15.04C Vancouver 15.04C VancouverJul 24, 2024 3:46 PM - The Canadian Press
ਕੈਨੇਡੀਅਨ ਲਈ ਖੁਸ਼ਖ਼ਬਰੀ ਹੈ, ਬੈਂਕ ਆਫ਼ ਕੈਨੇਡਾ ਨੇ ਵਿਆਜ਼ ਦਰਾਂ ਵਿਚ ਇੱਕ ਹੋਰ ਕਟੌਤੀ ਕਰ ਦਿੱਤੀ ਹੈ, ਜਿਸ ਨਾਲ ਪਰਿਵਰਤਨਸ਼ੀਲ-ਦਰ ਮੌਰਗੇਜ ਵਾਲੇ ਘਰ ਦੇ ਮਾਲਕਾਂ ਨੂੰ ਤੁਰੰਤ ਰਾਹਤ ਮਿਲ ਗਈ ਹੈ। ਬੁੱਧਵਾਰ ਜਾਰੀ ਫੈਸਲੇ ਵਿਚ ਸੈਂਟਰਲ ਬੈਂਕ ਨੇ ਆਪਣੀ ਪ੍ਰਮੁੱਖ ਦਰ 0.25 ਫੀਸਦੀ ਘਟਾ ਕੇ 4.50 ਫੀਸਦੀ ਕਰ ਦਿੱਤੀ।
ਪਿਛਲੇ ਮਹੀਨੇ ਵੀ ਬੈਂਕ ਨੇ ਮਹਿੰਗਾਈ ਦਰ ਵਿਚ ਜਾਰੀ ਨਰਮੀ ਦੇ ਚੱਲਦੇ ਆਪਣੀ ਪ੍ਰਮੁੱਖ ਦਰ ਵਿਚ ਇੰਨੀ ਹੀ ਕਟੌਤੀ ਕੀਤੀ ਸੀ ਅਤੇ ਇਹ 4 ਸਾਲਾਂ ਵਿਚ ਪਹਿਲਾਂ ਰੇਟ ਕੱਟ ਸੀ। 7ਗਵਰਨਰ ਟਿਫ ਮੈਕਲੇਮ ਨੇ ਕਿਹਾ ਕਿ ਮਹਿੰਗਾਈ ਦਾ ਦਬਾਅ ਘੱਟ ਹੋ ਰਿਹਾ ਹੈ ਪਰ ਅਗਲੇ ਸਾਲ ਤੱਕ ਇਹ ਦੋ ਫੀਸਦੀ ਦੇ ਆਸਾਪਸ ਸਥਿਰ ਹੋਣ ਤੋਂ ਪਹਿਲਾਂ ਫਿਰ ਤੋਂ ਵੱਧ ਸਕਦੀ ਹੈ।
ਉਹਨਾਂ ਕਿਹਾ ਕਿ ਮਹਿੰਗਾਈ ਦੇ ਦੋ ਫੀਸਦੀ ਦੇ ਨੇੜੇ ਜਾਣ ਦੀ ਉਮੀਦ ਦੇ ਨਾਲ ਹੀ ਗਵਰਨਿੰਗ ਕੌਂਸਲ ਨੇ ਨੀਤੀ ਵਿਆਜ਼ ਦਰ ਵਿਚ 0.25 ਫੀਸਦੀ ਦੀ ਹੋਰ ਕਟੌਤੀ ਕਰਨ ਦਾ ਫੈਸਲਾ ਕੀਤਾ ਅਤੇ ਜੇ ਮਹਿੰਗਾਈ ਸੈਂਟਰਲ ਬੈਂਕ ਦੇ ਅਨੁਮਾਨ ਦਾਇਰੇ ਵਿਚ ਰਹੀ ਤਾਂ ਵਿਆਜ ਦਰਾਂ ਵਿਚ ਅੱਗੇ ਹੋਰ ਕਟੌਤੀ ਦੀ ਉਮੀਦ ਕੀਤੀ ਜਾ ਸਕਦੀ ਹੈ।
ਇਸ ਦੇ ਨਾਲ ਹੀ ਸੈਂਟਰਲ ਬੈਂਕ ਨੇ 2024 ਦੇ ਦੂਜੇ ਅੱਧ ਤੇ 2025 ਵਿਚ ਜੀ. ਡੀ. ਪੀ. ਵਿਕਾਸ ਦਰ ਵਧਣ ਦੀ ਭਵਿੱਖਬਾਣੀ ਕੀਤੀ ਹੈ। ਬੈਂਕ ਦਾ ਕਹਿਣਾ ਹੈ ਕਿ ਉਧਾਰ ਦੀ ਲਾਗਤ ਘੱਟ ਹੋਣ ਨਾਲ ਕਾਰੋਬਾਰੀ ਨਿਵੇਸ਼ ਅਤੇ ਘਰੇਲੂ ਖ਼ਰਚੇ ਵਿਚ ਰਿਕਵਰੀ ਦੇਖਣ ਨੂੰ ਮਿਲੇਗੀ ਅਤੇ ਨਿਰਯਾਤ ਵਿਚ ਵਾਧਾ ਹੋਵੇਗਾ। ਕੁੱਲ ਮਿਲਾ ਕੇ ਬੈਂਕ ਨੇ 2024 ਵਿਚ ਜੀ. ਡੀ. ਪੀ. ਵਿਕਾਸ ਦਰ 1.2 ਫੀਸਦੀ, 2025 ਵਿਚ 2.1 ਫੀਸਦੀ ਅਤੇ 2026 ਵਿਚ 2.4 ਫੀਸਦੀ ਵਧਣ ਦਾ ਅਨੁਮਾਨ ਲਗਾਇਆ ਹੈ।
