ਵਪਾਰ ਯੁੱਧ ਬਾਰੇ ਰਣਨੀਤੀ ਘੜਨ ਲਈ ਕਾਰਨੀ ਕੈਬਨਿਟ ਦੀ ਬੈਠਕ ਸ਼ੁਰੂ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਅੱਜ ਤੋਂ ਆਪਣੇ ਮੰਤਰੀ ਮੰਡਲ ਨਾਲ ਦੋ ਦਿਨਾਂ ਬੈਠਕ ਟੋਰੌਂਟੋ ਵਿਚ ਸ਼ੁਰੂ ਹੋ ਗਈ ਹੈ। ਇਹ ਉਦੋਂ ਹੈ ਜਦੋਂ ਅਮਰੀਕਾ ਨਾਲ ਅਣਸੁਲਝੀ ਟਰੇਡ ਵਾਰ ਵਿਚਕਾਰ ਹਾਊਸ ਔਫ ਕੌਮਨਜ਼ ਵਿਚ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਦੀ ਵੀ ਵਾਪਸੀ ਹੋ ਰਹੀ ਹੈ। ਕੈਬਨਿਟ ਰੀਟ੍ਰੀਟ ਵਿਚ ਕਾਰਨੀ ਸਰਕਾਰ ਦਾ ਏਜੰਡਾ ਟਰੰਪ ਦੇ ਟੈਰਿਫ ਤੋਂ ਪ੍ਰਭਾਵਿਤ ਇੰਡਸਟਰੀਜ਼ ਦੀ ਮਦਦ ਕਰਨ ਬਾਰੇ ਗੱਲਬਾਤ ਕਰਨਾ ਅਤੇ ਵੱਡੇ ਇਨਫਰਾਸਟਕਚਰ ਪ੍ਰੋਜੈਕਟਸ ਨੂੰ ਤੇਜ਼ੀ ਨਾਲ ਸ਼ੁਰੂ ਕਰਨ,ਡਿਫੈਂਸ 'ਤੇ ਵਧੇਰੇ ਖਰਚ ਕਰਨ ਅਤੇ ਅਪਰਾਧ ਨਾਲ ਲੜਨ ਵਰਗੇ ਪ੍ਰਮੁੱਖ ਮੁੱਦਿਆਂ 'ਤੇ ਚਰਚਾ ਕਰਨਾ ਹੈ।

ਪ੍ਰਧਾਨ ਮੰਤਰੀ ਕਾਰਨੀ ਨੇ ਇਸ ਬੈਠਕ ਨੂੰ ਕੈਬਨਿਟ ਪਲੈਨਿੰਗ ਫੋਰਮ ਨਾਮ ਦਿੱਤਾ ਹੈ,ਜਦੋਂ ਕਿ ਪਿਛਲੀਆਂ ਸਰਕਾਰਾਂ ਇਸ ਨੂੰ ਕੈਬਨਿਟ ਰੀਟ੍ਰੀਟ ਕਹਿੰਦੀਆਂ ਸਨ। ਇਹ ਬੈਠਕ ਹਾਊਸ ਔਫ ਕੌਮਨਜ਼ ਦੀ 15 ਸਤੰਬਰ ਨੂੰ ਵਾਪਸੀ ਤੋਂ ਪਹਿਲਾਂ ਅਤੇ ਕਾਰਨੀ ਦੀ ਨਵੀਂ ਸਰਕਾਰ ਵਲੋਂ ਆਪਣਾ ਪਹਿਲਾ ਫੈਡਰਲ ਬਜਟ ਪੇਸ਼ ਕਰਨ ਤੋਂ ਇੱਕ ਮਹੀਨਾ ਪਹਿਲਾਂ ਹੋ ਰਹੀ ਹੈ। ਲਿਬਰਲਜ਼ ਨੂੰ ਅਮਰੀਕੀ ਟੈਰਿਫ ਅਤੇ ਕ੍ਰਾਈਮ ਵਰਗੇ ਮੁੱਦਿਆਂ 'ਤੇ ਪੌਲੀਐਵ ਦਾ ਤਿੱਖਾ ਸਾਹਮਣਾ ਕਰਨਾ ਪੈ ਸਕਦਾ ਹੈ,ਲਿਬਰਲ ਪਾਰਟੀ ਦੇ ਕੁਝ ਸਾਂਸਦ ਵੀ ਮੰਨਦੇ ਹਨ ਕਿ ਕੰਜ਼ਰਵੇਟਿਵ ਲੀਡਰ ਦੀ ਨਿਰਣਾਇਕ ਸਮਰਥਾ ਨੂੰ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ।