ਸੰਨੀ ਦਿਓਲ ਦੀ 'ਲਾਹੌਰ 1947' ਦਾ ਤਬਦੀਲ ਹੋਵੇਗਾ ਟਾਈਟਲ?

ਸੰਨੀ ਦਿਓਲ 2026 ਵਿੱਚ ਫਿਲਮੀ ਖੇਤਰਾਂ ਵਿੱਚ ਤਹਿਲਕਾ ਮਚਾਉਣ ਜਾ ਰਹੇ ਹਨ। 'ਬਾਰਡਰ 2' ਦੀ ਜ਼ੋਰਦਾਰ ਸ਼ੁਰੂਆਤ ਤੋਂ ਬਾਅਦ ਹੁਣ ਉਨ੍ਹਾਂ ਦੀ ਅਗਲੀ ਫਿਲਮ 'ਲਾਹੌਰ 1947' ਦੀ ਉਡੀਕ ਹੋ ਰਹੀ ਹੈ। ਇਸ ਫਿਲਮ ਬਾਰੇ ਕਈ ਤਰ੍ਹਾਂ ਦੇ ਚਰਚੇ ਛਿੜੇ ਹੋਏ ਹਨ। 'ਲਾਹੌਰ 1947' ਦਾ ਨਿਰਦੇਸ਼ਨ ਇਕ ਵਾਰ ਫਿਰ ਰਾਜ ਕੁਮਾਰ ਸੰਤੋਸ਼ੀ ਕਰ ਰਹੇ ਹਨ ਅਤੇ ਇਸ ਵਿੱਚ ਆਮਿਰ ਖਾਨ ਵੀ ਇਕ ਭੂਮਿਕਾ ਨਿਭਾਅ ਰਹੇ ਹਨ। ਫਿਲਮ ਦੇ ਕਲਾਕਾਰਾਂ ਵਿੱਚ ਪ੍ਰੀਤੀ ਜ਼ਿੰਟਾ,ਅਲੀ ਫਜ਼ਲ ਅਤੇ ਸ਼ਬਾਨਾ ਆਜ਼ਮੀ ਵੀ ਸ਼ਾਮਲ ਹਨ।

ਇਸ ਦੌਰਾਨ ਇਕ ਚਰਚਾ ਇਹ ਵੀ ਛਿੜੀ ਹੈ ਕਿ ਨਿਰਮਾਤਾ ਫਿਲਮ ਦਾ ਟਾਈਟਲ ਤਬਦੀਲ ਕਰਨ ਬਾਰੇ ਵਿਚਾਰ ਕਰ ਰਹੇ ਹਨ। ਹਾਲਾਂਕਿ 'ਲਾਹੌਰ 1947' ਦਾ ਅਰਥ ਦੇਸ਼ ਦੀ ਵੰਡ ਵੇਲੇ ਦੇ ਮਾਹੌਲ ਨੂੰ ਲੈ ਕੇ ਕੀਤਾ ਜਾ ਰਿਹਾ ਸੀ। ਜਦੋਂਕਿ ਨਿਰਮਾਤਾ ਕੋਈ ਹੋਰ ਭਾਵਨਾਤਮਕ ਡੂੰਘਾਈ ਵਾਲਾ ਅਤੇ ਵਿਚਾਰ ਭਰਪੂਰ ਬਿਹਤਰ ਕਿਸਮ ਦਾ ਟਾਈਟਲ ਦੇਣਾ ਚਾਹੁੰਦੇ ਹਨ। ਇਹ ਫਿਲਮ ਸਈਦ ਅਸਗਰ ਵਲੋਂ 1980 ਵਿੱਚ ਲਿਖੇ ਨਾਟਕ 'ਜਿਸ ਨੇ ਲਾਹੌਰ ਨਹੀਂ ਦੇਖਿਆ'ਤੋਂ ਪ੍ਰੇਰਣਾ ਲੈ ਕੇ ਬਣਾਈ ਗਈ ਹੈ। ਫਿਲਮ ਨਾਲ ਜੁੜੀਆਂ ਹੋਰ ਸ਼ਖਸੀਅਤਾਂ ਵਲੋਂ ਵਿਚਾਰ ਕੀਤੇ ਜਾਣ ਉਪਰੰਤ ਟਾਈਟਲ ਬਾਰੇ ਕੋਈ ਫੈਸਲਾ ਸੰਭਵ ਹੈ। ਇਹ ਵੀ ਚਰਚਾ ਹੈ ਕਿ ਫਿਲਮ 15 ਅਗਸਤ 2026 ਤੋਂ 1-2 ਦਿਨ ਪਹਿਲਾਂ ਰਿਲੀਜ਼ ਕੀਤੀ ਜਾ ਸਕਦੀ ਹੈ।