15.04C Vancouver 15.04C VancouverJul 24, 2024 5:31 PM - The Canadian Press
ਕੈਲਗਰੀ ਵਿਚ ਪਾਣੀ ਸਬੰਧੀ ਪਾਬੰਦੀਆਂ ਨੂੰ ਸਭ ਤੋਂ ਘੱਟ ਲੈਵਲ ਤੱਕ ਕਰ ਦਿੱਤਾ ਗਿਆ ਹੈ। ਸਿਟੀ ਦੀ ਮੇਅਰ ਜੋਤੀ ਗੋਡੇਂਕ ਨੇ ਬੀਤੇ ਦਿਨ ਦੁਪਹਿਰ ਸਮੇਂ ਘੋਸ਼ਣਾ ਕੀਤੀ ਕਿ ਬੀਅਰਸਪਾ ਅਤੇ ਗਲੇਨਮੋਰ ਟਰੀਟਮੈਂਟ ਪਲਾਂਟ ਵਿਚ ਪੰਪ ਦੀ ਪਰੇਸ਼ਾਨੀ ਦਾ ਹੱਲ ਕਰ ਲਿਆ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਹੁਣ ਤੋਂ ਹੀ ਸਿਟੀ ਵਿਚ ਸਟੇਜ 1 ਦੀਆਂ ਪਾਬੰਦੀਆਂ ਲਾਗੂ ਕੀਤੀਆਂ ਜਾ ਰਹੀਆਂ ਹਨ। ਸਿਟੀ ਵਿਚ ਵੱਡੀ ਫੀਡਰ ਮੇਨ ਪਾਈਪ ਦੇ ਠੀਕ ਹੋਣ ਮਗਰੋਂ ਪਹਿਲੀ ਵਾਰ ਇੰਨੀ ਛੋਟ ਮਿਲੀ ਹੈ।
ਪਹਿਲਾਂ ਸੋਮਵਾਰ ਇਹ ਘੋਸ਼ਣਾ ਹੋਣੀ ਸੀ ਪਰ ਉਸ ਦਿਨ ਦੋਵੇਂ ਪਲਾਂਟਸ ਵਿਚ ਥੋੜ੍ਹੀ ਸਮੱਸਿਆ ਆਉਣ ਕਾਰਨ ਇਸ ਨੂੰ ਟਾਲ ਦਿੱਤਾ ਗਿਆ ਸੀ। ਹੁਣ ਲੋਕ ਹਫਤੇ ਵਿਚ ਦੋ ਵਾਰ ਸਪ੍ਰਿੰਕਲਰ ਅਤੇ ਸੋਕਰ ਹੋਜ਼ ਰਾਹੀਂ ਦੋ ਘੰਟੇ ਪਾਣੀ ਵਰਤ ਸਕਦੇ ਹਨ।
ਈਵਨ ਨੰਬਰ ਵਾਲੇ ਘਰ ਬੁੱਧਵਾਰ ਜਾਂ ਸ਼ਨੀਵਾਰ ਅਤੇ ਔਡ ਨੰਬਰ ਵਾਲੇ ਘਰ ਵੀਰਵਾਰ ਜਾਂ ਐਤਵਾਰ ਪਾਣੀ ਦੀ ਵਰਤੋਂ ਕਰ ਸਕਦੇ ਹਨ। ਲੋਕਾਂ ਨੂੰ ਸਵੇਰੇ ਜਾਂ ਸ਼ਾਮ ਸਮੇਂ ਪੌਦਿਆਂ ਨੂੰ ਪਾਣੀ ਲਾਉਣ ਦੀ ਸਲਾਹ ਦਿੱਤੀ ਗਈ ਹੈ।
ਫਿਲਹਾਲ ਲੋਕਾਂ ਨੂੰ ਵਾਹਨ ਜਾਂ ਰਸਤੇ ਸਾਫ ਕਰਨ ਲਈ ਪਾਣੀ ਦੀ ਵਰਤੋਂ ਦੀ ਇਜਾਜ਼ਤ ਨਹੀਂ ਹੈ। ਇਸ ਦੇ ਇਲਾਵਾ ਫੁਹਾਰਿਆਂ ਨੂੰ ਭਰਨ ਲਈ ਵੀ ਅਜੇ ਪਾਣੀ ਨਹੀਂ ਵਰਤਿਆ ਜਾ ਸਕੇਗਾ।
