ਟਰੰਪ ਵਲੋਂ ਟੈਰਿਫ ਦੀ ਧਮਕੀ ਨੂੰ ਦੇਖਦੇ ਹੋਏ ਸਰਹੱਦ ’ਤੇ ਕੈਨੇਡਾ ਨੇ ਸਖ਼ਤੀ ਵਧਾਉਣ ਦਾ ਕੀਤਾ ਫ਼ੈਸਲਾ

ਕੈਨੇਡਾ ਨੇ ਅਮਰੀਕਾ ਦੇ ਨਵੇਂ ਰਾਸ਼ਟਰਪਤੀ ਡੋਨਲਡ ਟਰੰਪ ਵਲੋਂ ਟੈਰਿਫ ਦੀ ਧਮਕੀ ਨੂੰ ਦੇਖਦੇ ਹੋਏ ਸਰਹੱਦ ’ਤੇ ਸਖ਼ਤੀ ਵਧਾਉਣ ਲਈ ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ ਅਤੇ ਆਰ. ਸੀ.ਐਮ.ਪੀ. ਦੀ ਫੰਡਿੰਗ ਵਧਾਉਣ ਦਾ ਫੈਸਲਾ ਕੀਤਾ ਹੈ, ਜਿਸ ਨਾਲ ਇਹ ਦੋਵੇਂ ਏਜੰਸੀਆਂ ਬਾਰਡਰ ’ਤੇ ਆਪਣੇ ਮੁਲਾਜ਼ਮਾਂ ਅਤੇ ਸਾਧਨਾਂ ਵਿਚ ਹੋਰ ਵਾਧਾ ਕਰਨਗੀਆਂ।

ਇਹ ਘੋਸ਼ਣਾ ਬੁੱਧਵਾਰ ਸ਼ਾਮ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਕੈਨੇਡਾ ਭਰ ਦੇ ਪ੍ਰੀਮੀਅਰ ਵਿਚਕਾਰ ਟਰੰਪ ਦੇ ਪ੍ਰਸਤਾਵਿਤ ਟੈਰਿਫ ਅਤੇ ਕੈਨੇਡਾ-ਅਮਰੀਕਾ ਦੇ ਆਗਾਮੀ ਸਬੰਧਾਂ ’ਤੇ ਚਰਚਾ ਲਈ ਹੋਈ ਐਮਰਜੈਂਸੀ ਮੀਟਿੰਗ ਤੋਂ ਬਾਅਦ ਕੀਤੀ ਗਈ। ਇਹ ਬੈਠਕ ਆਨਲਾਈਨ ਕਰੀਬ 90 ਮਿੰਟ ਚੱਲੀ, ਜਿਸ ਮਗਰੋਂ ਫੈਡਰਲ ਜਨਤਕ ਸੁਰੱਖਿਆ ਮੰਤਰੀ ਡੋਮਿਨਿਕ ਲੇਬਲੈਂਕ ਅਤੇ ਉਪ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨੇ ਬਾਰਡਰ ਫੰਡਿੰਗ ਵਧਾਉਣ ਬਾਰੇ ਜਾਣਕਾਰੀ ਦਿੱਤੀ। ਹਾਲਾਂਕਿ, ਉਨ੍ਹਾਂ ਨੇ ਇਸ ਸਬੰਧੀ ਹੋਰ ਵਾਧੂ ਵੇਰਵਾ ਜਾਂ ਸਮਾਂ-ਸੀਮਾ ਬਾਰੇ ਡਿਟੇਲਸ ਨਹੀਂ ਦਿੱਤੀ।

ਲੇਬਲੈਂਕ ਨੇ ਕਿਹਾ ਕਿ ਹਾਲਾਂਕਿ ਕੈਨੇਡਾ ਪਹਿਲਾਂ ਹੀ ਆਪਣੀਆਂ ਸਰਹੱਦਾਂ ਨੂੰ ਬਿਹਤਰ ਢੰਗ ਨਾਲ ਮੈਨੇਜ ਕਰ ਰਿਹਾ ਹੈ। ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ ਕੈਨੇਡਾ ਇਹ ਕਹਿ ਕੇ ਪੱਲਾ ਝਾੜ ਰਿਹਾ ਸੀ ਕਿ ਸਮੱਸਿਆ ਸਿਰਫ ਮੈਕਸਿਕੋ ਵਾਲੇ ਪਾਸਿਓਂ ਹੈ।