ਲੁੱਕ ਵੈਸਟ ਯੋਜਨਾ ਤਹਿਤ ਬੀ.ਸੀ. ਸਰਕਾਰ ਵੱਲੋਂ ਜੰਗਲਾਤ ਅਤੇ ਐਮਰਜੈਂਸੀ ਪ੍ਰਬੰਧਨ ਲਈ ਨਵਾਂ ਟੈਸਟਬੈਡ ਕੀਤਾ ਗਿਆ ਲਾਂਚ

ਬੀ. ਸੀ. ਸਰਕਾਰ ਨੇ ਆਪਣੇ ਲੁੱਕ ਵੈਸਟ ਆਰਥਿਕ ਯੋਜਨਾ ਦੇ ਹਿੱਸੇ ਵਜੋਂ ਸੂਬੇ ਦੇ ਜੰਗਲਾਤ ਖੇਤਰ ਨੂੰ ਮਜ਼ਬੂਤ ​​ਕਰਨ ਅਤੇ ਹੜ੍ਹ ਤੇ ਵਾਈਲਡਫਾਇਰ ਵਰਗੀਆਂ ਮੌਸਮੀ ਘਟਨਾਵਾਂ ਤੋਂ ਕਮਿਊਨਿਟੀ ਨੂੰ ਬਚਾਉਣ ਲਈ ਇੱਕ ਨਿਵੇਕਲੀ ਪਹਿਲਕਦਮੀ ਸ਼ੁਰੂ ਕੀਤੀ ਹੈ। ਇਸ ਯੋਜਨਾ ਤਹਿਤ ਸੂਬੇ ਦੇ ਕਾਰੋਬਾਰਾਂ ਨੂੰ ਆਪਣੀਆਂ ਨਵੀਨਤਮ ਟੈਕਨੋਲਜੀ ਨੂੰ ਰੀਅਲ-ਵਰਲਡ ਸੈਟਿੰਗ ਯਾਨੀ ਅਸਲ ਮਾਹੌਲ ਵਿਚ ਟੈਸਟ ਕਰਨ, ਲਾਗੂ ਕਰਨ ਅਤੇ ਵੱਡੇ ਪੱਧਰ 'ਤੇ ਵਰਤਣ ਦਾ ਮੌਕਾ ਦਿੱਤਾ ਜਾ ਰਿਹਾ ਹੈ। ਇਸ ਨਾਲ ਲੋਕਲ ਕੰਪਨੀਆਂ ਨੂੰ ਵਿਕਾਸ ਦੇ ਨਵੇਂ ਮੌਕੇ ਮਿਲਣਗੇ।

ਇਸ ਦਾ ਮਤਲਬ ਹੈ ਕਿ ਵਾਈਲਡਫਾਇਰ ਵਰਗੀ ਸਥਿਤੀ ਨਾਲ ਨਜਿੱਠਣ ਵਾਲੀ ਨਵੀਂ ਟੈਕਨੋਲਜੀ ਨੂੰ ਕਿਸੇ ਬੰਦ ਕਮਰੇ ਵਿਚ ਨਹੀਂ ਸਗੋਂ ਅਸਲ ਜੰਗਲਾਂ ਵਿਚ ਜਾਂ ਅੱਗ ਲੱਗਣ ਵਾਲੇ ਖੇਤਰਾਂ ਵਿਚ ਜਾ ਕੇ ਟੈਸਟ ਕੀਤਾ ਜਾਵੇਗਾ। ਇਸ ਯੋਜਨਾ ਦਾ ਐਲਾਨ ਅੱਜ ਜੌਬਸ ਅਤੇ ਅਕਨੋਮਿਕ ਗ੍ਰੋਥ ਮਿਨਿਸਟਰ ਰਵੀ ਕਾਹਲੋਂ ਅਤੇ ਜੰਗਲਾਤ ਮਿਨਿਸਟਰ ਰਵੀ ਪਰਮਾਰ ਨੇ ਕੀਤਾ।

ਇਸ ਮੌਕੇ ਪਰਮਾਰ ਨੇ ਫਰੇਜ਼ਰ ਵੈਲੀ ਵਿਚ ਹੜ੍ਹਾਂ ਨਾਲ ਪ੍ਰਭਾਵਿਤ ਹੋਏ ਲੋਕਾਂ ਨਾਲ ਹਮਦਰਦੀ ਦਾ ਪ੍ਰਗਟਾਵਾ ਕਰਦਿਆਂ ਕਿਹਾ ਕਿ ਅਜਿਹੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਹੀ ਅਸੀਂ ਬੀ. ਸੀ. ਵਿਚ ਇਨੋਵੇਟਰਜ਼ ਨੂੰ ਸੱਦਾ ਦੇ ਰਹੇ ਹਾਂ ਅਤੇ ਇਸ ਪਹਿਲਕਦਮੀ ਦਾ ਉਦੇਸ਼ ਸਥਾਨਕ ਸਮੱਸਿਆਵਾਂ ਦੇ ਹੱਲ ਲਈ ਸਥਾਨਕ ਤਕਨੀਕਾਂ ਦੀ ਵਰਤੋਂ ਕਰਨਾ ਹੈ।