ਓਮਾਨ ਦੀ ਰਾਜਧਾਨੀ ਮਸਕਟ ਵਿਚ ਇੱਕ ਸ਼ੀਆ ਮਸਜਿਦ ਦੇ ਨੇੜੇ ਹੋਈ ਗੋਲੀਬਾਰੀ

ਓਮਾਨ ਦੀ ਰਾਜਧਾਨੀ ਮਸਕਟ ਵਿਚ ਸੋਮਵਾਰ ਰਾਤ ਇੱਕ ਸ਼ੀਆ ਮਸਜਿਦ ਦੇ ਨੇੜੇ ਗੋਲੀਬਾਰੀ ਹੋਈ, ਜਿਸ ਵਿਚ ਇੱਕ ਪੁਲਿਸ ਮੁਲਾਜ਼ਮ ਸਮੇਤ 6 ਲੋਕ ਮਾਰੇ ਗਏ, ਇਨ੍ਹਾਂ ਵਿਚ 4 ਪਾਕਿਸਤਾਨੀ ਸਨ। ਪੁਲਿਸ ਨੇ ਕਿਹਾ ਕਿ ਉਨ੍ਹਾਂ ਤਿੰਨ ਹਮਲਾਵਰਾਂ ਨੂੰ ਢੇਰ ਕੀਤਾ। 28 ਹੋਰ ਲੋਕ ਜ਼ਖਮੀ ਹਨ।

ਇਹ ਘਟਨਾ ਰਾਜਧਾਨੀ ਮਸਕਟ ਦੇ ਅਲ-ਵਾਦੀ ਅਲ-ਕਬੀਰ ਖੇਤਰ ਵਿਚ ਵਾਪਰੀ। ਮਸਜਿਦ ਨੇੜੇ ਸ਼ੀਆ ਨਾਲ ਸਬੰਧਤ ਧਾਰਮਿਕ ਪ੍ਰੋਗਰਾਮ ਹੋ ਰਿਹਾ ਸੀ। ਓਮਾਨ ਦੀ ਮੁਸਲਿਮ ਆਬਾਦੀ ਵਿਚ ਸ਼ੀਆ ਦੀ ਗਿਣਤੀ ਬਹੁਤ ਘੱਟ ਹੈ। ਹਮਲੇ ਦੀ ਜ਼ਿੰਮੇਵਾਰੀ ਅਜੇ ਤੱਕ ਕਿਸੇ ਵਲੋਂ ਨਹੀਂ ਲਈ ਗਈ ਹੈ।

ਪੀੜਤਾਂ ਅਤੇ ਬੰਦੂਕਧਾਰੀਆਂ ਦੀ ਪਛਾਣ ਜਾਂ ਹਮਲਾਵਰਾਂ ਦੇ ਉਦੇਸ਼ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ ਪਰ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਬਾਜ਼ ਸ਼ਰੀਫ ਨੇ ਕਿਹਾ ਕਿ ਇਮਾਮ ਅਲੀ ਮਸਜਿਦ ’ਤੇ "ਅੱਤਵਾਦੀ ਹਮਲੇ" ਵਿਚ ਮਾਰੇ ਗਏ ਲੋਕਾਂ ਵਿਚ ਚਾਰ ਪਾਕਿਸਤਾਨੀ ਸਨ।

ਇਸ ਘਟਨਾ ਦੀ ਵੀਡੀਓ ਵੀ ਸਾਹਮਣੇ ਆਈ ਹੈ, ਜਿਸ ਵਿਚ ਗੋਲੀਬਾਰੀ ਦੌਰਾਨ ਹਫੜਾ-ਦਫੜਾ ਮਚ ਗਈ ਦੇਖੀ ਜਾ ਸਕਦੀ ਹੈ ਅਤੇ ਦੋ ਦਰਜਨ ਤੋਂ ਜ਼ਿਆਦਾ ਗੋਲੀਆਂ ਚੱਲਣ ਦੀਆਂ ਆਵਾਜ਼ਾਂ ਆ ਰਹੀਆਂ ਹਨ। ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਹਿਬਾਜ਼ ਸ਼ਰੀਫ ਨੇ ਹਮਲੇ ਦੀ ਨਿੰਦਾ ਕੀਤੀ ਅਤੇ ਕਿਹਾ ਕਿ ਉਨ੍ਹਾਂ ਨੂੰ ਪੀੜਤਾਂ ਦੇ ਪਰਿਵਾਰਾਂ ਨਾਲ ਦਿਲੋਂ ਹਮਦਰਦੀ ਹੈ।