ਐਲਬਰਟਾ ਐੱਮ. ਪੀ. ਜੌਰਜ ਚਾਹਲ ਨੇ ਪ੍ਰੀਮੀਅਰ ਸਮਿਥ 'ਤੇ ਇਲੈਕਟ੍ਰੀਸਿਟੀ ਬਾਰੇ ਝੂਠੇ ਬਿਆਨ ਦੇਣ ਦੇ ਲਗਾਏ ਦੋਸ਼

ਐਲਬਰਟਾ ਦੇ ਲਿਬਰਲ ਮੈਂਬਰ ਪਾਰਲੀਮੈਂਟ ਨੇ ਪ੍ਰੀਮੀਅਰ 'ਤੇ ਝੂਠੇ ਦਾਅਵੇ ਕਰਨ ਦੇ ਦੋਸ਼ ਲਗਾਏ ਹਨ।

ਕੈਲਗਰੀ ਦੇ ਐੱਮ. ਪੀ. ਜੌਰਜ ਚਾਹਲ ਦਾ ਕਹਿਣਾ ਹੈ ਕਿ ਡੈਨੀਅਲ ਸਮਿਥ ਕੈਨੇਡਾ ਦੀ ਇਲੈਕਟ੍ਰੀਸਿਟੀ ਗਰਿੱਡ ਨੂੰ ਨੈੱਟ-ਜ਼ੀਰੋ 'ਤੇ ਲਿਆਉਣ ਦੀਆਂ ਫੈਡਰਲ ਲਿਬਰਲ ਸਰਕਾਰ ਦੀਆਂ ਯੋਜਨਾਵਾਂ ਬਾਰੇ ਝੂਠੇ, ਬੇਬੁਨਿਆਦ ਅਤੇ ਹਾਸੋਹੀਣੇਬਿਆਨ ਦੇ ਰਹੀ ਹੈ।

ਉਨ੍ਹਾਂ ਕਿਹਾ ਕਿ ਸਮਿਥ ਪੂਰੀ ਤਰ੍ਹਾਂ ਸਿਆਸੀ ਕਾਰਨਾਂ ਕਰਕੇ ਲੋਕਾਂ ਦੇ ਡਰ 'ਤੇ ਖੇਡ ਰਹੀ ਹੈ। ਚਾਹਲ ਨੇ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੀ ਸਰਕਾਰ ਨੂੰ ਇਲੈਕਟ੍ਰੀਸਿਟੀ 'ਤੇ ਆਪਣੀ ਰਿਪੋਰਟ ਜਾਰੀ ਕਰਨ ਦਾ ਚੈਲੰਜ ਦਿੱਤਾ।

ਚਾਹਲ ਨੇ ਕਿਹਾ ਕਿ ਯੂ. ਸੀ. ਪੀ. ਨੇ ਜਦੋਂ ਦੀ ਐਲਬਰਟਾ ਦੀ ਸੱਤਾ ਸੰਭਾਲੀ ਹੈ, ਇਲੈਕਟ੍ਰੀਸਿਟੀ ਰੇਟਸ ਪੰਜ ਗੁਣਾ ਵੱਧ ਚੁੱਕੇ ਹਨ।

ਗੌਰਤਲਬ ਹੈ ਕਿ ਸਮਿਥ ਨੇ ਹਾਲ ਹੀ ਵਿੱਚ ਚਿਤਾਵਨੀ ਦਿੱਤੀ ਸੀ ਕਿ ਪ੍ਰਸਤਾਵਿਤ ਫੈਡਰਲ ਪਾਵਰ ਰੈਗੂਲੇਸ਼ਨਸ ਕਾਰਨ ਬਲੈਕਆਉਟ ਹੋਵੇਗਾ ਅਤੇ ਕੰਪਨੀ ਦੇ ਪ੍ਰਮੁੱਖਾਂ ਨੂੰ ਨਿਯਮ ਨਾ ਮੰਨਣ ਦੀ ਸੂਰਤ ਵਿਚ ਜੇਲ੍ਹ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।