ਕੈਲਗਰੀ ਫਿਲਮ ਫੈਸਟੀਵਲ ਵਿਚ ਪਹਿਲਵਾਨ ਗਾਮਾ ਸਿੰਘ ਦੀ ਵਿਰਾਸਤ ਚਮਕੀ

ਕੈਲਗਰੀ ਦੇ ਸ਼ਾਨਦਾਰ ਫਿਲਮ ਫੈਸਟੀਵਲ ਵਿੱਚ ਕੁਸ਼ਤੀ ਖੇਤਰ ਦੀ ਮਹਾਨ ਸ਼ਖਸੀਅਤ ਗਾਮਾ ਸਿੰਘ ਵੀ ਮੌਜੂਦ ਸੀ। ਗਾਮਾ ਸਿੰਘ ਆਪਣੇ ਪੁੱਤਰ ਸਮੇਤ ਇਕ ਦਸਤਾਵੇਜ਼ੀ ਫਿਲਮ ਸਿੰਘਜ਼ ਇਨ ਦਾ ਰਿੰਗਜ਼ ਦੀ ਸ੍ਰਕੀਨਿੰਗ ਵਿੱਚ ਉਚੇਚੇ ਤੌਰ ਤੇ ਹਾਜ਼ਰ ਹੋਇਆ ਸੀ। ਇਹ ਇਕ ਅਜਿਹੀ ਫਿਲਮ ਹੈ ਜੋ ਗਾਮਾ ਸਿੰਘ ਦੇ ਜੀਵਨ ਉਸ ਦੀ ਵਿਰਾਸਤ ਅਤੇ ਉੱਤਰੀ ਅਮਰੀਕਾ ਵਿੱਚ ਦੱਖਣੀ ਏਸ਼ੀਆਈ ਖੇਤਰ ਦੇ ਪਹਿਲਵਾਨਾਂ ਬਾਰੇ ਦਰਸਾਉਂਦੀ ਹੈ।

ਗਾਮਾ ਸਿੰਘ ਨੇ ਕੁਨੈਕਟ ਮੀਡੀਆ ਨੈਟਵਰਕ ਨਾਲ ਪੰਜਾਬੀ ਅਤੇ ਅੰਗਰੇਜ਼ੀ ਦੋਵਾਂ ਭਸ਼ਾਵਾਂ ਵਿੱਚ ਖੁੱਲ੍ਹੀਆਂ ਗੱਲਾਂ ਕੀਤੀਆਂ ਅਤੇ ਦੱਸਿਆ ਕਿ ਕਿਸ ਤਰ੍ਰਾਂ ਪਹਿਲਵਾਨੀ ਦਾ ਸਫਰ ਉਸ ਨੂੰ ਬ੍ਰਿਟਿਸ਼ ਕੋਲੰਬੀਆ ਦੇ ਇਕ ਛੋਟੇ ਜਿਹੇ ਸ਼ਹਿਰ ਮੈਰਿਟ ਤੋਂ ਸੰਸਾਰ ਭਰ ਦੇ ਕੁਸ਼ਤੀ ਅਖਾੜਿਆਂ ਤੱਕ ਲੈ ਗਿਆ। ਉਸ ਨੇ ਦੱਸਿਆ ਕਿ ਹੁਣ ਤਾਂ ਕੁਸ਼ਤੀ ਇਕ ਮਨੋਰੰਜਨ ਵਰਗੀ ਹੈ ਅਤੇ ਕਾਰੋਬਾਰੀ। ਪਰ ਜਦੋਂ ਮੈਂ ਕੁਸ਼ਤੀ ਲੜਦਾ ਸਾਂ ਉਸ ਵੇਲੇ ਇਹ ਹਕੀਕਤ ਸੀ ਇਸ ਸੁਡੋਲ ਜੁਸਿੱਆਂ ਦੀ ਤਾਕਤ ਅਤੇ ਹਿੰਮਤ ਦੀ ਅਸਲ ਟੱਕਰ ਹੁੰਦੀ ਸੀ। ਨਾ ਕੋਈ ਚਮਕੀਲਾ ਭੜਕੀਲਾ ਪਹਿਰਾਵਾ ਹੁੰਦਾ ਸੀ ਅਤੇ ਨਾ ਕੋਈ ਨਾਟਕੀ ਐਂਟਰੀ ਪਰ ਅੱਜ ਤਾਂ ਇਹ ਤਮਾਸ਼ਬੀਨੀ ਹੈ। ਉਸ ਨੇ ਕਿਹਾ ਕਿ ਹੁਣ ਪਰਮੋਟਰ ਇਸ ਨੂੰ ਇਸੇ ਰੂਪ ਵਿੱਚ ਪਸੰਦ ਕਰਦੇ ਹਨ।

ਗਾਮਾ ਅਜਿਹਾ ਪਹਿਲਾ ਪੰਜਾਬੀ ਪਹਿਲਵਾਨ ਹੈ ਜਿਸ ਨੇ ਕੌਮਾਂਤਰੀ ਪੱਧਰ ਤੇ ਪੰਜਾਬੀ ਭਾਈਚਾਰੇ ਦਾ ਨਾਂਅ ਰੌਸ਼ਨਾਇਆ ਅਤੇ ਉਸ ਦੀਆਂ ਪ੍ਰਾਪਤੀਆਂ ਨੇ ਨਾ ਸਿਰਫ ਵਿਲੱਖਣ ਇਤਿਹਾਸ ਰਚਿਆ ਸਗੋਂ ਉਸ ਤੇ ਹਰ ਪੰਜਾਬੀ ਨੇ ਮਾਣ ਮਹਿਸੂਸ ਕੀਤਾ। ਆਪਣੀ ਖੁਰਾਕ ਬਾਰੇ ਗੱਲ਼ ਕਰਦਿਆਂ ਉਹ ਦੱਸਦਾ ਹੈ ਕਿ ਮੇਰੇ ਪਿਤਾ ਜੀ ਰੋਜ਼ ਇਕ ਗੈਲਨ ਦੁੱਧ ਮੈਨੂੰ ਪਿਆਉਂਦੇ ਸਨ।

ਅੱਜ ਦੇ ਪਹਿਲਵਾਨ ਤਾਂ ਮਿਣ ਤੋਲ ਕੇ ਖੁਰਾਕ ਖਾਂਦੇ ਹਨ। ਉਹ ਵੇਖਦੇ ਹਨ ਕਿ ਖਾਣਾ ਹੈ ਤੇ ਕੀ ਨਹੀਂ। ਬ੍ਰਿਟਿਸ਼ ਕੋਲੰਬੀਆ ਦੇ ਮੈਰਿਟ ਵਿਚ ਪੜ੍ਹਿਆ ਹੋਣ ਕਰਕੇ ਗਾਮਾ ਸਿੰਘ ਐਲਬਰਟਾ ਦੇ ਲੋਕਾਂ ਦੇ ਦਿਲਾਂ ਵਿੱਚ ਵੀ ਖਾਸ ਸਥਾਨ ਰੱਖਦਾ ਹੈ। ਸਰੀ ਅਤੇ ਕੈਲਗਰੀ ਵਰਗੇ ਸ਼ਹਿਰਾਂ ਵਿੱਚ ਉਹ ਪੰਜਾਬੀ ਭਾਈਚਾਰੇ ਦਾ ਨਾਇਕ ਹੈ।