ਕ੍ਰਿਸਟੀਆ ਫ੍ਰੀਲੈਂਡ ਨੇ ਵੈਨੇਜ਼ੁਏਲਾ ਦੇ ਚੋਣ ਨਤੀਜਿਆਂ ’ਤੇ ਜਤਾਈ ਗੰਭੀਰ ਚਿੰਤਾ

ਕੈਨੇਡਾ ਦੀ ਉੱਪ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨੇ ਵੈਨੇਜ਼ੁਏਲਾ ਦੇ ਚੋਣ ਨਤੀਜਿਆਂ ’ਤੇ ਗੰਭੀਰ ਚਿੰਤਾ ਜਤਾਈ ਹੈ, ਜਿਸ ਵਿਚ ਵਿਰੋਧੀ ਧਿਰ ਦੇ ਲੀਡਰ ਐਡਮੰਡੋ ਗੋਂਜ਼ਾਲੇਜ਼ ਅਤੇ ਸੱਤਾ ’ਤੇ ਪਹਿਲਾਂ ਤੋਂ ਕਾਬਜ਼ ਨਿਕੋਲਸ ਮਾਦੁਰੋ ਦੋਹਾਂ ਨੇ ਜਿੱਤ ਦਾ ਦਾਅਵਾ ਕੀਤਾ ਹੈ।

ਉੱਪ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕੈਨੇਡਾ ਵੈਨੇਜ਼ੁਏਲਾ ਦੇ ਚੋਣ ਨਤੀਜਿਆਂ ’ਤੇ ਪ੍ਰਤੀਕਿਰਿਆ ਦੇਣ ਲਈ ਆਪਣੇ ਸਾਂਝੇਦਾਰਾਂ ਨਾਲ ਮਿਲ ਕੇ ਕੰਮ ਕਰ ਰਿਹਾ ਹੈ।

ਦੱਸ ਦੇਈਏ ਕਿ ਟੋਰਾਂਟੋ ਵਿਚ ਪੱਤਰਕਾਰਾਂ ਵਲੋਂ ਫ੍ਰੀਲੈਂਡ ਤੋਂ ਪੁੱਛਿਆ ਗਿਆ ਸੀ ਕਿ ਕੀ ਕੈਨੇਡਾ ਵੈਨੇਜ਼ੁਏਲਾ ਦੇ ਚੋਣ ਨਤੀਜਿਆਂ ਨੂੰ ਮਾਨਤਾ ਦੇਵੇਗਾ? ਉੱਥੇ ਹੀ,ਗਲੋਬਲ ਅਫੇਅਰਜ਼ ਕੈਨੇਡਾ ਨੇ ਵੈਨੇਜ਼ੁਏਲਾ ਦੇ ਅਧਿਕਾਰੀ ਨੂੰ ਲੋਕਾਂ ਦੀਆਂ ਭਾਵਨਾਵਾਂ ਦਾ ਸਨਮਾਨ ਕਰਨ ਅਤੇ ਸਾਰੇ ਮਤਦਾਨ ਕੇਂਦਰਾਂ ਦੇ ਵਿਸਤ੍ਰਿਤ ਨਤੀਜੇ ਪ੍ਰਕਾਸ਼ਿਤ ਕਰਨ ਦੀ ਮੰਗ ਕੀਤੀ ਹੈ। ਗੌਰਤਲਬ ਹੈ ਕਿ 2013 ਵਿਚ ਜਦੋਂ ਮਾਦੁਰੋ ਨੇ ਸੱਤਾ ਸੰਭਾਲੀ ਸੀ ਉਦੋਂ ਵੈਨੇਜ਼ੁਏਲਾ ਇਸ ਖੇਤਰ ਦੀ ਸਭ ਤੋਂ ਵਿਕਸਤ ਅਰਥਵਿਵਸਥਾ ਸੀ ਪਰ ਉਸ ਤੋਂ ਬਾਅਦ ਇਹ ਦਿਨੋਂ ਦਿਨ ਖਰਾਬ ਹੁੰਦੀ ਗਈ ਅਤੇ ਮਹਿੰਗਾਈ ਤੇ ਸਮਾਜਿਕ ਅਸ਼ਾਂਤੀ ਤੋਂ ਬਚਣ ਲਈ 7.7 ਮਿਲੀਅਨ ਨੇ ਉਥੋਂ ਪਲਾਇਨ ਕੀਤਾ। ਮਾਦੁਰੋ ਨੇ ਇਸ ਮਹੀਨੇ ਚਿਤਾਵਨੀ ਦਿੱਤੀ ਸੀ ਕਿ ਜੇ ਉਹ ਚੋਣਾਂ ਵਿਚ ਵੱਡੇ ਅੰਤਰ ਨਾਲ ਨਾ ਜਿੱਤੇ ਤਾਂ ਖੂਨ-ਖਰਾਬਾ ਹੋ ਸਕਦਾ ਹੈ।