9.64C Vancouver 9.64C VancouverJul 15, 2026 2:28 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ ਸੈਂਟਰਲ ਬੈਂਕ ਨੇ ਅੱਜ ਆਪਣੀ ਅਹਿਮ ਮੁਦਰਾ ਨੀਤੀ ਦੀ ਮੀਟਿੰਗ ਵਿਚ ਫੈਸਲਾ ਲੈਂਦਿਆਂ ਬੈਂਚਮਾਰਕ ਵਿਆਜ ਦਰ ਨੂੰ 2.25 ਫੀਸਦੀ 'ਤੇ ਹੀ ਬਰਕਰਾਰ ਰੱਖਣ ਦਾ ਐਲਾਨ ਕੀਤਾ ਹੈ। ਗਵਰਨਰ ਟਿਫ ਮੈਕਲੇਮ ਦੀ ਅਗਵਾਈ ਵਿਚ ਲਏ ਗਏ ਇਸ ਫੈਸਲੇ ਵਿਚ ਲਗਾਤਾਰ ਛੇਵੀਂ ਵਾਰ ਬੈਂਕ ਆਫ਼ ਕੈਨੇਡਾ ਨੇ ਵਿਆਜ ਦਰਾਂ ਵਿਚ ਕੋਈ ਤਬਦੀਲੀ ਨਹੀਂ ਕੀਤੀ।
ਬੈਂਕ ਦਾ ਤਾਜ਼ਾ ਕਦਮ ਮਿਡਲ ਈਸਟ ਵਿਚ ਚੱਲ ਰਹੇ ਤਣਾਅ ਦੀ ਵਜ੍ਹਾ ਨਾਲ ਕੌਮਾਂਤਰੀ ਪੱਧਰ 'ਤੇ ਕੱਚੇ ਤੇਲ ਦੀਆਂ ਕੀਮਤਾਂ ਵਿਚ ਹੋ ਰਹੇ ਉਤਰਾਅ-ਚੜ੍ਹਾਅ ਅਤੇ CUSMA ਵਪਾਰ ਸਮਝੌਤੇ ਨੂੰ ਲੈ ਕੇ ਬਣੀ ਬੇਯਕੀਨੀ ਵਿਚਕਾਰ ਆਇਆ ਹੈ। ਇਸ ਦੇ ਨਾਲ ਹੀ ਸੈਂਟਰਲ ਬੈਂਕ ਨੇ 2026 ਲਈ ਜੀਡੀਪੀ ਵਾਧੇ ਦਾ ਅਨੁਮਾਨ 1.2 ਫੀਸਦੀ ਤੋਂ ਘਟਾ ਕੇ 0.7 ਫੀਸਦੀ ਕਰ ਦਿੱਤਾ ਹੈ ਅਤੇ 2027 ਅਤੇ 2028 ਵਿਚ ਰਿਕਵਰੀ ਦੀ ਉਮੀਦ ਜਤਾਉਂਦੇ ਹੋਏ ਇਹਨਾਂ ਦੋਹਾਂ ਫਿਸਕਾਲ ਸਾਲ ਵਿਚ ਕ੍ਰਮਵਾਰ 1.8 ਫੀਸਦੀ ਗ੍ਰੋਥ ਦਾ ਅਨੁਮਾਨ ਲਗਾਇਆ ਹੈ।
ਗਵਰਨਰ ਟਿਫ ਮੈਕਲੇਮ ਮੁਤਾਬਕ, ਨੇੜਲੇ ਭਵਿੱਖ ਵਿਚ ਮਹਿੰਗਾਈ ਦਰ ਗੈਸੋਲੀਨ ਦੀਆਂ ਕੀਮਤਾਂ ਪ੍ਰਤੀ ਸੰਵੇਦਨਸ਼ੀਲ ਰਹਿਣ ਦੀ ਸੰਭਾਵਨਾ ਹੈ ਅਤੇ 2027 ਦੇ ਸ਼ੁਰੂ ਵਿਚ ਇਹ ਬੈਂਕ ਦੇ ਟੀਚੇ ਦੇ ਨੇੜੇ 2 ਫੀਸਦੀ ਦੇ ਕਰੀਬ ਵਾਪਸ ਆਉਣ ਦੀ ਉਮੀਦ ਹੈ। ਗੌਰਤਲਬ ਹੈ ਕਿ ਕੈਨੇਡਾ ਵਿਚ ਸਲੌ ਆਰਥਿਕ ਗ੍ਰੋਥ ਅਤੇ ਗਲੋਬਲ ਕਾਰਨਾਂ ਕਰਕੇ ਬੈਂਕ ਦੀਆਂ ਵਿਆਜ ਦਰਾਂ ਅਕਤਬੂਰ 2025 ਤੋਂ ਹੀ ਸਥਿਰ ਬਣੀਆਂ ਹੋਈਆਂ ਹਨ।
