14.09C Vancouver 14.09C VancouverAug 21, 2024 3:43 PM - The Canadian Press
ਕੈਨੇਡਾ ਨੇ ਯੂਕਰੇਨ ਨੂੰ $5.7-ਮਿਲੀਅਨ ਦੀ ਮਾਨਵਤਾਵਾਦੀ ਸਹਾਇਤਾ ਦੇਣ ਦੀ ਘੋਸ਼ਣਾ ਕੀਤੀ ਹੈ, ਇੰਟਰਨੈਸ਼ਨਲ ਡਿਵੈੱਲਪਮੈਂਟ ਮਿਨਿਸਟਰ ਅਹਿਮਦ ਹੁਸੈਨ ਨੇ ਦੱਸਿਆ ਕਿ ਬੱਚਿਆਂ ਨੂੰ ਧਿਆਨ ਵਿਚ ਰੱਖਦੇ ਹੋਏ ਇਹ ਸਹਾਇਤਾ ਰਾਸ਼ੀ ਯੂਕਰੇਨ ਨੂੰ ਉਸ ਦੀਆਂ ਬੇਸਿਕ ਜ਼ਰੂਰਤਾਂ ਪੂਰੀਆਂ ਕਰਨ ਲਈ ਦਿੱਤੀ ਜਾ ਰਹੀ ਹੈ। ਉਥੇ ਹੀ, ਹੁਸੈਨ ਯੂਕਰੇਨ ਵੀ ਜਾਣਗੇ, ਜਿੱਥੇ ਉਨ੍ਹਾਂ ਵਲੋਂ ਕੀਵ ਦੇ ਪ੍ਰਮੁੱਖ ਬੱਚਿਆਂ ਦੇ ਹਸਪਤਾਲ ਦਾ ਦੌਰਾ ਕੀਤਾ ਜਾਵੇਗਾ, ਜੋ ਜੁਲਾਈ ਵਿਚ ਰੂਸ ਮਿਜ਼ਾਇਲ ਦੇ ਹਮਲੇ ਵਿਚ ਨੁਕਸਾਨਿਆ ਗਿਆ ਸੀ।
ਯੂਕਰੇਨ ਨੂੰ ਦਿੱਤੀ ਜਾ ਰਹੀ ਲੇਟਸਟ ਫੰਡਿੰਗ ਵਿਚ $2-ਮਿਲੀਅਨ ਯੂਕਰੇਨੀ ਬੱਚਿਆਂ ਦੇ ਖਾਣ-ਪੀਣ, ਪੜ੍ਹਾਈ ਅਤੇ ਮਨੋ ਸਮਾਜਿਕ ਸਹਾਇਤਾ ਲਈ ਹਨ। $3.5-ਮਿਲੀਅਨ ਇੰਟਰਨੈਸ਼ਨਲ ਮੈਡੀਕਲ ਕੋਰ ਯੂਕੇ ਨੂੰ ਦਿੱਤੇ ਜਾਣਗੇ, ਜੋ ਯੂਕਰੇਨ ਵਿਚ ਮੈਡੀਕਲ ਅਤੇ ਮੈਡੀਕਲ ਹੈਲਥ ਸਰਵਿਸ ਦੇ ਰਹੀ ਹੈ। ਇਸ ਤੋਂ ਇਲਾਵਾ ਬਾਕੀ $200,000 ਸੰਯੁਕਤ ਰਾਸ਼ਟਰ ਦੀ ਮਾਨਵਤਾਵਾਦੀ ਸੇਵਾ ਜ਼ਰੀਏ ਸਹਾਇਤਾ ਪ੍ਰਾਪਤ ਕਰਨ ਲਈ ਵੱਖਰੇ ਰੱਖੇ ਗਏ ਹਨ।
ਮਿਨਿਸਟਰ ਅਹਿਮਦ ਹੁਸੈਨ ਦੇ ਦਫ਼ਤਰ ਨੇ ਕਿਹਾ ਕਿ ਇਸ ਸਹਾਇਤਾ ਨਾਲ ਬੇਘਰ ਹੋਏ ਲੋਕਾਂ ਨੂੰ ਪਾਣੀ ਅਤੇ ਰਹਿਣ ਬਸੇਰੇ ਮੁਹੱਈਆ ਕਰਵਾਉਣ ਵਿਚ ਮਦਦ ਮਿਲੇਗੀ। ਓਟਵਾ ਦਾ ਕਹਿਣਾ ਹੈ ਕਿ ਇਸ ਘੋਸ਼ਣਾ ਨਾਲ ਇਸ ਸਾਲ ਯੂਕਰੇਨ ਲਈ ਕੈਨੇਡਾ ਵਲੋਂ ਦਿੱਤੀ ਗਈ ਮਾਨਵਤਾਵਾਦੀ ਸਹਾਇਤਾ $28.2 ਮਿਲੀਅਨ ਹੋ ਗਈ ਹੈ।
