ਕੈਨੇਡਾ ਪੋਸਟ ਨੇ ਚਿੱਠੀਆਂ ਭੇਜਣ ਵਿੱਚ ਕੀਤੀ ਕਟੌਤੀ

ਕਾਰਨੀ ਸਰਕਾਰ ਨੇ ਕੈਨੇਡਾ ਪੋਸਟ ਨੂੰ ਡੋਰ-ਟੂ-ਡੋਰ ਮੇਲ ਡਿਲਿਵਰੀ ਖਤਮ ਕਰਨ ਅਤੇ ਉਨ੍ਹਾਂ ਖੇਤਰਾਂ ਵਿਚ ਪੋਸਟ ਆਫਿਸ ਨੂੰ ਬੰਦ ਕਰਨ ਦੀ ਇਜਾਜ਼ਤ ਦੇਣ ਦਾ ਐਲਾਨ ਕੀਤਾ ਹੈ ਜਿਨ੍ਹਾਂ ਨੂੰ ਪਹਿਲਾਂ ਪੇਂਡੂ ਮੰਨਿਆ ਜਾਂਦਾ ਸੀ ਪਰ ਹੁਣ ਉਹ suburban ਹੋ ਚੁੱਕੇ ਹਨ।ਫੈਡਰਲ ਸਰਕਾਰ ਨੇ ਇਹ ਕਦਮ ਕੈਨੇਡਾ ਪੋਸਟ ਨੂੰ 2025 ਵਿਚ $1.5 ਬਿਲੀਅਨ ਦਾ ਘਾਟਾ ਪੈਣ ਦੀ ਸੰਭਾਵਨਾ ਅਤੇ ਯੂਨੀਅਨ ਤੇ ਕਾਰਪੋਰੇਸ਼ਨ ਵਿਚਕਾਰ ਕੰਟਰੈਕਟ ਨੂੰ ਲੈ ਕੇ ਜਾਰੀ ਵਿਵਾਦ ਵਿਚਕਾਰ ਉਠਾਇਆ ਹੈ।

ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਨਾਲ ਕੈਨੇਡਾ ਪੋਸਟ ਨੂੰ ਆਪਣੀ ਵਿੱਤੀ ਸਥਿਤੀ ਨੂੰ ਸਥਿਰ ਕਰਨ ਅਤੇ ਕਾਰਪੋਰੇਸ਼ਨ ਦੇ ਬਚਾਅ ਨੂੰ ਯਕੀਨੀ ਬਣਾਉਣ ਵਿਚ ਮਦਦ ਮਿਲੇਗੀ। ਇੱਕ ਸਰਕਾਰੀ ਅਧਿਕਾਰੀ ਨੇ ਕਿਹਾ ਕਿ ਤਿੰਨ-ਚੌਥਾਈ ਕੈਨੇਡੀਅਨ ਪਹਿਲਾਂ ਹੀ ਕਮਿਊਨਿਟੀ ਮੇਲ ਬਾਕਸ ਤੋਂ ਆਪਣੀ ਡਾਕ ਪ੍ਰਾਪਤ ਕਰਦੇ ਹਨ ਅਤੇ ਬਾਕੀ ਰਹਿੰਦੇ ਕੈਨੇਡੀਅਨਾਂ ਨੂੰ ਇਸ ਸਿਸਟਮ ਵਿਚ ਤਬਦੀਲ ਕਰਨ ਨਾਲ ਕਾਰਪੋਰੇਸ਼ਨ ਨੂੰ ਸਾਲਾਨਾ $400 ਮਿਲੀਅਨ ਦੀ ਬਚਤ ਹੋਵੇਗੀ।

ਇਸ ਤੋਂ ਇਲਾਵਾ ਕੈਨੇਡਾ ਪੋਸਟ ਡਾਕ ਪਹੁੰਚਾਉਣ ਦੇ ਤਰੀਕੇ ਨੂੰ ਵੀ ਐਡਜਸਟ ਕਰ ਸਕਦੀ ਹੈ ਤਾਂ ਜੋ ਗੈਰ-ਜ਼ਰੂਰੀ ਡਾਕ ਹਵਾਈ ਜਹਾਜ਼ ਦੀ ਬਜਾਏ ਜ਼ਮੀਨ ਰਾਹੀਂ ਭੇਜੀ ਜਾਵੇ ਅਤੇ ਸਾਲਾਨਾ $20 ਮਿਲੀਅਨ ਦੀ ਸੇਵਿੰਗ ਹੋ ਸਕੇ। ਫੈਡਰਲ ਸਰਕਾਰ ਇਸ ਪ੍ਰਕਿਰਿਆ ਦਾ ਵੀ ਰਿਵਿਊ ਕਰ ਰਹੀ ਹੈ ਕਿ ਡਾਕ ਟਿਕਟਾਂ ਦੀਆਂ ਕੀਮਤਾਂ ਵਧਾਉਣ ਲਈ ਇਸ ਨੂੰ ਵਧੇਰੇ ਲਚਕਦਾਰ ਕਿਵੇਂ ਕੀਤਾ ਜਾ ਸਕਦਾ ਹੈ।