ਪੰਜਾਬੀ ਸਿਨੇਮਾ 'ਚ ਨਵੀਆਂ ਪੈੜਾਂ ਪਾਵੇਗੀ ਫਿਲਮ 'ਚੇਤਾ ਸਿੰਘ'

ਪ੍ਰਿੰਸ ਕੰਵਲਜੀਤ ਅਤੇ ਜਪੁਜੀ ਖਹਿਰਾ ਦੀ ਜੋੜੀ 'ਤੇ ਅਧਾਰਿਤ ਸਾਗਾ ਸਟੂਡੀਓਜ਼ ਦੀ ਨਵੀਂ ਫਿਲਮ 'ਚੇਤਾ ਸਿੰਘ' ਜਿਥੇ ਪੰਜਾਬੀ ਸਿਨੇਮਾ ਦੇ ਖੇਤਰ ਵਿੱਚ ਨਵੀਆਂ ਪੈੜ ਪਾਵੇਗੀ, ਉਥੇ ਫ਼ਿਲਮ ਦਰਸ਼ਕਾਂ ਦੇ ਚੇਤਿਆਂ ਉੱਤੇ ਵੀ ਲੰਮੇ ਸਮੇਂ ਤਕ ਛਾਈ ਰਹੇਗੀ।

ਕਮਲਜੀਤ ਅਦਾਕਾਰੀ ਦੇ ਖੇਤਰ ਵਿਚ ਆਪਣਾ ਲੋਹਾ ਪਹਿਲਾਂ ਰਿਲੀਜ਼ ਹੋਈਆਂ ਕਈ ਫਿਲਮਾਂ ਵਿੱਚ ਮਨਵਾ ਚੁੱਕਾ ਹੈ ਪਰ ਚੇਤਾ ਸਿੰਘ ਵਿੱਚਲਾ ਉਸ ਦਾ ਕਿਰਦਾਰ ਵੀ ਹਮੇਸ਼ਾ ਚੇਤੇ ਰਹੇਗਾ।

ਸਮਾਜਿਕ ਜੀਵਨ ਵਿਚ ਵਾਪਰਦੀਆਂ ਘਟਨਾਵਾਂ ਅਤੇ ਬੇਇਨਸਾਫ਼ੀ ਵਿਰੁੱਧ ਲੜਾਈ ਦੇ ਵਿਸ਼ੇ ਨੂੰ ਲੈ ਕੇ ਬਣਾਈ ਗਈ ਇਸ ਫਿਲਮ ਦਾ ਨਿਰਦੇਸ਼ਨ ਕੋਈ ਸੌਖਾ ਕਾਰਜ ਨਹੀਂ ਸੀ ਪਰ ਇਸ ਕੰਮ ਨੂੰ ਨਿਰਦੇਸ਼ਕ ਅਸ਼ੀਸ਼ ਕੁਮਾਰ ਨੇ ਬੜੀ ਮਿਹਨਤ ਅਤੇ ਲਗਨ ਨਾਲ ਨੇਪਰੇ ਚੜ੍ਹਾਇਆ ਹੈ। ਫਿਲਮ ਵਿੱਚ ਪਿਆਰ ਅਤੇ ਬਦਲੇ ਦੀ ਅੱਗ ਨੂੰ ਆਪਸ ਵਿੱਚ ਬੜੇ ਸਹਿਜ ਢੰਗ ਨਾਲ ਗੁੰਦਿਆ ਗਿਆ ਹੈ।

ਬੀਤੀ ਸ਼ਾਮ ਬਿੱਗ ਸਕਰੀਨ ਮੀਡੀਆ ਅਤੇ ਰਾਇਲ ਪ੍ਰੋਡਕਸ਼ਨ ਵੱਲੋਂ ਮੈਲਬੋਰਨ ਦੇ ਯੂਨਾਈਟਿਡ ਸਿਨੇਮਾ ਕਰੇਗੀਬਰਨ ਵਿੱਚ ਸ਼ਹਿਰ ਦੀਆਂ ਉੱਘੀਆਂ ਹਸਤੀਆਂ ਅਤੇ ਪੱਤਰਕਾਰਾਂ ਲਈ 'ਚੇਤਾ ਸਿੰਘ" ਦੇ ਵਿਸ਼ੇਸ਼ ਪ੍ਰੀਮੀਅਰ ਸ਼ੋਅ ਦਾ ਆਯੋਜਨ ਕੀਤਾ ਗਿਆ। ਇਸ ਮੌਕੇ ਤੇ ਫਿਲਮ ਨੂੰ ਆਸਟ੍ਰੇਲੀਆ ਵਿੱਚ ਰਿਲੀਜ਼ ਕਰਨ ਵਾਲੇ ਮਨਜੋਤ ਸ਼ੇਰਗਿੱਲ, ਜਸਕੀਰਤ ਪੁਰੀ, ਨੀਤਾ ਸ਼ੇਰਗਿੱਲ ਅਤੇ ਸਰਵਣ ਸੰਧੂ ਮੌਜੂਦ ਸਨ। ਇੱਕ ਵੱਖਰੀ ਕਿਸਮ ਦੀ ਕਹਾਣੀ ਵਾਲੀ ਅਤੇ ਪ੍ਰਿੰਸ ਕਮਲਜੀਤ ਅਤੇ ਜਪੁਜੀ ਖਹਿਰਾ ਦੀ ਸ਼ਾਨਦਾਰ, ਪ੍ਰਭਾਵਸ਼ਾਲੀ ਅਦਾਕਾਰੀ ਵਾਲੀ ਫਿਲਮ ਚੇਤਾ ਸਿੰਘ 1 ਸਤੰਬਰ ਨੂੰ ਸਿਨੇਮਿਆਂ ਦਾ ਸ਼ਿੰਗਾਰ ਬਣ ਰਹੀ ਹੈ।