19.4C Vancouver 19.4C VancouverJul 26, 2021 7:31 PM -
ਕੈਨੇਡਾ ਦੀ ਔਰਤਾਂ ਦੀ ਤੈਰਾਕੀ ਟੀਮ ਨੇ ਟੋਕਿਓ ਓਲੰਪਿਕਸ ਵਿੱਚ ਦਮਦਾਰ ਆਗਾਜ਼ ਕੀਤਾ ਹੈ।
ਐਤਵਾਰ ਨੂੰ ਕੈਨੇਡਾ ਦੀ ਤੈਰਾਕ ਮੈਗੀ ਮੈਕਨੀਲ ਨੇ ਕੈਨੇਡਾ ਦੀ ਝੋਲੀ 'ਚ ਗੋਲਡ ਮੈਡਲ ਪਾਇਆ।
ਉਨ੍ਹਾਂ 100 ਮੀਟਰ ਬਟਰਫਲਾਈ ਈਵੈਂਟ 'ਚ ਸੋਨ ਤਗਮਾ ਜਿੱਤਿਆ।
ਇਸ ਦੌਰਾਨ ਉਨ੍ਹਾਂ ਇਸੇ ਈਵੈਂਟ 'ਚ ਨਵਾਂ ਕਨੇਡੀਅਨ ਰਿਕਾਰਡ ਵੀ ਸਥਾਪਿਤ ਕਰ ਦਿੱਤਾ।
ਉਨ੍ਹਾਂ 55.59 ਸੈਕਿੰਡਸ ਦੇ ਸਮੇਂ 'ਚ ਈਵੈਂਟ ਪੂਰਾ ਕੀਤਾ।
ਇਸੇ ਈਵੈਂਟ 'ਚ ਸਿਲਵਰ ਮੈਡਲ ਚੀਨ ਅਤੇ ਕਾਂਸੀ ਦਾ ਤਗਮਾ ਆਸਟ੍ਰੇਲੀਆ ਦੇ ਖਾਤੇ 'ਚ ਪਿਆ।
ਇਹ ਪਹਿਲਾ ਮੌਕਾ ਹੈ ਜਦ ਕਿਸੇ ਕਨੇਡੀਅਨ ਤੈਰਾਕ ਨੇ 100 ਮੀਟਰ ਬਟਰਫਲਾਈ ਈਵੈਂਟ 'ਚ ਗੋਲਡ ਮੈਡਲ ਜਿੱਤਿਆ ਹੈ।
ਕੈਨੇਡਾ ਦੀ 14 ਸਾਲਾ ਤੈਰਾਕ ਸਮਰ ਮੈਕਿਨਤੋਸ਼ ਨੇ ਟੋਕਿਓ ਓਲੰਪਿਕਸ ਵਿੱਚ ਆਪਣੇ ਪਹਿਲੇ ਈਵੈਂਟ 'ਚ ਜਬਰਦਸਤ ਪ੍ਰਦਰਸ਼ਨ ਕੀਤਾ ਪਰ ਉਹ ਮੈਡਲ ਜਿੱਤਣ ਤੋਂ ਇੱਕ ਕਦਮ ਦੂਰ ਰਹਿ ਗਈ।
400 ਮੀਟਰ ਫ੍ਰੀਸਟਾਈਲ ਈਵੈਂਟ 'ਚ ਸਮਰ ਮੈਕਿਨਤੋਸ਼ ਨੂੰ ਚੌਥਾ ਸਥਾਨ ਹਾਸਿਲ ਹੋਇਆ।
ਉਨ੍ਹਾਂ 4 ਮਿੰਟ 2.42 ਸੈਕਿੰਡਸ ਵਿੱਚ ਈਵੈਂਟ ਪੂਰਾ ਕੀਤਾ।
ਇਸ ਈਵੈਂਟ 'ਚ ਸੋਨ ਤਗਮਾ ਆਸਟ੍ਰੇਲੀਆ ਦੀ ਐਰੀਆਰਨ ਟਿਟਮਸ ਅਤੇ ਚਾਂਦੀ ਦਾ ਤਗਮਾ ਅਮਰੀਕਾ ਦੀ ਕੈਥਲੀਨ ਲੈਡੇਕੀ ਦੇ ਨਾਮ ਰਿਹਾ।
ਕੈਨੇਡਾ ਦੀ ਤੈਰਾਕ ਕਾਇਲੀ ਮਾਸ ਨੇ 100 ਮੀਟਰ ਬੈਕਸਟ੍ਰੋਕ ਈਵੈਂਟ ਦੇ ਫਾਈਨਲ 'ਚ ਜਗ੍ਹਾ ਬਣਾ ਲਈ ਹੈ।
ਅੱਜ ਰਾਤ ਮਾਸ ਇਸ ਈਵੈਂਟ ਦਾ ਫਾਈਨਲ ਖੇਡਣ ਪਾਣੀ 'ਚ ਉਤਰੇਗੀ।
ਇਸ ਤੋਂ ਪਹਿਲਾਂ ਕੈਨੇਡਾ ਨੂੰ ਔਰਤਾਂ ਦੀ 3 ਮੀਟਰ ਸਿੰਕਰੋਨਾਈਜ਼ਡ ਸਪਰਿੰਗਬੋਰਡ ਡਾਇਵਿੰਗ 'ਚ ਵੀ ਚਾਂਦੀ ਦਾ ਤਗਮਾ ਹਾਸਿਲ ਹੋਇਆ ਹੈ।
