ਰੂਸ ਨੇ ਵੱਡੇ ਪੈਮਾਨੇ ’ਤੇ ਕੈਦੀਆਂ ਦੀ ਅਦਲਾ-ਬਦਲੀ ਤਹਿਤ ਕੀਤਾ ਰਿਹਾਅ

ਕੈਨੇਡੀਅਨ ਅਮਰੀਕਨ ਸਿਟੀਜ਼ਨ ਪਾਲ ਵੀਲ੍ਹਨ ਅਤੇ ਵਾਲ ਸਟਰੀਟ ਦੇ ਪੱਤਰਕਾਰ ਇਵਾਨ ਗਰਸ਼ਕੋਵਿਚ ਨੂੰ ਰੂਸ ਨੇ ਵੱਡੇ ਪੈਮਾਨੇ ’ਤੇ ਕੈਦੀਆਂ ਦੀ ਅਦਲਾ-ਬਦਲੀ ਤਹਿਤ ਰਿਹਾਅ ਕਰ ਦਿੱਤਾ ਹੈ। ਇਸ ਕੈਦੀਆਂ ਦੀ ਅਦਲਾ-ਬਦਲੀ ਡੀਲ ਵਿਚ ਜਰਮਨੀ, ਪੋਲੈਂਡ, ਸਲੋਵੇਨੀਆ, ਨਾਰਵੇ ਅਤੇ ਬੇਲਾਰੂਸ ਵੀ ਸ਼ਾਮਲ ਸਨ। ਇਸ ਦੀ ਪੁਸ਼ਟੀ ਤੁਰਕੀ ਨੇ ਕੀਤੀ, ਜਿਸ ਦਾ ਕਹਿਣਾ ਹੈ ਕਿ ਇਸ ਡੀਲ ਲਈ ਉਸ ਨੇ ਅਹਿਮ ਭੂਮਿਕਾ ਨਿਭਾਈ।

ਕੈਨੇਡੀਅਨ ਅਮਰੀਕਨ ਸਿਟੀਜ਼ਨ ਅਤੇ ਵਾਲ ਸਟਰੀਟ ਜਨਰਲ ਦੇ ਪੱਤਰਕਾਰ ਨੂੰ ਰੂਸ ਨੇ ਜਾਸੂਸੀ ਦੇ ਦੋਸ਼ਾਂ ਵਿਚ ਜੇਲ੍ਹ ਵਿਚ ਬੰਦ ਕੀਤਾ ਸੀ। ਇਸ ਡੀਲ ਵਿਚ ਕੁੱਲ ਮਿਲਾ ਕੇ 26 ਕੈਦੀ ਅਦਲਾ-ਬਦਲੀ ਕੀਤੇ ਗਏ ਹਨ, ਜਿਨ੍ਹਾਂ ਵਿਚ ਦੋ ਨਾਬਾਲਗਾਂ ਸਮੇਤ 10 ਕੈਦੀ ਰੂਸ ਨੂੰ ਸੌਂਪੇ ਗਏ, 13 ਕੈਦੀ ਜਰਮਨੀ ਨੂੰ ਅਤੇ ਤਿੰਨ ਕੈਦੀ ਅਮਰੀਕਾ ਨੂੰ ਸੌਂਪੇ ਗਏ ਹਨ।

54 ਸਾਲਾ ਕੈਨੇਡੀਅਨ ਅਮਰੀਕਨ ਸਿਟੀਜ਼ਨ ਪਾਲ ਵੀਲ੍ਹਨ ਨੂੰ ਰੂਸ ਵਿਚ 2018 ਵਿਚ ਗ੍ਰਿਫਤਾਰ ਕੀਤਾ ਗਿਆ ਸੀ ਅਤੇ ਦੋ ਸਾਲਾਂ ਬਾਅਦ ਜਾਸੂਸੀ ਦਾ ਦੋਸ਼ੀ ਠਹਿਰਾਉਂਦੇ ਹੋਏ ਉਨ੍ਹਾਂ ਨੂੰ 16 ਸਾਲ ਦੀ ਸਜ਼ਾ ਸੁਣਾਈ ਗਈ ਸੀ। ਵੀਲ੍ਹਨ ਔਟਵਾ ਵਿਚ ਜਨਮੇ ਸਨ, ਉਨ੍ਹਾਂ ਦੇ ਮਾਂ-ਪਿਓ ਬ੍ਰਿਟਿਸ਼ ਸਨ। ਰੂਸ ਵਿਚ ਗ੍ਰਿਫਤਾਰੀ ਤੋਂ ਪਹਿਲਾਂ ਉਹ ਯੂ.ਐੱਸ.ਮਰੀਨ ਵਿਚ ਕੰਮ ਕਰਦੇ ਸਨ।