ਗੈਬਰੀਐਲਾ ਡੈਬਰੌਸਕੀ ਤੇ ਰੁਟਲਿਫ ਦੀ ਜੋੜੀ ਨੇ ਜਿੱਤਿਆ ਯੂ.ਐਸ. ਓਪਨ ਖਿਤਾਬ

ਕੈਨੇਡਾ ਦੀ ਟੈਨਿਸ ਖਿਡਾਰਨ ਗੈਬਰੀਅਲਾ ਡੈਬਰੌਸਕੀ ਨੇ ਆਪਣੀ ਨਿਊਜ਼ੀਲੈਂਡ ਦੀ ਜੋੜੀਦਾਰ ਐਰਿਨ ਰੂਟਲਿਫ ਨਾਲ ਮਿਲ ਕੇ ਯੂ.ਐਸ. ਓਪਨ ਗਰੈਂਡ ਸਲੈਮ ਖਿਤਾਬ ਜਿੱਤ ਲਿਆ ਹੈ।

ਕਨੇਡੀਅਨ ਖਿਡਾਰਨ ਨੇ ਆਪਣੀ ਜੋੜੀਦਾਰ ਨਾਲ ਮਿਲ ਕੇ ਔਰਤਾਂ ਦੇ ਡਬਲਸ ਵਰਗ ਵਿੱਚ ਖਿਤਾਬੀ ਮੁਕਾਬਲਾ ਸਿੱਧੇ ਸੈਟਾਂ 'ਚ ਜਿੱਤਿਆ।

ਦੋਵਾਂ ਨੇ ਮਿਲ ਕੇ ਟੇਲਰ ਟਾਊਨਸੈਂਡ ਅਤੇ ਕੈਟਰੀਨਾ ਸੀਨੀਆਕੋਵਾ ਦੀ ਜੋੜੀ ਨੂੰ 6-4, 6-4 ਦੇ ਫਰਕ ਨਾਲ ਮਾਤ ਦਿੱਤੀ।

ਇਸ ਤੋਂ ਪਹਿਲਾਂ ਗੈਬਰੀਐਲਾ ਡੈਬਰੌਸਕੀ ਸਾਲ 2023 'ਚ ਵੀ ਯੂ.ਐਸ. ਓਪਨ ਖਿਤਾਬ ਆਪਣੇ ਨਾਮ ਕਰ ਚੁੱਕੀ ਹੈ। ਸਰੀ 'ਚ ਨਿਊਟਨ ਟੈਨਿਸ ਕਲੱਬ ਨਾਲ ਸੰਬੰਧਤ ਪਵਨ ਸਾਹਨੀ ਦਾ ਕਹਿਣਾ ਹੈ ਕਿ ਇਹ ਜਿੱਤ ਕਨੇਡੀਅਨ ਟੈਨਿਸ ਲਈ ਹੁਲਾਰਾ ਪ੍ਰਦਾਨ ਕਰਨ ਵਾਲੀ ਹੈ ਕਿਉਂਕਿ ਇੱਕ ਪਾਸੇ ਕੁਝ ਹੀ ਹਫਤੇ ਪਹਿਲਾਂ ਯੁਵਾ ਖਿਡਾਰਨ ਵਿਕਟੋਰੀਆ ਬੋਕੋ ਨੇ ਕਨੇਡੀਅਨ ਓਪਨ ਖਿਤਾਬ ਆਪਣੇ ਨਾਮ ਕੀਤਾ ਸੀ ਅਤੇ ਹੁਣ ਕੈਨੇਡਾ ਦੀ ਸੀਨੀਅਰ ਖਿਡਾਰਨ ਦੇ ਗਰੈਂਡ ਸਲੈਮ ਖਿਤਾਬ ਜਿੱਤਣ ਨਾਲ ਦੇਸ਼ ਦੇ ਟੈਨਿਸ ਖਿਡਾਰੀ ਉਤਸ਼ਾਹਤ ਮਹਿਸੂਸ ਕਰਨਗੇ।

ਉੱਧਰ ਟੈਨਿਸ ਕੈਨੇਡਾ ਨੇ ਵੀ ਟਵੀਟ ਕਰ ਜੇਤੂ ਜੋੜੀ ਨੂੰ ਵਧਾਈ ਦਿੱਤੀ।