ਐਡਮਿੰਟਨ ਵਿਚ ਖਸਰੇ ਦੇ ਦੋ ਮਾਮਲੇ ਆਏ ਸਾਹਮਣੇ

ਐਡਮਿੰਟਨ ਵਿਚ ਪਿਛਲੇ ਹਫਤੇ ਖਸਰੇ ਦੇ ਦੋ ਮਾਮਲੇ ਸਾਹਮਣੇ ਆਏ, ਜਿਨ੍ਹਾਂ ਬਾਰੇ ਹੁਣ ਪੁਸ਼ਟੀ ਹੋਈ ਹੈ। ਐਲਬਰਟਾ ਹੈਲਥ ਸਰਵਿਸਿਜ਼ ਨੇ ਐਤਵਾਰ ਰਾਤ ਮੀਡੀਆ ਰਿਲੀਜ਼ ਵਿਚ ਇਸ ਦੀ ਜਾਣਕਾਰੀ ਸਾਂਝੀ ਕੀਤੀ। ਔਫੀਸ਼ੀਅਲਜ਼ ਮੁਤਾਬਕ 12 ਮਾਰਚ ਨੂੰ 16703 82 ਸੇਂਟ. ਨੌਰਥ ਵੈਸਟ ਦੇ ਬੇਲੇ ਰਿਵ ਮੈਡੀਸੈਂਟਰਸ ਫੈਮਿਲੀ ਹੈਲਥ ਕੇਅਰ ਕਲੀਨਿਕ ਅਤੇ 14-15 ਮਾਰਚ ਨੂੰ 8440 112 ਸੇਂਟ. ਨੌਰਥ ਵੈਸਟ ਦੇ ਸਟੌਲਰੀ ਚਿਲਡਰਨ ਹਸਪਤਾਲ ਵਿਚ ਇਹ ਲੋਕ ਮੌਜੂਦ ਸਨ।

ਜੇਕਰ ਕਿਸੇ ਨੇ ਇਸ ਦੌਰਾਨ ਇੱਥੇ ਵਿਜ਼ਿਟ ਕੀਤਾ ਹੈ ਅਤੇ ਉਸ ਨੂੰ ਆਪਣੀ ਸਿਹਤ ਠੀਕ ਨਹੀਂ ਲੱਗਦੀ ਤਾਂ ਉਹ ਡਾਕਟਰ ਕੋਲ ਜ਼ਰੂਰ ਜਾਵੇ। ਦੱਸ ਦੇਈਏ ਕਿ ਇਹ ਛੂਤ ਦੀ ਬੀਮਾਰੀ ਹੋਣ ਕਾਰਨ ਹਵਾ ਨਾਲ ਫੈਲਦੀ ਹੈ। ਇਸ ਕਾਰਨ 38.3° ਸੈਲਸੀਅਸ ਜਾਂ ਇਸ ਤੋਂ ਤੇਜ਼ ਬੁਖਾਰ ਹੋ ਸਕਦਾ ਹੈ।

ਇਸ ਕਾਰਨ ਖੰਘ,ਜ਼ੁਕਾਮ, ਅੱਖਾਂ ਲਾਲ ਹੋਣਾ ਅਤੇ ਖਾਜ ਹੋਣ ਵਰਗੇ ਲੱਛਣ ਦਿਖਾਈ ਦਿੰਦੇ ਹਨ। ਚਿਹਰੇ ਅਤੇ ਕੰਨ ਪਿੱਛੇ ਲਾਲ ਦਾਣੇ ਹੁੰਦੇ ਹਨ ਜੋ ਕਿ ਬਾਹਾਂ ਲੱਤਾਂ ਤੱਕ ਫੈਲ ਜਾਂਦੇ ਹਨ। ਇਸ ਲਈ ਲੋਕਾਂ ਨੂੰ ਜ਼ਰੂਰੀ ਟੀਕਾਕਰਣ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।