ਪ੍ਰੀਮੀਅਰ ਈਬੀ ਨੇ ਬੀਸੀ ਫੈਰੀਜ਼ ਨੂੰ ਕੰਮ 'ਤੇ ਧਿਆਨ ਦੇਣ ਦੀ ਦਿੱਤੀ ਸਲਾਹ

ਪ੍ਰੀਮੀਅਰ ਡੇਵਿਡ ਈਬੀ ਨੇ ਬੀਸੀ ਫੈਰੀਜ਼ ਨੂੰ ਕਿਰਾਏ ਵਧਾਉਣ ਦੀ ਬਜਾਏ ਕੋਸਟ ਕੰਟਰੋਲ ’ਤੇ ਫੋਕਸ ਕਰਨ ਲਈ ਕਿਹਾ ਹੈ। ਈਬੀ ਨੇ ਕਿਹਾ ਕਿ ਸਰਕਾਰ ਨੇ ਬੀਸੀ ਫੈਰੀਜ਼ ਨੂੰ ਬਹੁਤ ਸਾਰਾ ਪੈਸਾ ਦਿੱਤਾ ਹੈ, ਜਿਸ ਦੇ ਬਦਲੇ ਕੰਪਨੀ ਨੇ ਬ੍ਰਿਟਿਸ਼ ਕੋਲੰਬੀਆ ਲਈ ਕਿਰਾਏ ਸਥਿਰ ਰੱਖਣ ਦਾ ਵਾਅਦਾ ਕੀਤਾ ਸੀ, ਹੁਣ ਅਸੀਂ ਉਨ੍ਹਾਂ ਹੀ ਯਤਨਾਂ ਨੂੰ ਦੇਖਣਾ ਚਾਹੁੰਦੇ ਹਾਂ।

ਬੀ.ਸੀ. ਫੈਰੀਜ਼ ਦੇ ਸੀਈਓ ਨਿਕੋਲਸ ਜਿਮੇਨੇਜ਼ ਨੇ ਕਿਹਾ ਸੀ ਕਿ ਮਹਿੰਗਾਈ, ਵਧਦੀ ਮੰਗ ਅਤੇ ਪੁਰਾਣੇ ਫਲੀਟ ਨੂੰ ਨਵੇਂ ਜਹਾਜ਼ ਨਾਲ ਬਦਲਣ ਦੀ ਯੋਜਨਾ ਲਈ ਕਿਰਾਏ ਵਿਚ ਵਾਧਾ ਕਰਨਾ ਹੋਵੇਗਾ।

ਜਿਮੇਨੇਜ਼ ਦਾ ਕਹਿਣਾ ਸੀ ਕਿ ਕੰਪਨੀ ਨੂੰ 2028 ਵਿਚ ਮੌਜੂਦਾ ਕਿਰਾਇਆ ਬਣਤਰ ਦੀ ਮਿਆਦ ਸਮਾਪਤ ਹੋਣ ’ਤੇ ਕਿਰਾਏ ਵਿਚ 30 ਫੀਸਦੀ ਜਾਂ ਉਸ ਤੋਂ ਜ਼ਿਆਦਾ ਦਾ ਵਾਧਾ ਕਰਨ ਦੀ ਜ਼ਰੂਰਤ ਹੋ ਸਕਦੀ ਹੈ।

ਪ੍ਰੀਮੀਅਰ ਡੇਵਿਡ ਈਬੀ ਨੇ ਕਿਹਾ ਕਿ ਸਰਕਾਰ ਜਹਾਜ਼ ਦੀ ਵੱਧ ਰਹੀ ਲਾਗਤ ਵਰਗੇ ਖ਼ਰਚਿਆਂ ਨਾਲ ਨਜਿੱਠਣ ਲਈ ਬੀਸੀ ਫੈਰਿਸ ਦੀ ਮਦਦ ਕਰ ਸਕਦੀ ਹੈ, ਪਰ ਇਹ ਕੋਈ ਬਹਾਨਾ ਨਹੀਂ ਹੋਣਾ ਚਾਹੀਦਾ ਜਿਹੜੇ ਖ਼ਰਚ ਕੰਟਰੋਲ ਕੀਤੇ ਜਾ ਸਕਦੇ ਨੇ ਕੰਪਨੀ ਨੂੰ ਉਨ੍ਹਾਂ ’ਤੇ ਕੰਮ ਕਰਨਾ ਚਾਹੀਦਾ ਹੈ।