ਕੈਨੇਡਾ ਦੀ ਬੇਰਜ਼ੁਗਾਰੀ ਦਰ 6.8 ਫੀਸਦੀ ਹੋਈ

ਕੈਨੇਡਾ ਦੀ ਬੇਰਜ਼ੁਗਾਰੀ ਦਰ 6.8 ਹੋ ਗਈ ਹੈ, ਇਹ ਜਨਵਰੀ 2017 ਤੋਂ ਬਾਅਦ ਇਸ ਦਾ ਸਭ ਤੋਂ ਉੱਚਾ ਪੱਧਰ ਹੈ। ਇਸ ਅੰਕੜੇ ਨੇ ਬੈਂਕ ਆਫ ਕੈਨੇਡਾ ਵਲੋਂ ਵਿਆਜ ਦਰਾਂ ਵਿਚ ਵੱਡੀ ਕਟੌਤੀ ਦੀ ਸੰਭਾਵਨਾ ਨੂੰ ਫਿਰ ਤੋਂ ਵਧਾ ਦਿੱਤਾ ਹੈ।

ਸਟੈਟਿਸਟਿਕਸ ਕੈਨੇਡਾ ਦੀ ਰਿਪੋਰਟ ਮੁਤਾਬਕ, ਨਵੰਬਰ ਵਿਚ ਕੈਨੇਡੀਅਨ ਰੁਜ਼ਗਾਰਦਾਤਾ ਨੇ ਸਮੂਹਿਕ ਰੂਪ ਤੋਂ ਲਗਭਗ 51,000 ਨੌਕਰੀਆਂ ਜੋੜੀਆਂ ਪਰ ਜ਼ਿਆਦਾ ਲੋਕਾਂ ਦੇ ਕੰਮ ਦੀ ਤਲਾਸ਼ ਕਰਨ ਕਾਰਨ ਬੇਰੁਜ਼ਗਾਰੀ ਦਰ ਵਿਚ ਵਾਧਾ ਹੋਇਆ ਹੈ। ਅਕਤੂਬਰ ਦੇ ਮੁਕਾਬਲੇ ਨਵੰਬਰ ਵਿਚ ਬੇਰੁਜ਼ਗਾਰੀ ਦਰ 0.3 ਫੀਸਦੀ ਵਧੀ ਹੈ, ਜੋ ਹੁਣ 6.8 ਫੀਸਦੀ ਹੈ।

ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਪਿਛਲੇ ਮਹੀਨੇ ਤਕਰੀਬਨ 87,000 ਲੋਕ ਨਵੇਂ ਬੇਰੁਜ਼ਗਾਰ ਸਨ। ਗੌਰਤਲਬ ਹੈ ਕਿ ਨਵੰਬਰ ਮਹੀਨੇ ਦੇ ਰੁਜ਼ਗਾਰ ਸਬੰਧੀ ਅੰਕੜੇ 11 ਦਸੰਬਰ ਨੂੰ ਬੈਂਕ ਆਫ ਕੈਨੇਡਾ ਵਲੋਂ ਵਿਆਜ ਦਰਾਂ ’ਤੇ ਫੈਸਲਾ ਲੈਣ ਤੋਂ ਪਹਿਲਾਂ ਜਾਰੀ ਹੋਇਆ ਅੰਤਿਮ ਪ੍ਰਮੁੱਖ ਆਰਥਿਕ ਅੰਕੜਾ ਹੈ।

ਮਾਹਰਾਂ ਵਲੋਂ ਵਿਆਜ ਦਰ ਵਿਚ ਕਟੌਤੀ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ ਪਰ ਇਹ ਕਿੰਨੀ ਹੋ ਸਕਦੀ ਹੈ ਇਸ ਨੂੰ ਲੈ ਕੇ ਕੋਈ ਇੱਕ ਰਾਇ ਨਹੀਂ ਹੈ।