ਬੀ.ਸੀ. ਵਿਚ ਜ਼ਹਿਰੀਲੀਆਂ ਦਵਾਈਆਂ ਕਾਰਨ ਹਰ ਮਹੀਨੇ ਹੋ ਰਹੀਆਂ ਮੌਤਾਂ

ਬੀ.ਸੀ. ਵਿਚ ਜ਼ਹਿਰੀਲੀਆਂ ਦਵਾਈਆਂ ਕਾਰਨ ਹਰ ਮਹੀਨੇ 2 ਨੌਜਵਾਨਾਂ ਦੀ ਮੌਤ ਹੋ ਰਹੀ ਹੈ। ਇਹ ਜਾਣਕਾਰੀ ਬੀ.ਸੀ. ਕੋਰੋਨਰ ਸਰਵਿਸ ਦੀ ਇਕ ਰਿਪੋਰਟ ਵਿਚ ਦਿੱਤੀ ਗਈ ਹੈ ਜਿਸ ਦੇ ਅਨੁਸਾਰ ਸਾਲ 2019 ਅਤੇ 2013 ਦੌਰਾਨ 126 ਬੱਚਿਆਂ ਅਤੇ 19 ਸਾਲ ਤੋਂ ਛੋਟੇ ਨੌਜਵਾਨਾਂ ਦੀ ਜ਼ਹਿਰੀਲੀਆਂ ਦਵਾਈਆਂ ਕਾਰਨ ਮੌਤ ਹੋ ਚੁੱਕੀ ਹੈ। ਇਹ ਸਾਬਿਤ ਕਰਦਾ ਹੈ ਕਿ ਅਨਿਯਮਿਤ ਨਸ਼ੀਲੇ ਪਦਾਰਥਾਂ ਦਾ ਜ਼ਹਿਰੀਲਾਪਣ ਪੰਜ ਸਾਲਾਂ ਤੋਂ ਵੱਧ ਉਮਰ ਦੇ ਉਮਰ ਸਮੂਹ ਲਈ ਗੈਰ ਕੁਦਰਤੀ ਮੌਤ ਦਾ ਪ੍ਰਮੁੱਖ ਕਾਰਨ ਰਿਹਾ ਹੈ।

ਰਿਪੋਰਟ ਅਨੁਸਾਰ 83% ਮੌਤਾਂ ਵਿਚ ਫੈਂਟਾਨਾਇਲ ਜਾਂ ਇਸ ਨਾਲ ਸਬੰਧਤ ਦਵਾਈਆਂ ਪਾਈਆਂ ਗਈਆਂ ਸਨ ਜੋ ਇਕੱਲੇ ਜਾਂ ਹੋਰ ਪਦਾਰਥਾਂ ਨਾਲ ਮਿਲਾ ਕੇ ਵਰਤੀਆਂ ਗਈਆਂ ਸਨ। ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਮਰਨ ਵਾਲਿਆਂ ਵਿਚੋਂ ਲਗਭਗ ਦੋ ਤਿਹਾਈ ਬਾਲ ਅਤੇ ਪਰਿਵਾਰ ਵਿਕਾਸ ਮੰਤਰਾਲਾ ਦੀਆਂ ਸੇਵਾਵਾਂ ਲੈ ਰਹੇ ਸਨ ਜਾਂ ਪਹਿਲਾਂ ਲੈ ਚੁੱਕੇ ਸਨ।

ਰਿਪੋਰਟ ਮੁਤਾਬਿਕ ਮਰਨ ਵਾਲਿਆਂ ਵਿਚੋਂ ਲਗਭਗ 60 ਪ੍ਰਤੀਸ਼ਤ 17 ਜਾਂ 18 ਸਾਲ ਦੀ ਉਮਰ ਦੇ ਸਨ, ਜਦਕਿ ਮਰਨ ਵਾਲਿਆਂ ਵਿਚੋਂ ਅੱਧੇ ਤੋਂ ਵੱਧ ਔਰਤਾਂ ਸਨ। ਜ਼ਿਕਰਯੋਗ ਹੈ ਕਿ ਬੀ.ਸੀ. ਵੱਲੋਂ ਅਪ੍ਰੈਲ 2016 ਵਿਚ ਜਨਤਕ ਸਿਹਤ ਐਮਰਜੈਂਸੀ ਦਾ ਐਲਾਨ ਕੀਤੇ ਜਾਣ ਤੋਂ ਬਾਅਦ ਸੂਬੇ ਵਿਚ ਘੱਟੋ-ਘੱਟ 14,400 ਲੋਕਾਂ ਦੀ ਜ਼ਹਿਰੀਲੀ ਦਵਾਈਆਂ ਨਾਲ ਮੌਤ ਹੋ ਚੁੱਕੀ ਹੈ।