18.76C Vancouver 18.76C VancouverFeb 6, 2021 1:05 AM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਕੈਨੇਡਾ ਸਹੀ ਰਾਹ 'ਤੇ ਅੱਗੇ ਵਧ ਰਿਹਾ ਹੈ ਅਤੇ ਦੇਸ਼ ਨੂੰ ਫਾਈਜ਼ਰ ਬਾਇਓਐਨਟੈਕ ਅਤੇ ਮੌਡਰਨਾ ਵੈਕਸੀਨ ਦੀਆਂ 6 ਮਿਲੀਅਨ ਡੋਜ਼ ਮਾਰਚ ਦੇ ਅੰਤ ਤੱਕ ਹਾਸਿਲ ਹੋ ਜਾਣਗੀਆਂ।
ਉਨ੍ਹਾਂ ਕਿਹਾ ਕਿ ਦੋਨਾਂ ਕੰਪਨੀਆਂ ਦੇ ਸੀ.ਈ.ਓ. ਦੇ ਨਾਲ ਉਨ੍ਹਾਂ ਦੀ ਕਰੀਬ ਹਰ ਹਫ਼ਤੇ ਗੱਲ ਹੋ ਰਹੀ ਹੈ।
ਟਰੂਡੋ ਨੇ ਕਿਹਾ ਕਿ, ਉਨ੍ਹਾਂ ਨੂੰ ਫਿਰ ਤੋਂ ਭਰੋਸਾ ਦਵਾਇਆ ਗਿਆ ਹੈ ਕਿ ਇਹ ਖੁਰਾਕਾਂ ਕੈਨੇਡਾ ਨੂੰ ਉਪਲਬਧ ਹੋਣਗੀਆਂ।
ਅੱਜ ਟਰੂਡੋ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਦੀ ਸਰਕਾਰ ਨੇ ਉੱਤਰੀ ਮੈਨੀਟੋਬਾ ਦੇ ਇੱਕ ਫਰਸਟ ਨੇਸ਼ਨ 'ਚ ਮਿਲਟਰੀ ਸਹਾਇਤਾ ਪਹੁੰਚਾਉਣ ਦੀ ਮਨਜ਼ੂਰੀ ਦੇ ਦਿੱਤੀ ਹੈ।
ਇਲਾਕੇ 'ਚ ਮਿਲਟਰੀ ਵੱਲੋਂ ਕੋਵਿਡ-19 ਪੈਂਡੈਮਿਕ ਵਿਚਾਲੇ ਵੱਖ-ਵੱਖ ਸੇਵਾਵਾਂ ਪ੍ਰਦਾਨ ਕੀਤੀਆਂ ਜਾਣਗੀਆਂ।
ਕੋਵੈਕਸ ਉਪਰਾਲੇ 'ਚ ਕੈਨੇਡਾ ਇੱਕ ਵੱਡਾ ਡੋਨਰ: ਪ੍ਰਧਾਨ ਮੰਤਰੀ ਟਰੂਡੋ
ਵਿਸ਼ਵ ਦੇ 2 ਵੱਡੇ ਐਂਟੀ-ਪਾਵਰਟੀ ਸੰਗਠਨਾਂ ਨੇ ਕੈਨੇਡਾ ਵੱਲੋਂ ਕੋਵਿਡ-19 ਵੈਕਸੀਨ ਹਾਸਿਲ ਕਰਨ ਲਈ ਅੰਤਰਰਾਸ਼ਟਰੀ ਫੰਡ ਦੀ ਵਰਤੋਂ ਕਰਨ ਦੀ ਆਲੋਚਨਾ ਕੀਤੀ ਹੈ।
ਹਾਲਾਂਕਿ ਅੱਜ ਔਟਵਾ 'ਚ ਗੱਲਬਾਤ ਕਰਦਿਆਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਿਹਾ ਕਿ 'ਕੋਵੈਕਸ' ਉਪਰਾਲੇ 'ਚ ਕੈਨੇਡਾ ਇੱਕ ਵੱਡਾ ਡੋਨਰ ਹੈ।
ਇਹ ਉਪਰਾਲਾ ਵਰਲਡ ਹੈਲਥ ਔਰਗੇਨਾਈਜ਼ੇਸ਼ਨ ਦੇ ਹੇਠ ਇੱਕ ਨਵੀਂ ਅੰਤਰਰਾਸ਼ਟਰੀ ਪਾਰਟਨਰਸ਼ਿਪ ਦਰਸ਼ਾਉਂਦਾ ਹੈ।
ਟਰੂਡੋ ਨੇ ਕਿਹਾ ਕਿ ਜਦ ਕੋਈ ਦੇਸ਼ ਇਸ 'ਚ ਡੋਨੇਟ ਕਰਦਾ ਹੈ ਤਾਂ ਉਸ 'ਚ ਅੱਧਾ ਘਟ ਅਮੀਰ ਦੇਸ਼ਾਂ ਦੀਆਂ ਖੁਰਾਕਾਂ ਲਈ ਹੁੰਦਾ ਹੈ ਅਤੇ ਅੱਧਾ ਆਪਣੇ ਖੁਦ ਲਈ ਖੁਰਾਕਾਂ ਹਾਸਿਲ ਕਰਨ ਲਈ ਹੁੰਦਾ ਹੈ।
ਇਹ ਟਿੱਪਣੀ ਉਸ ਵੇਲੇ ਕੀਤੀ ਗਈ ਹੈ ਜਦ ਔਕਸਫੈਮ ਕੈਨੇਡਾ (Oxfam Canada) ਅਤੇ ਵਨ ਕੈਂਪੇਨ (ONE Campaign) ਨੇ ਕਿਹਾ ਹੈ ਕਿ ਫੈਡਰਲ ਸਰਕਾਰ ਦਾ ਇਸ ਉਪਰਾਲੇ ਆਸਰੇ 1.9 ਮਿਲੀਅਨ ਡੋਜ਼ ਹਾਸਿਲ ਕਰਨਾ ਸਹੀ ਨਹੀਂ ਹੈ।
ਐਸਟ੍ਰਾਜ਼ੈਨਕਾ ਦਾ ਪੂਰਾ ਵੈਕਸੀਨ ਆਰਡਰ 1 ਜੁਲਾਈ ਤੋਂ ਪਹਿਲਾਂ ਪਹੁੰਚਣ ਦੀ ਆਸ
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਦੱਸਿਆ ਕਿ ਕੈਨੇਡਾ ਕੋਲ ਐਸਟ੍ਰਾਜ਼ੈਨਕਾ ਦੀ ਕੋਵਿਡ-19 ਵੈਕਸੀਨ ਦੇ ਪੂਰੇ ਆਰਡਰ ਦੇ 1 ਜੁਲਾਈ ਤੋਂ ਪਹਿਲਾਂ ਪਹੁੰਚ ਜਾਣ ਦੀ ਆਸ ਹੈ।
ਹਾਲਾਂਕਿ ਅਜੇ ਇਸ ਵੈਕਸੀਨ ਨੂੰ ਹੈਲਥ ਕੈਨੇਡਾ ਦੀ ਮਨਜ਼ੂਰੀ ਹਾਸਿਲ ਨਹੀਂ ਹੈ ਪਰ ਅਗਲੇ ਹਫ਼ਤੇ ਤੱਕ ਇਸ ਵੈਕਸੀਨ ਨੂੰ ਮਨਜ਼ੂਰੀ ਦੇਣ ਦੀ ਗੱਲ ਆਖੀ ਜਾ ਰਹੀ ਹੈ।
ਕੈਨੇਡਾ ਨੂੰ ਫਾਈਜ਼ਰ ਅਤੇ ਮੌਡਰਨਾ ਦੀ ਵੈਕਸੀਨ 'ਚ ਡਿਲੀਵਰੀ ਸੰਬੰਧੀ ਵਿਘਨ ਦਾ ਸਾਹਮਣਾ ਕਰਨਾ ਪਿਆ ਹੈ।
ਹਾਲਾਂਕਿ ਟਰੂਡੋ ਨੇ ਸਰਕਾਰ ਦੇ ਇਹਨਾਂ ਵੈਕਸੀਨਾਂ ਨਾਲ ਖੜ੍ਹਨ ਦੇ ਫੈਸਲੇ ਦਾ ਬਚਾਅ ਵੀ ਕੀਤਾ ਹੈ।
ਉਨ੍ਹਾਂ ਕਿਹਾ ਕਿ, ਸ਼ੁਰੂ ਤੋਂ ਹੀ ਇਹ ਅੰਦਾਜ਼ਾ ਸੀ ਕਿ ਡਿਲੀਵਰੀ ਦੇ ਸ਼ੁਰੂਆਤੀ ਦੌਰ 'ਚ ਕੁਝ ਵਿਘਨਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
