16.26C Vancouver 16.26C VancouverDec 21, 2020 4:39 PM -
ਯੂ.ਕੇ. ਵਿੱਚ ਕੋਵਿਡ-19 ਦਾ ਨਵਾਂ ਰੂਪ, ਜੋ ਤੇਜ਼ੀ ਨਾਲ ਫੈਲ ਰਿਹਾ ਹੈ ਨੂੰ ਕੈਨੇਡਾ ਵਿੱਚ ਫੈਲਣ ਤੋਂ ਰੋਕਣ ਦੇ ਯਤਨਾਂ ਵਜੋਂ ਟਰੂਡੋ ਸਰਕਾਰ ਨੇ ਯੂ.ਕੇ. ਤੋਂ ਆਉਣ ਵਾਲੀਆਂ ਉਡਾਣਾਂ ਉਤੇ ਪਾਬੰਦੀ ਲਾ ਦਿੱਤੀ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਮੁਤਾਬਕ ਇਹ ਨਿਯਮ ਐਤਵਾਰ ਅਤੇ ਸੋਮਵਾਰ ਵਿਚਕਾਰ ਦੀ ਰਾਤ 12:01 ਤੋਂ ਲਾਗੂ ਕੀਤੇ ਗਏ ਹਨ।
ਟਰਾਂਸਪੋਰਟ ਕੈਨੇਡਾ ਮੁਤਾਬਕ ਹੁਣ ਯੂ.ਕੇ. ਤੋਂ ਆਉਣ ਵਾਲੀਆਂ ਸਾਰੀਆਂ ਕਮਰਸ਼ਲ, ਪ੍ਰਾਈਵੇਟ ਅਤੇ ਚਾਰਟਰਡ ਫਲਾਈਟਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ।
ਇਹ ਪਾਬੰਦੀ ਕਾਰਗੋ ਫਲਾਈਟਾਂ, ਸੁਰੱਖਿਆ ਕਾਰਨਾਂ ਲਈ ਰੁਕਣ ਵਾਲੀਆਂ ਉਡਾਣਾਂ ਅਤੇ ਉਨ੍ਹਾਂ ਫਲਾਈਟਾਂ ਉੱਤੇ ਲਾਗੂ ਨਹੀਂ ਹੁੰਦੀਆਂ ਜਿਨ੍ਹਾਂ ਨੂੰ ਤਕਨੀਕੀ ਵਜ੍ਹਾ ਕਾਰਨ ਰੁਕਣਾ ਪੈਂਦਾ ਹੈ ਅਤੇ ਮੁਸਾਫ਼ਰ ਜਹਾਜ਼ ਤੋਂ ਨਹੀਂ ਉਤਰਦੇ।
ਇਹ ਫੈਸਲਾ ‘ਇੰਸੀਡੈਂਟ ਰਿਸਪੌਂਸ ਟੀਮ’ ਦੇ ਮੈਂਬਰਾਂ ਨਾਲ ਬੰਦ ਦਰਵਾਜ਼ੇ ਦੀ ਬੈਠਕ ਤੋਂ ਬਾਅਦ ਲਿਆ ਗਿਆ ਹੈ।
ਇਸ ਮੀਟਿੰਗ ਵਿੱਚ ਸਿਹਤ, ਟ੍ਰਾਂਸਪੋਰਟ, ਵਿਦੇਸ਼ੀ ਮਾਮਲੇ, ਅੰਤਰ-ਸਰਕਾਰੀ ਮਾਮਲਿਆਂ ਅਤੇ ਜਨਤਕ ਸੁਰੱਖਿਆ ਦੇ ਮੰਤਰੀ ਮੌਜੂਦ ਸਨ।
ਬ੍ਰਿਟਿਸ਼ ਅਧਿਕਾਰੀ ਕੋਵਿਡ -19 ਦੇ ਨਵੇਂ ਦਬਾਅ ਨੂੰ ਰੋਕਣ ਲਈ ਸੰਘਰਸ਼ ਕਰ ਰਹੇ ਹਨ ਅਤੇ ਕਈ ਯੂਰਪੀਅਨ ਦੇਸ਼ਾਂ ਨੇ ਪਹਿਲਾਂ ਹੀ ਐਲਾਨ ਕੀਤਾ ਸੀ ਕਿ ਉਹ ਆਪਣੀਆਂ ਸਰਹੱਦਾਂ ਯੂ.ਕੇ. ਨਾਲ ਬੰਦ ਕਰ ਦੇਣਗੇ।
ਮਨਿਸਟਰ ਆਫ ਪਬਲਿਕ ਸੇਫਟੀ ਐਂਡ ਐਮਰਜੈਂਸੀ ਪ੍ਰੀਪੇਅਰਡਨੈੱਸ ਬਿੱਲ ਬਲੇਅਰ ਮੁਤਾਬਕ ਇਹ ਨਿਯਮ ਫ਼ਿਲਹਾਲ 72 ਘੰਟੇ ਲਈ ਲਾਗੂ ਕੀਤੇ ਗਏ ਹਨ ਅਤੇ ਲੋੜ ਪੈਣ ਤੇ ਵਧਾਏ ਵੀ ਜਾ ਸਕਦੇ ਹਨ।
