ਕੈਨੇਡਾ ਵਿਚ ਜਲਦ ਵੱਜ ਸਕਦਾ ਹੈ ਚੋਣਾਂ ਦਾ ਬਿਗਲ

ਕੈਨੇਡਾ ਵਿਚ ਚੋਣਾਂ ਦਾ ਜਲਦ ਬਿਗਲ ਵੱਜ ਸਕਦਾ ਹੈ। ਮਾਰਕ ਕਾਰਨੀ ਵਲੋਂ ਸੰਸਦ ਦੀ ਕਾਰਵਾਈ 24 ਮਾਰਚ ਨੂੰ ਮੁੜ ਸ਼ੁਰੂ ਹੋਣ ਤੋਂ ਪਹਿਲਾਂ ਚੋਣਾਂ ਦਾ ਸੱਦਾ ਦਿੱਤੇ ਜਾਣ ਦੀ ਉਮੀਦ ਹੈ। ਰਿਪੋਰਟਸ ਮੁਤਾਬਕ, ਕਾਰਨੀ ਵੀਐਂਡ 'ਤੇ ਆਮ ਚੋਣਾਂ ਦੀ ਘੋਸ਼ਣਾ ਕਰ ਸਕਦੇ ਹਨ ਅਤੇ ਇਸ ਤੋਂ ਪਹਿਲਾਂ ਇਸ ਹਫ਼ਤੇ ਪ੍ਰੀਮੀਅਰਾਂ ਦੀ ਇੱਕ ਬੈਠਕ ਬੁਲਾਉਣਗੇ।

ਕਿਹਾ ਜਾਂਦਾ ਹੈ ਕਿ ਜੇ ਲਿਬਰਲ ਸਮੇਂ ਤੋਂ ਪਹਿਲਾਂ ਕਰਵਾਈਆਂ ਜਾਣ ਵਾਲੀਆਂ ਸੰਭਾਵਿਤ ਚੋਣਾਂ ਵਿਚ ਹਾਰ ਜਾਂਦੇ ਹਨ ਤਾਂ ਕਾਰਨੀ ਕੈਨੇਡਾ ਦੇ ਸਭ ਤੋਂ ਘੱਟ ਸਮੇਂ ਦੇ ਪ੍ਰਧਾਨ ਮੰਤਰੀ ਹੋ ਸਕਦੇ ਹਨ। ਹੁਣ ਤੱਕ ਸਾਬਕਾ ਪ੍ਰਧਾਨ ਮੰਤਰੀ ਚਾਰਲਸ ਟਪਰ ਦੇ ਨਾਮ ਇਹ ਇਤਿਹਾਸ ਰਿਹਾ ਹੈ, ਉਹ 1896 ਵਿਚ ਸਿਰਫ਼ 69 ਦਿਨਾਂ ਲਈ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਰਹੇ ਸਨ।

ਰਿਪੋਰਟਸ ਮੁਤਾਬਕ, ਜੇ ਜਲਦ ਚੋਣਾਂ ਦੀ ਘੋਸ਼ਣਾ ਹੁੰਦੀ ਹੈ ਤਾਂ ਕੈਨੇਡਾ ਵਿਚ ਅਪ੍ਰੈਲ ਦੇ ਅਖੀਰ ਜਾਂ ਮਈ ਦੇ ਸ਼ੁਰੂ ਵਿਚ ਵੋਟਾਂ ਪੈ ਸਕਦੀਆਂ ਹਨ। ਇਸ ਦਾ ਮਤਲਬ ਹੈ ਕਿ ਵੋਟਿੰਗ ਤੋਂ ਪਹਿਲਾਂ ਕਾਰਨੀ 46 ਤੋਂ 52 ਦਿਨ ਪ੍ਰਧਾਨ ਮੰਤਰੀ ਵਜੋਂ ਰਹਿ ਸਕਦੇ ਹਨ।

ਗੌਰਤਲਬ ਹੈ ਕਿ ਲਿਬਰਲਸ ਵਲੋਂ ਜਲਦ ਚੋਣਾਂ ਵਿਚ ਜਾਣ ਦੀਆਂ ਕਿਆਸਰਾਈਆਂ ਉਦੋਂ ਲਗਾਈਆਂ ਜਾ ਰਹੀਆਂ ਹਨ ਜਦੋਂ ਹਾਲ ਹੀ ਦੇ ਸਰਵਿਆਂ ਵਿਚ ਲਿਬਰਲ ਪਾਰਟੀ ਦਾ ਸਮਰਥਨ ਉਭਰਿਆ ਹੈ।