ਟੋਕਿਓ ਓਲੰਪਿਕਸ ਦੇ ਚੌਥੇ ਦਿਨ ਕੈਨੇਡਾ ਨੇ ਜਿੱਤੇ ਚਾਰ ਮੈਡਲ; ਮੌਡ ਸ਼ੈਰਨ ਨੇ ਜਿੱਤਿਆ ਗੋਲਡ

ਕੈਨੇਡਾ ਨੂੰ ਟੋਕੀਓ ਖੇਡਾਂ ਦੇ ਚੌਥੇ ਦਿਨ 4 ਮੈਡਲ ਹਾਸਿਲ ਹੋਏ। ਇਸ 'ਚ ਇੱਕ ਗੋਲਡ ਮੈਡਲ, ਇੱਕ ਸਿਲਵਰ ਮੈਡਲ ਅਤੇ 2 ਕਾਂਸੀ ਦੇ ਤਗਮੇ ਸ਼ਾਮਿਲ ਸਨ।

ਮੌਡ ਸ਼ੈਰਨ ਨੇ ਜਿੱਤਿਆ ਗੋਲਡ

ਟੋਕਿਓ ਓਲੰਪਿਕਸ ਵਿੱਚ ਕੈਨੇਡਾ ਦੀ ਝੋਲੀ ਦੂਜਾ ਗੋਲਡ ਮੈਡਲ ਪੈ ਗਿਆ ਹੈ। ਵੇਟਲਿਫਟਿੰਗ 'ਚ ਔਰਤਾਂ ਦੀ 64kg ਕੈਟੇਗਰੀ 'ਚ ਮੌਡ ਸ਼ੈਰਨ ਨੇ ਕੈਨੇਡਾ ਦੀ ਝੋਲੀ ਸੋਨ ਤਗਮਾ ਪਾਇਆ। ਮੌਡ ਸ਼ੈਰਨ ਨੇ ਸਨੈਚ ਵਿੱਚ 105kg ਅਤੇ ਕਲੀਨ ਐਂਡ ਜਰਕ ਵਿੱਚ 131kg ਦੀ ਪਰਫਾਰਮੈਂਸ ਨਾਲ ਗੋਲਡ ਮੈਡਲ ਜਿੱਤਿਆ। ਉਹ ਕਿਊਬੈਕ 'ਚ ਰਿਮੋਸਕੀ ਦੇ ਇਲਾਕੇ ਤੋਂ ਵਾਸਤਾ ਰੱਖਦੀ ਹੈ।

ਕਾਇਲੀ ਮਾਸ ਨੇ ਜਿੱਤਿਆ ਸਿਲਵਰ ਮੈਡਲ

ਕੈਨੇਡਾ ਨੂੰ ਤੈਰਾਕੀ 'ਚ ਇੱਕ ਹੋਰ ਮੈਡਲ ਹਾਸਿਲ ਹੋ ਗਿਆ ਹੈ। ਕਾਇਲੀ ਮਾਸ ਨੇ 100 ਮੀਟਰ ਬੈਕਸਟਰੋਕ ਈਵੈਂਟ 'ਚ ਸਿਲਵਰ ਮੈਡਲ ਜਿੱਤ ਲਿਆ ਹੈ। ਇਸੇ ਈਵੈਂਟ 'ਚ ਉਨ੍ਹਾਂ ਰੀਓ ਓਲੰਪਿਕਸ ਵਿੱਚ ਕਾਂਸੀ ਦਾ ਤਗਮਾ ਜਿੱਤਿਆ ਸੀ। 25 ਸਾਲਾ ਕਾਇਲੀ ਮਾਸ ਨੇ 57.72ਸੈਕਿੰਡਸ ਦੇ ਸਮੇਂ ਨਾਲ ਇਸ ਈਵੈਂਟ 'ਚ ਸਿਲਵਰ ਮੈਡਲ ਜਿੱਤਿਆ ਹੈ। ਆਸਟ੍ਰੇਲੀਆ ਦੀ ਕਾਇਲੀ ਮੈਕੋਵਨ ਨੂੰ ਇਸ ਈਵੈਂਟ 'ਚ ਗੋਲਡ ਮੈਡਲ ਹਾਸਿਲ ਹੋਇਆ ਹੈ। ਮੈਕੋਵਨ ਨੇ 57.47 ਸੈਕਿੰਡਸ ਦੇ ਸਮੇਂ ਨਾਲ ਨਵਾਂ ਓਲੰਪਿਕ ਰਿਕਾਰਡ ਸਥਾਪਿਤ ਕਰਦੇ ਹੋਏ ਗੋਲਡ ਮੈਡਲ ਜਿੱਤਿਆ।

ਸੌਫਟਬਾਲ ਟੀਮ ਨੇ ਮੈਕਸੀਕੋ ਨੂੰ ਦਿੱਤੀ ਮਾਤ

ਕੈਨੇਡਾ ਦੀ ਸੌਫਟਬਾਲ ਟੀਮ ਨੇ ਓਲੰਪਿਕਸ 'ਚ ਕਾਂਸੀ ਦਾ ਤਗਮਾ ਜਿੱਤ ਲਿਆ ਹੈ। ਇਹ ਕੈਨੇਡਾ ਦੀ ਔਰਤਾਂ ਦੀ ਟੀਮ ਲਈ ਪਹਿਲਾ ਮੌਕਾ ਹੈ, ਜਦ ਉਨ੍ਹਾਂ ਸੌਫਟਬਾਲ 'ਚ ਓਲੰਪਿਕ ਖੇਡਾਂ 'ਚ ਕੋਈ ਤਗਮਾ ਜਿੱਤਿਆ ਹੋਵੇ।

ਜੂਡੋ 'ਚ ਮਿਲੀ ਕਾਮਯਾਬੀ

ਕੈਨੇਡਾ ਨੂੰ ਟੋਕੀਓ ਖੇਡਾਂ ਦੇ ਚੌਥੇ ਦਿਨ ਜੂਡੋ 'ਚ ਕਾਮਯਾਬੀ ਹਾਸਿਲ ਹੋਈ। 65kg ਕੈਟੇਗਰੀ 'ਚ ਕੈਥਰੀਨ ਬੋਸ਼ਮੈਨ ਪਿਨਾਰਡ ਨੇ ਕਾਂਸੀ ਦਾ ਤਗਮਾ ਜਿੱਤਿਆ। ਇਹ ਕੈਨੇਡਾ ਲਈ ਜੂਡੋ ਦੀ ਖੇਡ 'ਚ ਔਰਤਾਂ ਦੀ ਕੈਟੇਗਰੀ 'ਚ ਓਲੰਪਿਕ ਇਤਿਹਾਸ 'ਚ ਦੂਜਾ ਮੈਡਲ ਹੈ। ਇਸ ਤੋਂ ਪਹਿਲਾਂ ਇਸ ਓਲੰਪਿਕਸ ਵਿੱਚ 57kg ਕੈਟੇਗਰੀ 'ਚ ਜੈਸਿਕਾ ਕਲਿਮਕੈਟ ਨੇ ਕਾਂਸੀ ਦਾ ਤਗਮਾ ਜਿੱਤਿਆ ਸੀ।