ਦੱਖਣੀ ਕੋਰੀਆ ਦੌਰੇ 'ਤੇ ਕੈਨੇਡਾ ਦੀ ਉਦਯੋਗ ਮੰਤਰੀ

ਕੈਨੇਡਾ ਦੀ ਇੰਡਸਟਰੀ ਮਿਨਿਸਟਰ ਮੇਲਾਨੀ ਜੋਲੀ ਅੱਜ ਤੋਂ ਏਸ਼ੀਆ ਦੀ ਪੰਜ ਦਿਨਾਂ ਯਾਤਰਾ 'ਤੇ ਹਨ। ਸ਼ੁੱਕਰਵਾਰ ਤੱਕ ਚੱਲਣ ਵਾਲੇ ਇਸ ਦੌਰੇ ਵਿਚ ਉਹ ਦੱਖਣੀ ਕੋਰੀਆ ਦੇ ਸਿਓਲ ਅਤੇ ਬੁਸਾਨ ਵਿਚ ਵੱਡੀਆਂ ਕੰਪਨੀਆਂ ਦੇ ਅਧਿਕਾਰੀਆਂ ਨਾਲ ਮੁਲਾਕਾਤ ਕਰਨਗੇ ਅਤੇ ਬਾਅਦ ਵਿਚ ਜਾਪਾਨ ਦੇ ਟੋਕੀਓ ਵਿਚ ਜਾਣਗੇ। ਇਹ ਦੌਰੇ ਅਜਿਹੇ ਸਮੇਂ ਹੋ ਰਹੇ ਹਨ ਜਦੋਂ ਕੈਨੇਡਾ ਗੈਰ-ਅਮਰੀਕੀ ਨਿਰਯਾਤ ਨੂੰ ਤੇਜ਼ੀ ਨਾਲ ਵਧਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।

ਜੋਲੀ ਵਲੋਂ ਇਸ ਮੌਕੇ ਆਪਣੇ ਹਮਰੁਤਬਾ ਅਤੇ ਇੰਡਸਟਰੀ ਲੀਡਰਜ਼ ਨਾਲ ਆਟੋਮੋਟਿਵ, ਬੈਟਰੀ ਨਿਰਮਾਣ, ਜਹਾਜ਼ ਨਿਰਮਾਣ ਅਤੇ ਮਾਈਨਿੰਗ ਸਮੇਤ ਕਈ ਵਿਸ਼ਿਆਂ 'ਤੇ ਗੱਲਬਾਤ ਕਰਨ ਦੀ ਉਮੀਦ ਹੈ। ਉਨ੍ਹਾਂ ਦਾ ਦੱਖਣੀ ਕੋਰੀਆ ਦੀ ਹਨਵਾ ਪਣਡੁੱਬੀ ਨਿਰਮਾਣ ਸਹੂਲਤ ਦਾ ਦੌਰਾ ਇਸ ਲਈ ਵੀ ਅਹਿਮ ਹੈ ਕਿਉਂਕਿ ਕੈਨੇਡਾ 12 ਨਵੀਆਂ ਪਣਡੁੱਬੀਆਂ ਲਈ ਸਪਲਾਇਰ ਦੀ ਭਾਲ ਕਰ ਰਿਹਾ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਵੀ ਇੱਕ ਮਹੀਨਾ ਪਹਿਲਾਂ ਇਸ ਫੈਸੀਲਿਟੀ ਦਾ ਦੌਰਾ ਕੀਤਾ ਸੀ। ਸਰਕਾਰ ਦੀ ਕੋਸ਼ਿਸ਼ ਹੈ ਕਿ ਡਿਫੈਂਸ ਨਾਲ ਸਬੰਧਤ ਸੈਕਟਰ ਵਿਚ ਵੱਧ ਤੋਂ ਵੱਧ ਨਿਵੇਸ਼ ਹਾਸਲ ਕੀਤਾ ਜਾ ਸਕੇ। ਜੋਲੀ ਨੇ ਦੱਸਿਆ ਕਿ ਉਹ ਉਦਯੋਗਿਕ ਸਬੰਧਾਂ ਨੂੰ ਅੱਗੇ ਵਧਾਉਣ ਅਤੇ ਕੈਨੇਡੀਅਨ ਕਾਰੋਬਾਰਾਂ ਲਈ ਨਵੇਂ ਮੌਕੇ ਪੈਦਾ ਕਰਨ ਦੀ ਉਮੀਦ ਨਾਲ ਦੱਖਣੀ ਕੋਰੀਆ ਵਿਚ ਹਨ।