ਨੌਕਰੀਆਂ ’ਚ ਕਟੌਤੀ ਕਰਨ ਦੇ ਮਾਮਲੇ ’ਚ ਬੈੱਲ ਦੇ ਸੀ.ਈ.ਓ. ਨੂੰ ਕੀਤਾ ਗਿਆ ਤਲਬ

ਕੈਨੇਡਾ ਦੇ ਹਾਊਸ ਔਫ ਕੌਮਨਜ਼ ਦੀ ਕਮੇਟੀ ਨੇ ਬੈੱਲ ਕੈਨੇਡਾ ਦੇ ਮੁਖੀ ਨੂੰ ਦੇਸ਼ ਭਰ ਵਿਚ ਹਜ਼ਾਰਾਂ ਨੌਕਰੀਆਂ ਵਿਚ ਕਟੌਤੀ ਕਰਨ ਦੇ ਕੰਪਨੀ ਦੇ ਫੈਸਲੇ ਬਾਰੇ ਪੁੱਛਗਿੱਛ ਲਈ ਤਲਬ ਕੀਤਾ ਹੈ।

ਸੀ.ਈ.ਓ. ਮਿਰਕੋ ਬਿਬਿਕ ਨੂੰ ਪਹਿਲਾਂ 29 ਫਰਵਰੀ ਅਤੇ ਫਿਰ 19 ਮਾਰਚ ਨੂੰ ਹਾਊਸ ਦੀ ਹੈਰੀਟੇਜ ਕਮੇਟੀ ਸਾਹਮਣੇ ਪੇਸ਼ ਹੋਣ ਲਈ ਸੱਦਾ ਦਿੱਤਾ ਗਿਆ ਸੀ ਪਰ ਉਹ ਪੇਸ਼ ਨਹੀਂ ਹੋ ਸਕੇ ਸਨ। ਪਿਛਲੇ ਹਫ਼ਤੇ ਇੱਕ ਬੰਦ ਕਮਰਾ ਮੀਟਿੰਗ ਵਿਚ ਕਮੇਟੀ ਨੇ ਬਿਬਿਕ ਨੂੰ 11 ਅਪ੍ਰੈਲ ਨੂੰ ਸੰਮਨ ਕਰਨ ਲਈ ਸਹਿਮਤੀ ਦਿੱਤੀ। ਜਦੋਂ ਕੋਈ ਗਵਾਹ ਪੇਸ਼ ਹੋਣ ਦੇ ਸੱਦੇ ਨੂੰ ਨਹੀਂ ਮੰਨਦਾ ਤਾਂ ਕਮੇਟੀ ਉਸ ਨੂੰ ਹਾਜ਼ਰੀ ਲਈ ਮਜਬੂਰ ਕਰਨ ਲਈ ਸੰਮਨ ਜਾਰੀ ਕਰ ਸਕਦੀ ਹੈ।

ਬੈੱਲ ਮੀਡੀਆ ਦੀ ਮੂਲ ਕੰਪਨੀ ਬੈੱਲ ਕੈਨੇਡਾ ਐਂਟਰਪ੍ਰਾਈਜਿਜ਼ ਨੇ ਫਰਵਰੀ ਵਿਚ 4,800 ਨੌਕਰੀਆਂ ਖ਼ਤਮ ਕਰਨ ਦੀ ਘੋਸ਼ਣਾ ਕੀਤੀ ਸੀ, ਇਨ੍ਹਾਂ ਵਿਚ ਕਈ ਰੇਡੀਓ ਸਟੇਸ਼ਨ ਵੇਚਣ ਦਾ ਫੈਸਲਾ ਵੀ ਸ਼ਾਮਲ ਸਨ।

ਕੰਪਨੀ ਨੇ ਇਸ ਕਟੌਤੀ ਲਈ ਸਰਕਾਰ ਅਤੇ ਕੈਨੇਡੀਅਨ ਰੇਡੀਓ-ਟੈਲੀਵਿਜ਼ਨ ਅਤੇ ਦੂਰਸੰਚਾਰ ਕਮਿਸ਼ਨ ’ਤੇ ਦੋਹਾਂ ’ਤੇ ਦੋਸ਼ ਲਗਾਉਂਦੇ ਹੋਏ ਕਿਹਾ ਸੀ ਕਿ ਫੈਡਰਲ ਨੇ ਸੰਕਟ ਵਿਚ ਘਿਰੀ ਮੀਡੀਆ ਕੰਪਨੀਆਂ ਨੂੰ ਰਾਹਤ ਪ੍ਰਦਾਨ ਕਰਨ ਵਿਚ ਬਹੁਤ ਦੇਰ ਕੀਤੀ, ਜਿਸ ਲਈ ਕੰਪਨੀ ਨੌਕਰੀਆਂ ਵਿਚ ਕਟੌਤੀ ਕਰਨ ਲਈ ਮਜਬੂਰ ਹੋਈ।