ਪੀ.ਐਮ.ਕਾਰਨੀ ਨੇ ਟਰੰਪ ਦੇ ਨਵੇਂ 50 ਫੀਸਦੀ ਟੈਰਿਫ ਦੀ ਕੀਤੀ ਆਲੋਚਨਾ

ਪੀ.ਐਮ.ਮਾਰਕ ਕਾਰਨੀ ਨੇ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਕੈਨੇਡੀਅਨ ਇੰਪੋਟ 'ਤੇ 50 ਫੀਸਦੀ ਦਾ ਨਵਾਂ ਟੈਰਿਫ ਲਗਾਉਣ ਦੇ ਐਲਾਨ 'ਤੇ ਬਿਆਨ ਜਾਰੀ ਕਰਦਿਆਂ ਇਸ ਦੀ ਆਲੋਚਨਾ ਕੀਤੀ ਹੈ ਅਤੇ ਇਸ ਨੂੰ ਅਮਰੀਕਾ ਦੀਆਂ ਇੱਕਤਰਫਾ ਵਪਾਰਕ ਨੀਤੀਆਂ ਕਰਾਰ ਦਿੱਤਾ ਹੈ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਅਮਰੀਕਾ ਦਾ ਇਹ ਕਦਮ CUSMA ਯਾਨੀ ਕੈਨੇਡਾ-ਯੂਨਾਈਟੇਡ ਸਟੇਟ ਮੈਕਸੀਕੋ ਐਗਰੀਮੈਂਟ ਦੀ ਸਿੱਧੀ ਉਲੰਘਣਾ ਹੈ।

ਕਾਰਨੀ ਨੇ ਕਿਹਾ ਕਿ ਅਮਰੀਕਾ ਵੱਲੋਂ ਕੈਨੇਡੀਅਨ ਆਟੋ ਸੈਕਟਰ 'ਤੇ ਲਗਾਏ ਗਏ ਨਾਜਾਇਜ਼ ਟੈਰਿਫ ਦਾ ਜਵਾਬ ਕੈਨੇਡਾ ਨੇ ਆਪਣੇ ਹੱਕ ਅਨੁਸਾਰ ਬਰਾਬਰ ਦੀਆਂ ਕਾਰਵਾਈਆਂ ਕਰਕੇ ਦਿੱਤਾ ਸੀ। ​ਉਨ੍ਹਾਂ ਟਰੰਪ ਨੂੰ ਮੈਸੇਜ ਦਿੰਦੇ ਕਿਹਾ ਕਿ ਦੇਸ਼ ਦੀ ਆਰਥਿਕਤਾ, ਵਰਕਰਜ਼, ਕਿਸਾਨਾਂ, ਵਪਾਰੀਆਂ, sovereignty ਅਤੇ ਪਰਿਵਾਰਾਂ ਦੀ ਸਪੋਰਟ ਲਈ ਕੈਨੇਡਾ ਦੇ ਸਾਰੇ ਸੂਬੇ ਅਤੇ ਨਾਗਰਿਕ ਇੱਕਜੁੱਟ ਹਨ।

ਕਾਰਨੀ ਨੇ ਕਿਹਾ ਕਿ ਕੈਨੇਡਾ ਨੇ ਵਪਾਰਕ ਵਿਵਾਦ ਨੂੰ ਸੁਲਝਾਉਣ ਅਤੇ CUSMA ਨੂੰ ਆਧੁਨਿਕ ਬਣਾਉਣ ਲਈ ਕਈ ਤਜਵੀਜ਼ਾਂ ਵੀ ਪੇਸ਼ ਕੀਤੀਆਂ ਸਨ ਅਤੇ ਉਹ ਆਉਣ ਵਾਲੇ ਹਫ਼ਤਿਆਂ ਵਿਚ ਗੱਲਬਾਤ ਅੱਗੇ ਵਧਾਉਣ ਲਈ ਵੀ ਤਿਆਰ ਹਨ। ​ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕੈਨੇਡਾ ਨਿਰਪੱਖ ਵਪਾਰ ਵਿਚ ਵਿਸ਼ਵਾਸ ਰੱਖਦਾ ਹੈ। ਗੌਰਤਲਬ ਹੈ ਕਿ ਟਰੰਪ ਵਲੋਂ ਲਗਾਇਆ ਨਵਾਂ ਟੈਰਿਫ ਅਗਲੇ ਇੱਕ ਮਹੀਨੇ ਵਿਚ CUSMA ਤਹਿਤ ਕਵਰ ਕੀਤੇ ਗਏ ਸਮਾਨ 'ਤੇ ਵੀ ਲਾਗੂ ਹੋਵੇਗਾ।