ਕ੍ਰਿਪਟੋਕਰੰਸੀ ਐਕਸਚੇਂਜ ਮਾਲਕ ਦੇ ਅਗਵਾ ਮਾਮਲੇ ’ਚ 3 ਫ਼ੌਜੀਆਂ ਸਮੇਤ 7 ਜਣੇ ਚਾਰਜ, ਲੱਗੇ 82 ਦੋਸ਼

ਟੌਰੌਂਟੋ ਪੁਲਿਸ ਨੇ ਇੱਕ ਕ੍ਰਿਪਟੋਕਰੰਸੀ ਐਕਸਚੇਂਜ ਦੇ ਮਾਲਕ ਦੇ ਅਗਵਾ ਮਾਮਲੇ ਵਿਚ ਕੈਨੇਡੀਅਨ ਆਰਮਡ ਫੋਰਸਿਜ਼ ਦੇ 3 ਮੈਂਬਰਾਂ ਸਮੇਤ ਕੁੱਲ 7 ਲੋਕਾਂ ਨੂੰ ਚਾਰਜ ਕੀਤਾ ਹੈ। ਪੁਲਿਸ ਚੀਫ਼ ਮਾਈਰੋਨ ਡੈਮਕਿਵ ਵੱਲੋਂ ਬੁੱਧਵਾਰ ਨੂੰ ਕੀਤੀ ਗਈ ਪ੍ਰੈੱਸ ਕਾਨਫਰੰਸ ਮੁਤਾਬਕ, ਮੁਲਜ਼ਮਾਂ ਖ਼ਿਲਾਫ਼ ਕਿਡਨੈਪਿੰਗ, ਫਿਰੌਤੀ, ਹਥਿਆਰਾਂ ਅਤੇ ਨਸ਼ਾ ਤਸਕਰੀ ਸਮੇਤ ਕੁੱਲ 82 ਚਾਰਜ ਲਗਾਏ ਗਏ ਹਨ।

ਡੈਮਕਿਵ ਮੁਤਾਬਕ, ਇਹ ਮਾਮਲਾ 25 ਜੁਲਾਈ 2026 ਨੂੰ ਉਦੋਂ ਸ਼ੁਰੂ ਹੋਇਆ ਸੀ, ਜਦੋਂ ਨੌਰਥ ਯਾਰਕ ਦੇ ਫਿੰਚ ਐਵੇਨਿਊ ਈਸਟ ਅਤੇ ਬੇਵਿਊ ਐਵੇਨਿਊ ਨੇੜੇ ਪੀੜਤ ਨੂੰ ਗੰਨ ਦੀ ਨੋਕ 'ਤੇ ਅਗਵਾ ਕਰ ਲਿਆ ਗਿਆ ਸੀ।

ਅਗਵਾਕਾਰਾਂ ਨੇ ਪੀੜਤ ਨੂੰ ਹੱਥਕੜੀਆਂ ਲਗਾ ਕੇ ਉਸ ਦੀ ਕ੍ਰਿਪਟੋਕਰੰਸੀ ਅਤੇ ਕਾਰੋਬਾਰੀ ਸੁਰੱਖਿਆ ਪ੍ਰਣਾਲੀਆਂ ਤੱਕ ਪਹੁੰਚ ਹਾਸਲ ਕਰਨ ਲਈ ਉਸ 'ਤੇ ਭਾਰੀ ਤਸ਼ੱਦਦ ਕੀਤਾ ਅਤੇ ਬਾਅਦ ਵਿਚ ਪੁਲਿਸ ਕੋਲ ਨਾ ਜਾਣ ਦੀ ਧਮਕੀ ਦੇ ਕੇ ਉਸ ਨੂੰ ਰਿਹਾਅ ਕਰ ਦਿੱਤਾ ਸੀ। ਇਸ ਮਾਮਲੇ ਵਿਚ ਗ੍ਰਿਫ਼ਤਾਰ ਕੀਤੇ ਗਏ ਫ਼ੌਜੀਆਂ ਦੀ ਪਛਾਣ 22 ਤੋਂ 29 ਸਾਲ ਦੇ ਨੌਜਵਾਨਾਂ ਵਜੋਂ ਹੋਈ, ਜੋ ਟੋਰੌਂਟੋ ਦੀ ਮਿਲਟਰੀ ਰਿਜ਼ਰਵ ਯੂਨਿਟ ਨਾਲ ਸਬੰਧਤ ਸਨ ਅਤੇ ਉਨ੍ਹਾਂ ਨੂੰ ਡਿਊਟੀ ਤੋਂ ਹਟਾਇਆ ਜਾ ਚੁੱਕਾ ਹੈ।