ਲਗਭਗ ਅੱਧੇ ਕੈਨੇਡੀਅਨ ਟੈਪਰੇਂਰੀ ਫੋਰਨ ਵਰਕਰ ਪ੍ਰੋਗਰਾਮ ਨੂੰ ਖਤਮ ਕਰਨਾ ਚਾਹੁੰਦੇ ਹਨ: ਪੋਲ

ਕੈਨੇਡਾ ਦੇ ਟੈਪਰੇਂਰੀ ਫੋਰਨ ਵਰਕਰ ਪ੍ਰੋਗਰਾਮ ਸਬੰਧੀ ਅਬੈਕਸ ਡੇਟਾ ਵਲੋਂ ਕੀਤੇ ਸਰਵੇ ਵਿਚ 44 ਫੀਸਦੀ ਕੈਨੇਡੀਅਨਾਂ ਨੇ ਇਸ ਨੂੰ ਖਤਮ ਕਰਨ ਦਾ ਸਮਰਥਨ ਕੀਤਾ ਹੈ। ਇਹ ਮਾਮਲਾ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਵਲੋਂ ਉਠਾਏ ਜਾਣ ਮਗਰੋਂ ਸੁਰਖੀਆਂ ਵਿਚ ਹੈ, ਉਹਨਾਂ ਹਾਲ ਹੀ ਵਿਚ ਕੈਨੇਡੀਅਨ ਨੌਜਵਾਨਾਂ ਵਿਚ ਬੇਰੁਜ਼ਗਾਰੀ ਦੇ ਉੱਚ ਪੱਧਰ ਦੇ ਜਵਾਬ ਵਿਚ ਇਸ ਪ੍ਰੋਗਰਾਮ ਨੂੰ ਖਤਮ ਕਰਨ ਦਾ ਪ੍ਰਸਤਾਵ ਦਿੱਤਾ ਸੀ।

ਅਬੈਕਸ ਡੇਟਾ ਮੁਤਾਬਕ, ਟੈਪਰੇਂਰੀ ਫੋਰਨ ਵਰਕਰ ਪ੍ਰੋਗਰਾਮ ਨੂੰ ਖ਼ਤਮ ਕਰਨ ਲਈ ਸਮਰਥਨ ਨੌਜਵਾਨ ਵਰਗ ਵਿਚ ਵਧੇਰੇ ਹੈ, ਔਨਲਾਈਨ ਸਰਵੇ ਵਿਚ ਸ਼ਾਮਲ ਹੋਏ 30 ਤੋਂ 44 ਸਾਲ ਦੇ 50 ਫੀਸਦੀ ਲੋਕਾਂ ਅਤੇ 18 ਤੋਂ 29 ਸਾਲ ਦੇ 48 ਫੀਸਦੀ ਨੌਜਵਾਨਾਂ ਨੇ ਪੌਲੀਐਵ ਦੀ ਮੰਗ ਦਾ ਸਮਰਥਨ ਕੀਤਾ। ਉਥੇ ਹੀ ਪ੍ਰੈਰੀ ਸੂਬਿਆਂ ਵਿਚ ਇਸ ਨੂੰ ਖਤਮ ਕਰਨ ਸਬੰਧੀ ਸਮਰਥਨ ਸਭ ਤੋਂ ਵੱਧ ਅਤੇ ਕਿਊਬੈਕ ਅਤੇ ਐਟਲਾਂਟਿਕ ਕੈਨੇਡਾ ਵਿਚ ਸਭ ਤੋਂ ਘੱਟ ਪਾਇਆ ਗਿਆ।

ਗੌਰਤਲਬ ਹੈ ਕਿ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਪਿਛਲੇ ਹਫ਼ਤੇ ਇੱਕ ਬਿਆਨ ਵਿਚ ਪ੍ਰੋਗਰਾਮ ਨੂੰ ਖਤਮ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ ਅਤੇ ਕਿਹਾ ਸੀ ਕਿ ਇਹ ਇੱਕ ਬਾਰਡਰ ਇਮੀਗ੍ਰੇਸ਼ਨ ਪਾਲਿਸੀ ਰਿਵਿਊ ਦਾ ਹਿੱਸਾ ਹੈ।