ਕੈਨੇਡੀਅਨਾਂ ਬੈਂਕਾਂ ਨੂੰ ਟਰੇਡ ਵਾਰ ਦੇ ਚੱਲਦੇ ਵਿਆਜ ਦਰਾਂ ਵਿਚ ਤੇਜ਼ੀ ਨਾਲ ਕਟੌਤੀ ਦੀ ਉਮੀਦ

ਕੈਨੇਡਾ ਦੇ ਦੋ ਸਭ ਤੋਂ ਵੱਡੇ ਬੈਂਕਾਂ ਦਾ ਕਹਿਣਾ ਹੈ ਕਿ ਟਰੇਡ ਵਾਰ ਦੇ ਚੱਲਦੇ ਵਿਆਜ ਦਰਾਂ ਵਿਚ ਤੇਜ਼ੀ ਨਾਲ ਕਟੌਤੀ ਹੋ ਸਕਦੀ ਹੈ। ਰਾਇਲ ਬੈਂਕ ਆਫ਼ ਕੈਨੇਡਾ ਅਤੇ ਬੈਂਕ ਆਫ ਮਾਂਟਰੀਅਲ ਨੇ ਇਹ ਸੰਭਾਵਨਾ ਜਤਾਈ ਹੈ, ਉਨ੍ਹਾਂ ਦਾ ਕਹਿਣਾ ਹੈ ਕਿ ਅਮਰੀਕਾ ਨਾਲ ਵਪਾਰ ਯੁੱਧ ਦੇ ਨਤੀਜੇ ਕੈਨੇਡੀਅਨ ਆਰਥਿਕਤਾ 'ਤੇ ਦਿਖਾਈ ਦੇਣਗੇ, ਜੋ ਬੈਂਕ ਆਫ਼ ਕੈਨੇਡਾ ਨੂੰ ਵਿਆਜ ਦਰਾਂ ਵਿਚ ਕਟੌਤੀ ਜਾਰੀ ਰੱਖਣ ਲਈ ਮਜਬੂਰ ਕਰ ਸਕਦਾ ਹੈ।

ਬੈਂਕ ਆਫ ਮਾਂਟਰੀਅਲ ਦੇ ਮੁੱਖ ਅਰਥਸ਼ਾਸਤਰੀ ਡਗਲਸ ਪੋਰਟਰ ਨੇ ਕਿਹਾ ਕਿ ਜੁਲਾਈ ਤੱਕ ਹੋਣ ਵਾਲੀਆਂ ਸੈਂਟਰਲ ਬੈਂਕ ਦੀਆਂ ਅਗਲੀਆਂ ਚਾਰ ਬੈਠਕਾਂ ਵਿਚ ਹਰ ਵਾਰ 25 ਅਧਾਰ ਬਿੰਦੂ ਦੀ ਕਟੌਤੀ ਹੋਣ ਦੀ ਸੰਭਾਵਨਾ ਹੈ, ਜਿਸ ਨਾਲ ਪ੍ਰਮੁੱਖ ਵਿਆਜ ਦਰ ਘੱਟ ਕੇ 2 ਫੀਸਦੀ 'ਤੇ ਆ ਜਾਵੇਗੀ।

ਰਾਇਲ ਬੈਂਕ ਆਫ਼ ਕੈਨੇਡਾ ਅਤੇ ਬੈਂਕ ਆਫ ਮਾਂਟਰੀਅਲ ਨੇ ਕਿਹਾ ਕਿ ਟਰੇਡ ਵਾਰ ਤੋਂ ਪਹਿਲਾਂ ਉਨ੍ਹਾਂ ਨੂੰ ਸਿਰਫ ਅਪ੍ਰੈਲ ਅਤੇ ਜੁਲਾਈ ਵਿਚ ਦੋ ਵਾਰ ਦਰਾਂ ਵਿੱਚ ਕਟੌਤੀ ਦੀ ਉਮੀਦ ਸੀ ਪਰ ਹੁਣ ਅਸੀਂ ਉਮੀਦ ਕਰਦੇ ਹਾਂ ਕਿ ਟੈਰਿਫ ਜਿੰਨੇ ਲੰਬੇ ਸਮੇਂ ਤੱਕ ਲਾਗੂ ਰਹਿਣਗੇ, ਵਿਆਜ ਦਰਾਂ ਵਿੱਚ ਗਿਰਾਵਟ ਦੀ ਸੰਭਾਵਨਾ ਓਨੀ ਹੀ ਜ਼ਿਆਦਾ ਹੋਵੇਗੀ। ਗੌਰਤਲਬ ਹੈ ਕਿ ਸੈਂਟਰਲ ਬੈਂਕ ਵਲੋਂ ਆਪਣਾ ਅਗਲਾ ਵਿਆਜ ਦਰਾਂ ਬਾਰੇ ਫੈਸਲਾ ਬੁੱਧਵਾਰ 12 ਮਾਰਚ ਨੂੰ ਲਿਆ ਜਾਵੇਗਾ।