ਕੈਨੇਡਾ ਤੇ ਯੂ.ਕੇ. ਨੇ ਇਜ਼ਰਾਇਲ ਦੇ ਦੋ ਕੈਬਨਿਟ ਮੰਤਰੀਆਂ ਤੇ ਲਾਈਆਂ ਪਾਬੰਦੀਆਂ

ਕੈਨੇਡਾ, ਬ੍ਰਿਟੇਨ ਵਲੋਂ ਇਜ਼ਰਾਇਲ ਦੇ ਦੋ ਸੱਜੇ ਪੱਖੀ ਮਿਨਿਸਟਰਸ 'ਤੇ ਉਨ੍ਹਾਂ ਦੀਆਂ ਗਾਜ਼ਾ ਵਿਰੁੱਧ ਟਿੱਪਣੀਆਂ ਲਈ ਸਖ਼ਤ ਪਾਬੰਦੀਆਂ ਲਗਾਈਆਂ ਜਾ ਰਹੀਆਂ ਹਨ। ਇਨ੍ਹਾਂ ਮਿਨਿਸਟਰਸ ਵਿਚ ਇਜ਼ਰਾਇਲ ਦੇ ਰਾਸ਼ਟਰੀ ਸੁਰੱਖਿਆ ਮੰਤਰੀ ਇਟਾਮਾਰ ਬੇਨ-ਗਵੀਰ ਅਤੇ ਵਿੱਤ ਮੰਤਰੀ ਬੇਜ਼ਲੇਲ ਸਮੋਟ੍ਰਿਚ ਸ਼ਾਮਲ ਹਨ। ਕੈਨੇਡਾ ਇਨ੍ਹਾਂ 'ਤੇ ਯਾਤਰਾ ਪਾਬੰਦੀ ਲਗਾ ਰਿਹਾ ਹੈ, ਨਾਲ ਹੀ ਉਨ੍ਹਾਂ ਦੇ ਕੈਨੇਡਾ ਵਿਚ ਕਿਸੇ ਵੀ ਤਰ੍ਹਾਂ ਦੀਆਂ ਸੰਪਤੀਆਂ ਨੂੰ ਜ਼ਬਤ ਕਰੇਗਾ।

ਯੂ. ਕੇ., ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਵੀ ਇਸੇ ਤਰ੍ਹਾਂ ਦੀਆਂ ਪਾਬੰਦੀਆਂ ਲਗਾ ਰਹੇ ਹਨ। ਬੇਨ-ਗਵੀਰ ਅਤੇ ਸਮੋਟ੍ਰਿਚ ਦੋਵਾਂ ਨੇ ਗਾਜ਼ਾ 'ਤੇ ਪੱਕਾ ਕਬਜ਼ਾ ਕਰਨ ਅਤੇ ਉੱਥੇ ਯਹੂਦੀ ਬਸਤੀਆਂ ਦੀ ਮੁੜ ਸਥਾਪਨਾ ਦੀ ਟਿੱਪਣੀ ਕੀਤੀ ਸੀ, ਨਾਲ ਹੀ ਗਾਜ਼ਾ ਵਿਚ ਰਾਹਤ ਸਮੱਗਰੀ ਦੀ ਪ੍ਰਵਾਨਗੀ ਦੇਣ ਦੇ ਵਿਰੁੱਧ ਮੁਹਿੰਮ ਚਲਾਈ ਸੀ।

ਇਜ਼ਰਾਈਲ ਦੇ ਵਿਦੇਸ਼ ਮੰਤਰੀ ਗਿਡੀਓਨ ਸਾਰ ਨੇ ਕੈਨੇਡਾ ਅਤੇ ਹੋਰ ਸਹਿਯੋਗੀਆਂ ਵਲੋਂ ਚੁੱਕੇ ਕਦਮ ਨੂੰ ਨਿਰਾਸ਼ਾਜਨਕ ਕਰਾਰ ਦਿੱਤਾ ਅਤੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਅਗਲੇ ਹਫ਼ਤੇ ਦੇ ਸ਼ੁਰੂ ਵਿਚ ਇੱਕ ਵਿਸ਼ੇਸ਼ ਮੀਟਿੰਗ ਕਰੇਗੀ, ਜਿਸ ਵਿਚ ਇਹ ਫੈਸਲਾ ਕੀਤਾ ਜਾਵੇਗਾ ਇਸ ਕਾਰਵਾਈ ਦਾ ਜਵਾਬ ਕਿਵੇਂ ਦੇਣਾ ਹੈ।