23.92C Vancouver 23.92C VancouverJan 13, 2021 4:39 PM -
ਏਅਰ ਕੈਨੇਡਾ ਮੁਤਾਬਕ 2021 ਦੀ ਪਹਿਲੀ ਤਿਮਾਹੀ ਵਿੱਚ ਉਡਾਣਾਂ ਘਟਾਉਣ ਸਦਕਾ 1,700 ਨੌਕਰੀਆਂ ਕੱਟੀਆਂ ਜਾਣਗੀਆਂ।
ਬੁੱਧਵਾਰ ਨੂੰ ਸਾਂਝੀ ਕੀਤੀ ਜਾਣਕਾਰੀ ਵਿੱਚ ਕੰਪਨੀ ਨੇ ਕਿਹਾ ਕਿ ਸੇਵਾਵਾਂ ਵਿੱਚ 25% ਕਟੌਤੀ ਦਾ ਅਸਰ ਏਅਰ ਕੈਨੇਡਾ ਐਕਸਪ੍ਰੈੱਸ ਦੇ 200 ਮੁਲਾਜ਼ਮਾਂ ਉੱਤੇ ਵੀ ਪਵੇਗਾ।
ਕੰਪਨੀ ਅਨੁਸਾਰ ਇਸ ਕਮੀ ਦੇ ਨਾਲ ਸਾਲ 2021 ਦੀ ਪਹਿਲੀ ਤਿਮਾਹੀ ਵਿੱਚ ਏਅਰ ਕੈਨੇਡਾ ਦੀ ਸਮਰੱਥਾ 2019 ਦੀ ਪਹਿਲੀ ਤਿਮਾਹੀ ਦਾ 20 ਫ਼ੀਸਦੀ ਹਿੱਸਾ ਹੋਵੇਗੀ।
ਏਅਰ ਕੈਨੇਡਾ ਦੀ ਇਗਜ਼ੈਕਿਟਿਵ ਵਾਈਸ ਪ੍ਰੈਜ਼ੀਡੈਂਟ ਅਤੇ ਚੀਫ਼ ਕਮਰਸ਼ਲ ਅਫ਼ਸਰ ਲੂਸੀ ਗੁਲੇਮਿਟ ਦਾ ਕਹਿਣਾ ਹੈ ਫੈਡਰਲ ਅਤੇ ਸੂਬਾਈ ਸਰਕਾਰਾਂ ਦੁਆਰਾ ਵਧਾਈਆਂ ਗਈਆਂ ਯਾਤਰਾ ਪਾਬੰਦੀਆਂ ਦਾ ਕੰਪਨੀ ਦੀ ਬੁਕਿੰਗ 'ਤੇ ਤੁਰੰਤ ਪ੍ਰਭਾਵ ਪਿਆ ਹੈ।
ਇਸ ਹਫਤੇ ਏਅਰ ਕੈਨੇਡਾ ਨੇ ਐਟਲਾਂਟਿਕ ਕੈਨੇਡਾ ਦੇ ਹਵਾਈ ਅੱਡਿਆਂ ਨੂੰ ਸੂਚਿਤ ਕੀਤਾ ਸੀ ਕਿ ਉਹ ਇਸ ਖੇਤਰ ਵਿੱਚ ਸੇਵਾਵਾਂ ਵਿੱਚ ਕਟੌਤੀ ਕਰਨ ਜਾ ਰਹੀ ਹੈ ਅਤੇ ਨਿਊਫਾਊਂਡਲੈਂਡ ਐਂਡ ਲੈਬਰੋਡੋਰ ਵਿੱਚ ਗੈਂਡਰ ਅਤੇ ਗੂਜ਼ ਬੇਅ ਅਤੇ ਨਿਊ ਬ੍ਰੰਸਵਿਕ ਵਿੱਚ ਫ੍ਰੇਡਰਿਕਟਨ ਵਿੱਚ ਅਗਲੇ ਨੋਟਿਸ ਤੱਕ ਉਡਾਣਾਂ ਰੱਦ ਕੀਤੀਆਂ ਜਾ ਰਹੀਆਂ ਹਨ।
ਏਅਰ ਕੈਨੇਡਾ ਪ੍ਰਭਾਵਿਤ ਗਾਹਕਾਂ ਨਾਲ ਸੰਪਰਕ ਕਰ ਰਹੀ ਹੈ ਤਾਂ ਜੋ ਉਹਨਾਂ ਨੂੰ ਰਿਫੰਡ ਜਾਂ ਹੋਰ ਵਿਕਲਪ ਪੇਸ਼ ਕੀਤੇ ਜਾ ਸਕਣ।
