ਨਾਟੋ ਤੇ ਰੂਸ 'ਤੇ ਚਰਚਾ ਲਈ ਸਵੀਡਨ, ਫਿਨਲੈਂਡ ਦੇ ਲੀਡਰਾਂ ਨੂੰ ਮਿਲੇ ਬਾਈਡੇਨ

ਰਾਸ਼ਟਰਪਤੀ ਜੋਅ ਬਾਈਡੇਨ ਨੇ ਵੀਰਵਾਰ ਨੂੰ ਸਵੀਡਨ ਅਤੇ ਫਿਨਲੈਂਡ ਦੇ ਲੀਡਰਾਂ ਨਾਲ ਵ੍ਹਾਈਟ ਹਾਊਸ ਵਿਚ ਮੁਲਾਕਾਤ ਕੀਤੀ। ਇਸ ਦੌਰਾਨ ਉਨ੍ਹਾਂ ਯੂਕਰੇਨ 'ਤੇ ਰੂਸ ਦੇ ਹਮਲੇ ਦੇ ਜਵਾਬ ਵਿਚ ਸਵੀਡਨ ਤੇ ਫਿਨਲੈਂਡ ਵੱਲੋਂ ਨਾਟੋ ਵਿਚ ਸ਼ਾਮਲ ਹੋਣ ਦੇ ਫੈਸਲੇ ਦੀ ਸ਼ਲਾਘਾ ਕੀਤੀ।

ਬਾਈਡੇਨ ਨੇ ਸਵੀਡਨ ਦੀ ਪ੍ਰਧਾਨ ਮੰਤਰੀ ਮੈਗਡਾਲੇਨਾ ਐਂਡਰਸਨ ਤੇ ਫਿਨਲੈਂਡ ਦੇ ਰਾਸ਼ਟਰਪਤੀ ਸੌਲੀ ਨੀਨੀਸਟੋ ਦਾ ਵ੍ਹਾਈਟ ਹਾਊਸ ਵਿਖੇ ਸੁਆਗਤ ਕੀਤਾ। ਦੋਵੇਂ ਲੀਡਰ ਬਾਈਡੇਨ ਨੂੰ ਨਾਟੋ 'ਤੇ ਗੱਲਬਾਤ ਦੇ ਨਾਲ-ਨਾਲ ਯੂਰਪੀ ਸਕਿਓਰਿਟੀ ਦੀਆਂ ਚਿੰਤਾਵਾਂ 'ਤੇ ਜ਼ਾਹਰ ਕਰਨ ਲਈ ਮਿਲੇ।

ਬਾਈਡੇਨ ਨੇ ਦੋਹਾਂ ਲੀਡਰਾਂ ਨਾਲ ਮੁਲਾਕਾਤ ਦੌਰਾਨ ਕਿਹਾ ਕਿ ਹਾਈ ਨਾਰਥ ਵਿਚ ਦੋ ਨਵੇਂ ਨਾਟੋ ਮੈਂਬਰ ਮਿਲਣ ਨਾਲ ਸਾਡੇ ਗੱਠਜੋੜ ਦੀ ਸਕਿਓਰਿਟੀ ਵਿਚ ਵਾਧਾ ਹੋਵੇਗਾ। ਦੱਸ ਦੇਈਏ ਕਿ ਨਾਟੋ ਦੇ ਆਰਟੀਕਲ 5 ਅਨੁਸਾਰ, ਉਸ ਦੇ ਕਿਸੇ ਵੀ ਮੈਂਬਰ 'ਤੇ ਕੋਈ ਵੀ ਹਮਲਾ ਉਸ ਦੇ ਸਾਰੇ ਮੈਂਬਰਾਂ 'ਤੇ ਹਮਲਾ ਮੰਨਿਆ ਗਿਆ ਹੈ। ਫਿਨਲੈਂਡ ਅਤੇ ਸਵੀਡਨ ਨੂੰ ਨਾਟੋ ਦਾ ਹਿੱਸਾ ਬਣਨ ਮਗਰੋਂ ਇਸ ਦਾ ਫਾਇਦਾ ਮਿਲੇਗਾ। ਰੂਸ ਵੱਲੋਂ 24 ਫਰਵਰੀ ਨੂੰ ਯੂਕਰੇਨ 'ਤੇ ਹਮਲਾ ਕਰਨ ਤੋਂ ਬਾਅਦ ਫਿਨਲੈਂਡ ਤੇ ਸਵੀਡਨ ਵਿਚ ਵੱਡੇ ਪੱਧਰ 'ਤੇ ਜਨਤਕ ਰਾਏ ਨੇ ਨਾਟੋ ਮੈਂਬਰਸ਼ਿਪ ਦੇ ਹੱਕ ਵਿਚ ਆਵਾਜ਼ ਬੁਲੰਦ ਕੀਤੀ ਹੈ।