ਕੈਨੇਡਾ ਸਮੇਤ ਦੁਨੀਆ ਭਰ ਦੇ ਮੁਲਕਾਂ 'ਤੇ ਅੱਜ ਟਰੰਪ ਵਲੋਂ ਪਰਸਪਰ ਟੈਰਿਫ ਦੀ ਕੀਤੀ ਜਾ ਸਕਦੀ ਹੈ ਘੋਸ਼ਣਾ

ਕੈਨੇਡਾ ਸਮੇਤ ਦੁਨੀਆ ਭਰ ਦੇ ਮੁਲਕਾਂ 'ਤੇ ਅੱਜ ਟਰੰਪ ਵਲੋਂ ਪਰਸਪਰ ਟੈਰਿਫ ਦੀ ਘੋਸ਼ਣਾ ਕੀਤੀ ਜਾ ਸਕਦੀ ਹੈ। ਇਸ ਵਿਚਕਾਰ ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਕੈਨੇਡਾ ਜਵਾਬੀ ਟੈਰਿਫ ਵਿਚ ਉਨ੍ਹਾਂ ਅਮਰੀਕੀ ਚੀਜ਼ਾਂ ਨੂੰ ਟਾਰਗੇਟ ਨਹੀਂ ਕਰੇਗਾ, ਜਿਸ ਨਾਲ ਕੈਨੇਡੀਅਨਾਂ ਲਈ ਮਹਿੰਗਾਈ ਵੱਧ ਸਕਦੀ ਹੈ ਜਾਂ ਜਿਸ ਕਾਰਨ ਨੌਕਰੀਆਂ ਲਈ ਖ਼ਤਰਾ ਪੈਦਾ ਹੋ ਸਕਦਾ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਫਿਲਹਾਲ ਜਨਤਕ ਤੌਰ 'ਤੇ ਇਹ ਖੁਲਾਸਾ ਨਹੀਂ ਕੀਤਾ ਕਿ ਉਹ ਟਰੰਪ ਦੇ ਨਵੇਂ ਟੈਰਿਫ ਦਾ ਕਿਵੇਂ ਜਵਾਬ ਦੇਣਗੇ ਪਰ ਮੰਗਲਵਾਰ ਨੂੰ ਉਨ੍ਹਾਂ ਵਿਨੀਪੈੱਗ ਵਿਚ ਆਪਣੀ ਚੋਣ ਮੁਹਿੰਮ ਰੋਕ ਦਿੱਤੀ ਸੀ ਅਤੇ ਕਿਹਾ ਸੀ ਕਿ ਉਹ ਰਾਸ਼ਟਰਪਤੀ ਟਰੰਪ ਦੇ ਬੁੱਧਵਾਰ ਦੇ ਐਲਾਨ ਤੋਂ ਪਹਿਲਾਂ ਓਟਾਵਾ ਵਾਪਸ ਜਾ ਰਹੇ ਹਨ। ਕਾਰਨੀ ਦੇ ਅਮਰੀਕਨ ਵਪਾਰ ਸਲਾਹਕਾਰ ਪੈਨਲ ਦੇ ਮੈਂਬਰ ਡੇਵਿਡ ਮੈਕਨੌਟਨ ਅਤੇ ਹਸਨ ਯੂਸਫ਼ ਮੁਤਾਬਕ, ਕੈਨੇਡਾ ਜ਼ਿਆਦਾਤਰ ਅਮਰੀਕੀ ਭੋਜਨ 'ਤੇ ਟੈਰਿਫ ਨਹੀਂ ਲਗਾਏਗਾ। ਹਾਲਾਂਕਿ, ਪਿਛਲੀ ਜਵਾਬੀ ਕਾਰਵਾਈ ਵਿਚ ਕੈਨੇਡਾ ਨੇ ਕੁਝ ਅਮਰੀਕੀ ਫਲਾਂ, ਅਨਾਜ ਅਤੇ ਮੀਟ 'ਤੇ ਟੈਰਿਫ ਲਗਾਏ ਸਨ, ਜਿਨ੍ਹਾਂ ਦਾ ਬਦਲ ਕੈਨੇਡਾ ਵਿਚ ਉਪਬਲਧ ਹੈ ਜਾਂ ਜਿਨ੍ਹਾਂ ਨੂੰ ਸਸਤੀ ਕੀਮਤਾਂ 'ਤੇ ਹੋਰ ਕਿਤੋਂ ਖਰੀਦਿਆ ਜਾ ਸਕਦਾ ਹੈ।