9.18C Vancouver 9.18C VancouverJul 13, 2021 8:42 AM -
ਭਾਰਤ ਦੇ ਸਾਬਕਾ ਕ੍ਰਿਕੇਟਰ ਅਤੇ 1983 ਦੇ ਸੰਸਾਰ ਕੱਪ ਦੇ ਵਿਜੇਤਾ ਯਸ਼ਪਾਲ ਸ਼ਰਮਾ ਦਾ ਅੱਜ ਮੰਗਲਵਾਰ ਨੂੰ ਦਿਲ ਦਾ ਦੌਰਾ ਪੈਣ 'ਤੇ ਦੇਹਾਂਤ ਹੋ ਗਿਆ ਹੈ।
ਪਰਿਵਾਰਕ ਮੈਂਬਰਾਂ ਦੇ ਨੇੜਲੇ ਸੂਤਰਾਂ ਮੁਤਾਬਕ,"ਯਸ਼ਪਾਲ ਸ਼ਰਮਾ ਸਵੇਰੇ ਤਕਰੀਬਨ ੭:੪੦ ਵਜੇ ਦਿਲ ਦਾ ਦੌਰਾ ਪੈਣ ਨਾਲ ਫੌਤ ਹੋ ਗਏ ਹਨ।
ਹਸਪਤਾਲ ਪਹੁੰਚਣ 'ਤੇ ਉਹਨਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ।"
ਯਸ਼ਪਾਲ ਨੇ ਪਹਿਲਾ ਮੈਚ 1978 ਵਿੱਚ ਭਾਰਤ ਬਨਾਮ ਪਾਕਿਸਤਾਨ ਖੇਡਿਆ,ਜੋ ਸਿਆਲਕੋਟ ਵਿੱਚ ਸੀ।
ਉਨ੍ਹਾਂ 26 ਗੇਂਦਾਂ 'ਤੇ 11 ਦੌੜਾਂ ਬਣਾਈਆਂ ਸਨ ਅਤੇ ਇਹ ਮੈਚ ਪਾਕਿਸਤਾਨ ਨੇ ਭਾਰਤ ਨੂੰ 8 ਵਿਕਟਾਂ ਨਾਲ ਹਰਾਇਆ ਸੀ।
66 ਸਾਲਾ ਸਾਬਕਾ ਕ੍ਰਿਕੇਟਰ ਨੇ ਆਪਣੀ ਪਹਿਲੀ ਸਭ ਤੋਂ ਲੰਮੀ ਪਾਰੀ, 1979 ਵਿਚ ਇੰਗਲੈਂਡ ਦੇ ਲੌਰਡ'ਸ ਵਿੱਚ ਖੇਡੀ ਸੀ।
ਸੱਜੇ ਹੱਥ ਦੇ ਬੱਲੇਬਾਜ਼ ਨੇ ਭਾਰਤ ਲਈ 37 ਟੈਸਟ ਅਤੇ 42 ਇੱਕ ਦਿਨਾਂ ਕੌਮਾਂਤਰੀ ਮੈਚ ਖੇਡੇ, ਜਿਨ੍ਹਾਂ ਵਿੱਚ ਉਹਨਾਂ ਕ੍ਰਮਵਾਰ 1606 ਅਤੇ 883 ਦੌੜਾਂ ਬਣਾਈਆਂ।
ਸੱਜੇ-ਹੱਥ ਦੇ ਬੱਲੇਬਾਜ਼ ਨੇ ਭਾਰਤ ਦੇ 1983 ਦੇ ਸੰਸਾਰ ਕੱਪ ਦੌਰਾਨ ਵੀ ਅਹਿਮ ਯੋਗਦਾਨ ਦਿੱਤਾ ਸੀ।
ਉਹਨਾਂ ਨੇ ਭਾਰਤ ਦੀ ਵੈਸਟ ਇੰਡੀਜ਼ 'ਤੇ ਹੋਈ ਇਤਿਹਾਸਕ ਜਿੱਤ ਦਰਜ ਕਰਨ ਵਾਲੇ ਫਾਈਨਲ ਮੈਚ ਵਿੱਚ 11 ਦੌੜਾਂ ਬਣਾਈਆਂ ਸਨ।
ਯਸ਼ਪਾਲ ਨੇ ਕੌਮਾਂਤਰੀ ਕ੍ਰਿਕੇਟ ਵਿੱਚ ਭਾਰਤ ਦੇ ਵੈਸਟ ਇੰਡੀਜ਼ ਦੇ ਦੌਰੇ ਦੌਰਾਨ 1985 ਵਿੱਚ ਆਪਣਾ ਆਖ਼ਰੀ ਕੌਮਾਂਤਰੀ ਮੈਚ ਖੇਡਿਆ ਸੀ।
