13.47C Vancouver 13.47C VancouverJun 19, 2026 1:46 PM - Connect Newsroom - Ramandeep Kaur with files from The Canadian Press
ਐਲਬਰਟਾ ਸਰਕਾਰ ਵੱਲੋਂ ਸੂਬੇ ਦੇ ਨਾਗਰਿਕਾਂ ਨੂੰ ਦਿੱਤੀ ਜਾਣ ਵਾਲੀ 100 ਡਾਲਰ ਦੀ ਵਿੱਤੀ ਸਹਾਇਤਾ ਅਪਲਾਈ ਕਰਨ ਦੇ ਦੋ ਹਫ਼ਤਿਆਂ ਦੇ ਅੰਦਰ-ਅੰਦਰ ਉਨ੍ਹਾਂ ਦੇ ਬੈਂਕ ਖਾਤਿਆਂ ਵਿੱਚ ਪਹੁੰਚ ਜਾਵੇਗੀ। ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਸਪੱਸ਼ਟ ਕੀਤਾ ਹੈ ਕਿ ਉਨ੍ਹਾਂ ਦੀ ਸਰਕਾਰ ਪੈਟਰੋਲ ਪੰਪਾਂ 'ਤੇ ਗੈਸੋਲੀਨ ਟੈਕਸ ਘਟਾਉਣ ਦੀ ਬਜਾਏ ਇਹ ਸਹਾਇਤਾ ਰਾਸ਼ੀ ਸਿੱਧੀ ਲੋਕਾਂ ਨੂੰ ਦੇ ਰਹੀ ਹੈ।
ਸਮਿਥ ਦਾ ਕਹਿਣਾ ਹੈ ਕਿ ਗੈਸ ਟੈਕਸਾਂ ਵਿੱਚ ਕੀਤੀਆਂ ਕਟੌਤੀਆਂ ਦਾ ਫਾਇਦਾ ਹਮੇਸ਼ਾ ਆਮ ਖਪਤਕਾਰਾਂ ਤੱਕ ਨਹੀਂ ਪਹੁੰਚਦਾ। ਇਸ ਲਈ,ਮਹਿੰਗਾਈ ਦੀ ਮਾਰ ਝੱਲ ਰਹੇ ਐਲਬਰਟਨਜ਼ ਦੀ ਮਦਦ ਕਰਨ ਦਾ ਇਹ ਸਭ ਤੋਂ ਸਰਲ ਤਰੀਕਾ ਹੈ। ਅਮਰੀਕਾ-ਈਰਾਨ ਫੌਜੀ ਟਕਰਾਅ ਕਾਰਨ ਕੌਮਾਂਤਰੀ ਪੱਧਰ 'ਤੇ ਤੇਲ ਦੀਆਂ ਕੀਮਤਾਂ ਵਿੱਚ ਭਾਰੀ ਉਛਾਲ ਆਇਆ ਸੀ।
ਇਸ ਕਾਰਨ ਐਲਬਰਟਾ ਦੀ ਐਨਰਜੀ ਰਾਇਲਟੀਜ਼ ਵਿੱਚ ਵਾਧਾ ਹੋਇਆ,ਜਿਸ ਨੇ ਸੂਬੇ ਦੇ ਇਸ ਤਿਮਾਹੀ ਰਾਹਤ ਪ੍ਰੋਗਰਾਮ ਨੂੰ ਸਰਗਰਮ ਕਰ ਦਿੱਤਾ। ਲਗਭਗ 3.4 ਮਿਲੀਅਨ ਐਲਬਰਟਨ ਇਸ ਸਹਾਇਤਾ ਦੇ ਯੋਗ ਹਨ, ਜਿਨ੍ਹਾਂ ਪਰਿਵਾਰਾਂ ਦੀ ਵੱਧ ਤੋਂ ਵੱਧ ਸਾਲਾਨਾ ਆਮਦਨ $225,000 ਜਾਂ ਇਸ ਤੋਂ ਘੱਟ ਹੈ,ਉਹ ਇਸ ਦਾ ਲਾਭ ਲੈ ਸਕਦੇ ਹਨ।ਯੋਗ ਨਾਗਰਿਕ 1 ਜੁਲਾਈ ਤੋਂ ਔਨਲਾਈਨ ਅਪਲਾਈ ਕਰ ਸਕਣਗੇ।
