ਕਦੇ ਨਹੀਂ ਪੜ੍ਹੀਆਂ ਗਈਆਂ। ਕਹਾਣੀ ਦਾ ਲੇਖਨ ਅਤੇ ਨਿਰਦੇਸ਼ਨ ਕਾਰਜ ਸ਼ਰਨ ਆਰਟ ਦਾ ਹੈ, ਜਿਸ ਦੇ ਨਾਲ ਹਰਨਵਬੀਰ ਨੇ ਵੀ ਬੇਮਿਸਾਲ ਮਿਹਨਤ ਕੀਤੀ ਹੈ। ਫਿਲਮ 'ਚ ਬੜੀ ਸ਼ਾਨਦਾਰ ਸਿਨੇਟੋਗ੍ਰਾਫੀ ਦਾ ਸਮੁੱਚਾ ਸਿਹਰਾ ਜੇਪੀ ਸਿੰਘ ਨੂੰ ਜਾਂਦਾ ਹੈ। ਜਿਹੜੀ ਤੁਹਾਨੂੰ ਕੈਨੇਡਾ ਦੇ ਮੁੱਢਲੇ ਦੌਰ ਵੱਲ ਲੈ ਜਾਂਦੀ ਹੈ।

ਲੰਬਰ ਮਿੱਲਾਂ ਅਤੇ ਗਲੀਆਂ ਤੋਂ ਵੈਨਕੂਵਰ ਪੋਰਟ ਤੱਕ ਹਰ ਫਰੇਮ ਪ੍ਰਮਾਣਕ ਢੰਗ ਨਾਲ ਉਲੀਕਿਆ ਗਿਆ ਹੈ। ਕੇਵਿੰਨ ਰਾਏ ਜਾਰਜ ਦਾ ਬੈਕਰਾਊਂਡ ਸਕੋਰ ਫਿਲਮ ਦਾ ਕਥਾਪ੍ਰਵਾਹ ਨੂੰ ਬੜੀ ਮਜ਼ਬੂਤੀ ਨਾਲ ਅੱਗੇ ਤੋਰਦਾ ਹੈ। ਤਣਾਅ ਵੀ ਪੈਦਾ ਹੁੰਦਾ ਹੈ ਭਾਵਨਾਵਾਂ ਵੀ ਪ੍ਰਗਟ ਹੁੰਦੀਆਂ ਹਨ ਅਤੇ ਮਹੱਤਵਪੂਰਨ ਦ੍ਰਿਸ਼ ਪਿੱਠ ਭੂਮੀ ਦੇ ਸੰਗੀਤ ਕਾਰਨ ਬੜਾ ਵੱਡਾ ਪ੍ਰਭਾਵ ਛੱਡਦੇ ਹਨ। ਪੰਜਾਬੀ ਗਾਇਕ ਅਤੇ ਅਭਿਨੇਤਾ ਤਰਸੇਮ ਜੱਸੜ ਨੇ ਕੈਨੇਡਾ 'ਚ ਨਸਲਵਾਦ ਦੇ ਖ਼ਿਲਾਫ ਡਟਣ ਵਾਲੇ ਕ੍ਰਾਂਤੀਕਾਰੀ ਮੇਵਾ ਸਿੰਘ ਲੋਪੋਕੇ ਦੀ ਭੂਮਿਕਾ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਪੇਸ਼ ਕੀਤਾ ਹੈ।

ਗੁਰਪ੍ਰੀਤ ਘੁੱਗੀ ਦੂਰਅੰਦੇਸ਼ੀ ਵਾਲੇ ਕਾਰੋਬਾਰੀ ਬਾਬਾ ਗੁਰਦਿੱਤ ਸਿੰਘ ਦੇ ਰੂਪ 'ਚ ਪੂਰੀ ਤਾਕਤ ਅਤੇ ਦ੍ਰਿੜ ਇਰਾਦੇ ਨਾਲ ਖੂਬ ਚਮਕਦਾ ਹੈ। ਮਾਰਕ ਬੇਨਿੰਗਟਨ ਬਸਤੀ ਵਾਦੀ ਅਥਾਰਟੀ ਦੇ ਸਰਦ ਭਰੋਸੇ ਨੂੰ ਫੜ੍ਹਨ ਦੀ ਕੋਸ਼ਿਸ਼ ਵਿੱਚ ਕਾਮਯਾਬ ਹੈ। ਹਰਸ਼ਰਨ ਸਿੰਘ,ਬਲਵਿੰਦਰ ਬੁਲਟ ਵਰਗੇ ਸਹਾਇਕ ਕਲਾਕਾਰ ਵੀ ਜਚਦੇ ਹਨ। ਸਮੁੱਚੇ ਤੌਰ 'ਤੇ ਫਿਲਮ ਕੁਝ ਨਵਾਂ ਪੇਸ਼ ਕਰਦੀ ਹੈ ਅਤੇ ਵੇਖੀ ਜਾਣੀ ਚਾਹੀਦੀ ਹੈ।