ਕਿਸਾਨਾਂ 'ਤੇ ਹਮਲਾ ਤਾਲਿਬਾਨੀ ਮਾਨਸਿਕਤਾ ਹੈ, ਸਰਕਾਰ ਨੂੰ ਕਿਸਾਨਾਂ ਦੇ 'ਮਨ ਕੀ ਬਾਤ' ਸੁਣਨੀ ਚਾਹੀਦੀ ਹੈ:ਸੰਜੇ ਰਾਊਤ

ਭਾਰਤੀ ਜਨਤਾ ਪਾਰਟੀ ਦੀ ਸਰਕਾਰ ਦੀ ਨਿਖੇਧੀ ਕਰਦਿਆਂ, ਸ਼ਿਵ ਸੈਨਾ ਆਗੂ ਸੰਜੇ ਰਾਊਤ ਨੇ ਸੋਮਵਾਰ ਨੂੰ ਆਖਿਆ ਕਿ ਹਰਿਆਣਾ ਦੇ ਕਰਨਾਲ ਵਿੱਚ ਕੀਤੀ ਗਈ ਕਾਰਵਾਈ ਤਾਲਿਬਾਨੀ ਮਾਨਸਿਕਤਾ ਦੀ ਤਰਾਂ ਹੈ।

ਰਾਊਤ ਨੇ ਮੀਡੀਆ ਨਾਲ ਗੱਲ ਕਰਦਿਆਂ ਆਖਿਆ,"ਕਿਸਾਨਾਂ 'ਤੇ ਹਮਲਾ ਮੁਲਕ ਲਈ ਇੱਕ ਸ਼ਰਮਨਾਕ ਵਾਕਿਆ ਹੈ। ਇਹ ਇੱਕ ਤਰਾਂ ਦੀ ਤਾਲਿਬਾਨੀ ਮਾਨਸਿਕਤਾ ਹੈ। ਕਿਸਾਨ ਗਾਜ਼ੀਪੁਰ ਸਰਹੱਦ, ਹਰਿਆਣਾ ਸਰਹੱਦ 'ਤੇ ਦੋ ਸਾਲਾਂ ਤੋਂ ਸੰਘਰਸ਼ ਕਰ ਰਹੇ ਹਨ.. ਉਹ ਆਪਣੇ ਹਕੂਕ ਲਈ ਲੜ ਰਹੇ ਹਨ। ਐੱਸ ਡੀ ਐੱਮ ਨੇ ਕਿਸਾਨਾਂ ਦੇ ਸਿਰ ਪਾੜਨ ਦੇ ਹੁਕਮ ਦਿੱਤੇ ਅਤੇ ਸਰਕਾਰ ਇਸ ਮਾਮਲੇ ਵਿੱਚ ਗੰਭੀਰ ਹੀ ਨਹੀਂ ਹੈ। ਇਹ ਸਰਕਾਰ ਇਹ ਕਿਵੇਂ ਆਖ ਸਕਦੀ ਹੈ ਕਿ ਇਹ ਗਰੀਬਾਂ ਅਤੇ ਕਿਸਾਨਾਂ ਲਈ ਹੈ? ਇਹ ਤਾਂ ਕਿਸਾਨਾਂ ਦੇ 'ਮਨ ਕੀ ਬਾਤ' ਵੀ ਨਹੀਂ ਸੁਣਦੀ।"

ਗ਼ੌਰਤਲਬ ਹੈ ਕਿ ਸ਼ਿਵ ਸੈਨਾ ਆਗੂ ਦਾ ਬਿਆਨ ਸ਼ਨੀਵਾਰ ਨੂੰ ਹਰਿਆਣਾ ਦੇ ਕਰਨਾਲ ਵਿੱਚ ਪੁਲਿਸ ਕਾਰਵਾਈ ਦੌਰਾਨ ਕਿਸਾਨਾਂ ਦੇ ਫੱਟੜ ਹੋਣ ਤੋਂ ਬਾਅਦ ਆਇਆ ਹੈ।

ਐਤਵਾਰ ਨੂੰ ਲਾਠੀਚਾਰਜ ਦੌਰਾਨ ਜ਼ਖਮੀ ਹੋਏ ਇੱਕ ਕਿਸਾਨ ਦੀ ਮੌਤ ਵੀ ਹੋਈ ਹੈ।

ਇਸੇ ਦੌਰਾਨ, ਐਤਵਾਰ ਨੂੰ ਹੀ ਐਨਫੋਰਸਮੈਂਟ ਡਾਇਰੈਕਟੋਰੇਟ (ਈ ਡੀ) ਵੱਲੋਂ ਮਨੀ ਲੌਂਡ੍ਰਿੰਗ ਮਾਮਲੇ ਵਿੱਚ ਮਹਾਰਾਸ਼ਟਰ ਦੇ ਮੰਤਰੀ ਅਨਿਲ ਪਰਬ ਨੂੰ ਸੰਮਨ ਭੇਜੇ ਗਏ ਹਨ।

ਇਸ ਬਾਰੇ ਰਾਊਤ ਨੇ ਆਖਿਆ,"ਸਾਡੇ ਆਵਾਜਾਈ ਮੰਤਰੀ ਅਨਿਲ ਪਰਬ ਨੂੰ ਅਚਾਨਕ ਹੀ ਈਡੀ ਵੱਲੋਂ ਨੋਟਿਸ ਭੇਜਿਆ ਗਿਆ ਹੈ। ਇਹ ਸਾਡੇ ਲਈ ਕੋਈ ਵੱਡੀ ਗੱਲ ਨਹੀਂ ਹੈ। ਇਹ ਕੋਈ ਮੌਤ ਦਾ ਵਾਰੰਟ ਨਹੀਂ ਹੈ। ਇਹ ਸਾਡੇ ਲਈ ਤਮਗ਼ੇ ਦੀ ਤਰਾਂ ਹੈ। ਈਡੀ ਨੇ ਆਪਣਾ ਸਭ ਤੋਂ ਵਧੀਆ ਅਫਸਰ ਬੀਜੇਪੀ ਦਫ਼ਤਰ ਵਿੱਚ ਬਿਠਾਇਆ ਹੈ ਜਾਂ ਬੀਜੇਪੀ ਕਾਰਜਕਾਰੀ ਨੂੰ ਈਡੀ ਦਫ਼ਤਰ ਵਿੱਚ ਬਿਠਾਇਆ ਹੈ। ਸਿਆਸਤ ਵਿੱਚ ਕੰਮ ਕਰਨ ਵਾਲਿਆਂ ਨੂੰ ਅਜਿਹੀਆਂ ਚਿੱਠੀਆਂ ਮਿਲਦੀਆਂ ਹੀ ਰਹਿੰਦੀਆਂ ਹਨ।"

ਉਨ੍ਹਾਂ ਅੱਗੇ ਆਖਿਆ ਕਿ ਮਹਾਰਾਸ਼ਟਰ ਵਿੱਚ ਮਹਾ ਵਿਕਾਸ ਅਘਾੜੀ ਸਰਕਾਰ ਬਹੁਤ ਮਜ਼ਬੂਤ ਹੈ ਅਤੇ ਭਾਜਪਾ ਇਸਨੂੰ ਤੋੜ ਨਹੀਂ ਸਕਦੀ।

"ਸਰਕਾਰ ਦੋ ਸਾਲਾਂ ਤੋਂ ਸੱਤਾ ਵਿੱਚ ਹੈ ਅਤੇ ਆਪਣਾ ਕਾਰਜਕਾਲ ਪੂਰਾ ਕਰੇਗੀ। ਤੁਸੀਂ ਜਿੰਨੀ ਮਰਜ਼ੀ ਕੋਸ਼ਿਸ਼ ਕਰ ਲਵੋ, ਇਹ ਕੰਧ ਨਹੀਂ ਟੁੱਟੇਗੀ। ਅਸੀਂ ਇਸ ਪ੍ਰੇਮ ਪੱਤਰ ਦਾ ਸਵਾਗਤ ਕਰਦੇ ਹਾਂ। ਭਾਵੇਂ ਜਿੰਨੀਆਂ ਮਰਜ਼ੀ ਚਿੱਠੀਆਂ ਆਉਣ, ਸਾਡੇ ਸ਼ਿਵ ਸੈਨਿਕ ਤਿਆਰ ਹਨ,"ਉਨ੍ਹਾਂ ਅੱਗੇ ਆਖਿਆ।

ਜ਼ਿਕਰਯੋਗ ਹੈ ਕਿ ਹਰਿਆਣਾ ਪੁਲਿਸ ਵੱਲੋਂ ਸ਼ਨੀਵਾਰ ਨੂੰ ਬਸਤਰ ਟੌਲ ਪਲਾਜ਼ਾ ਨੇੜੇ ਵਿਰੋਧ ਪ੍ਰਦਰਸ਼ਨ ਕਰ ਰਹੇ ਕਿਸਾਨਾਂ 'ਤੇ ਲਾਠੀ-ਚਾਰਜ ਕੀਤਾ ਗਿਆ ਸੀ, ਜਿੱਥੇ ਉਹ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟੜ ਦੇ ਪ੍ਰੋਗਰਾਮ ਵਿੱਚ ਪਹੁੰਚਣ ਵਾਲੀ ਥਾਂ 'ਤੇ ਉਨ੍ਹਾਂ ਦਾ ਵਿਰੋਧ ਕਰਨ ਲਈ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋਏ ਸਨ।

ਇਸ ਤੋਂ ਬਾਅਦ ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਦਾ ਕਲਿਪ ਫੈਲਿਆ, ਜਿਸਨੂੰ ਪੀਲੀਭੀਤ ਤੋਂ ਭਾਜਪਾ ਦੇ ਐੱਮਪੀ ਵਰੁਣ ਗਾਂਧੀ ਨੇ ਟਵੀਟ ਕੀਤਾ ਸੀ, ਇਸ ਵੀਡੀਓ ਵਿੱਚ ਕਰਨਾਲ ਦੇ ਐੱਸ ਡੀ ਐੱਮ ਆਯੂਸ਼ ਸਿਨਹਾ ਨੂੰ ਕਥਿਤ ਤੌਰ 'ਤੇ ਪੁਲਿਸਵਾਲਿਆਂ ਨੂੰ "ਉਨ੍ਹਾਂ ਦੇ (ਵਿਰੋਧ ਕਰ ਰਹੇ ਕਿਸਾਨਾਂ) ਸਿਰ ਪਾੜਨ ਦੀ ਹਦਾਇਤ ਦਿੰਦੇ ਵੇਖਿਆ ਜਾ ਸਕਦਾ ਹੈ, ਤਾਂ ਜੋ ਉਨ੍ਹਾਂ ਨੂੰ ਅੱਗੇ ਵਧਣ ਤੋਂ ਰੋਕਿਆ ਜਾ ਸਕੇ ਅਤੇ ਸੁਰੱਖਿਆ ਘੇਰਾਬੰਦੀ ਦੀ ਕਿਸੇ ਨੂੰ ਉਲੰਘਣਾ ਨਾ ਕਰਨ ਦਿੱਤੀ ਜਾ ਸਕੇ।

ਇਸ ਕਲਿਪ ਦੇ ਫੈਲਣ ਤੋਂ ਬਾਦ, ਸਿਨਹਾ ਨੇ ਏਐੱਨਆਈ ਨੂੰ ਆਖਿਆ,"ਕਈ ਥਾਵਾਂ 'ਤੇ ਪਥਰਾਅ ਸ਼ੁਰੂ ਹੋ ਗਿਆ ਸੀ... ਇਹ ਸਭ ਫੋਰਸ ਨੂੰ ਅਨੁਪਾਤਕ ਢੰਗ ਨਾਲ ਵਰਤਣ ਲਈ ਦਿੱਤੀ ਗਈ ਬ੍ਰੀਫਿੰਗ ਦੌਰਾਨ ਆਖਿਆ ਗਿਆ ਸੀ।"