ਕੈਨੇਡਾ ਸਰਕਾਰ ਨੇ ਹਿਕਵਿਜ਼ਨ ਕੰਪਨੀ ਨੂੰ ਕੈਨੇਡੀਅਨ ਕਾਰੋਬਾਰ ਬੰਦ ਕਰਨ ਤੇ ਦੇਸ਼ ਛੱਡਣ ਦਾ ਦਿੱਤਾ ਆਦੇਸ਼

ਕੈਨੇਡਾ ਸਰਕਾਰ ਨੇ ਚੀਨ ਦੀ ਸੀ.ਸੀ.ਟੀ.ਵੀ. ਕੰਪਨੀ ਹਿਕਵਿਜ਼ਨ ਨੂੰ ਆਪਣਾ ਕੈਨੇਡੀਅਨ ਕਾਰੋਬਾਰ ਬੰਦ ਕਰਨ ਤੇ ਦੇਸ਼ ਛੱਡਣ ਦਾ ਆਦੇਸ਼ ਦਿੱਤਾ ਹੈ। ਇੰਡਸਟਰੀ ਮਿਨਿਸਟਰ ਮੇਲਾਨੀ ਜੌਲੀ ਨੇ ਕਿਹਾ ਕਿ ਸਰਕਾਰ ਨੇ ਸੁਰੱਖਿਆ ਅਤੇ ਖੁਫੀਆ ਵਿਭਾਗ ਵਲੋਂ ਉਪਲੱਬਧ ਕਰਾਈ ਗਈ ਜਾਣਕਾਰੀ ਅਤੇ ਸਬੂਤਾਂ 'ਤੇ ਗੌਰ ਕੀਤਾ ਅਤੇ ਇਸ ਦੇ ਆਧਾਰ 'ਤੇ ਇਹ ਫੈਸਲਾ ਕੀਤਾ ਕਿ ਕੰਪਨੀ ਨੂੰ ਕੈਨੇਡਾ ਵਿਚ ਕੰਮ ਕਰਦੇ ਰਹਿਣ ਦੀ ਇਜਾਜ਼ਤ ਦੇਣਾ ਦੇਸ਼ ਦੀ ਰਾਸ਼ਟਰੀ ਸੁਰੱਖਿਆ ਲਈ ਖ਼ਤਰਾ ਹੈ।

ਕੈਨੇਡਾ ਵਿਚ ਹਿਕਵਿਜ਼ਨ ਦੀ subsidiary 2014 ਤੋਂ ਕੰਮ ਕਰ ਰਹੀ ਸੀ। ਇਸ ਨੂੰ ਅਮਰੀਕਾ, ਆਸਟ੍ਰੇਲੀਆ ਤੇ ਯੂ.ਕੇ. ਵਿਚ ਵੀ ਪਾਬੰਦੀਆਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਹਿਕਵਿਜ਼ਨ ਨੇ ਕਿਹਾ ਕਿ ਉਹ ਕੈਨੇਡਾ ਸਰਕਾਰ ਦੇ ਫੈਸਲੇ ਨਾਲ ਸਖ਼ਤ ਅਸਹਿਮਤ ਹੈ ਅਤੇ ਇਸ ਕਦਮ ਨੂੰ ਡੂੰਘੀ ਚਿੰਤਾ ਨਾਲ ਦੇਖਦੀ ਹੈ। ਕੰਪਨੀ ਨੇ ਦੋਸ਼ ਲਾਇਆ ਕਿ ਫੈਸਲੇ ਵਿਚ ਨਿਰਪੱਖਤਾ ਤੇ ਪਾਰਦਰਸ਼ਤਾ ਨਹੀਂ ਵਰਤੀ ਗਈ।

ਜੌਲੀ ਨੇ ਕਿਹਾ ਕਿ ਉਨ੍ਹਾਂ ਫੈਡਰਲ ਸਰਕਾਰ, ਇਸ ਦੇ ਵਿਭਾਗਾਂ, ਏਜੰਸੀਆਂ ਅਤੇ ਕ੍ਰਾਊਨ ਕਾਰਪੋਰੇਸ਼ਨਾਂ ਨੂੰ ਹਿਕਵਿਜ਼ਨ ਦੇ ਉਪਕਰਣ ਇਸਤੇਮਾਲ ਨਾ ਕਰਨ ਅਤੇ ਨਾ ਹੀ ਖਰੀਦਣ ਲਈ ਕਿਹਾ ਹੈ। ਉਨ੍ਹਾਂ ਕਿਹਾ ਮੈਂ ਕੈਨੇਡੀਅਨਾਂ ਨੂੰ ਵੀ ਇਸ ਵੱਲ ਧਿਆਨ ਦੇਣ ਅਤੇ ਉਸ ਅਨੁਸਾਰ ਆਪਣੇ ਫੈਸਲੇ ਲੈਣ ਦੀ ਜ਼ੋਰਦਾਰ ਅਪੀਲ ਕਰਦੀ ਹਾਂ।