ਅਮਰੀਕੀ ਟੈਰਿਫ ਲਾਗੂ ਹੋਏ ਤਾਂ ਕੈਨੇਡਾ ਜਵਾਬੀ ਕਦਮ ਚੁੱਕਣ ਲਈ ਤਿਆਰ: ਕਾਰਨੀ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਲਗਾਏ ਜਾਣ ਵਾਲੇ ਨਵੇਂ ਟੈਰਿਫ ਦੇ ਮੁੱਦੇ 'ਤੇ ਇਹ ਸਾਫ ਕੀਤਾ ਹੈ ਕਿ ਜੇਕਰ ਅਮਰੀਕਾ ਨਾਲ ਗੱਲਬਾਤ ਰਾਹੀਂ ਕੋਈ ਹੱਲ ਨਹੀਂ ਨਿਕਲਦਾ ਅਤੇ ਇਹ ਟੈਰਿਫਸ ਲਾਗੂ ਹੋ ਜਾਂਦੇ ਹਨ ਤਾਂ ਕੈਨੇਡਾ ਵੀ ਚੁੱਪ ਨਹੀਂ ਬੈਠੇਗਾ ਤੇ ਜਵਾਬੀ ਟੈਰਿਫਸ ਲਗਾਏ ਜਾ ਸਕਦੇ ਹਨ।

ਉਨ੍ਹਾਂ ਸ਼ਾਰਲਟਟਾਊਨ ਵਿਖੇ ਦੇਸ਼ ਦੇ ਪ੍ਰੀਮੀਅਰ ਦੀ ਤਿੰਨ ਰੋਜ਼ਾ ਅਹਿਮ ਮੀਟਿੰਗ ਦੀ ਸਮਾਪਤੀ ਤੋਂ ਬਾਅਦ ਵੀਰਵਾਰ ਸ਼ਾਮ ਨੂੰ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਹਾਲਾਂਕਿ ਕਿਹਾ ਕਿ ਅਮਰੀਕਾ ਦੇ ਨਾਲ ਉਨ੍ਹਾਂ ਦੀ ਸਭ ਤੋਂ ਪਹਿਲੀ ਤਰਜੀਹ ਵਪਾਰਕ ਸਮਝੌਤਾ ਹਾਸਲ ਕਰਨਾ ਹੈ ਪਰ ਕੈਨੇਡਾ ਆਪਣੇ ਹਿੱਤਾਂ ਦੀ ਰਾਖੀ ਲਈ ਹਰ ਕਦਮ ਚੁੱਕਣ ਵਾਸਤੇ ਤਿਆਰ ਹੈ। ਪੀ. ਐੱਮ. ਕਾਰਨੀ ਨੇ ਇਹ ਵੀ ਮੰਨਿਆ ਕਿ ਇਹ ਡੌਨਲਡ ਟਰੰਪ ਦੀ ਇੱਕ ਪੁਰਾਣੀ ਦਬਾਅ ਪਾਉਣ ਵਾਲੀ ਰਣਨੀਤੀ ਹੈ।

ਉਥੇ ਹੀ, ਜਵਾਬੀ ਤਰੀਕਿਆਂ ਨੂੰ ਲੈ ਕੇ ਮਤਭੇਦ ਹੋਣ ਦੇ ਬਾਵਜੂਦ ਸਾਰੇ ਪ੍ਰੀਮੀਅਰ ਨੇ ਸਾਫ ਕੀਤਾ ਹੈ ਕਿ ਇਸ ਵਪਾਰਕ ਜੰਗ ਵਿਚ ਉਹ ਇੱਕਜੁੱਟ ਹਨ ਅਤੇ ਟੀਮ ਕੈਨੇਡਾ ਵਜੋਂ ਕੰਮ ਕਰਨਗੇ। ਇਹ ਸਾਰੀ ਸਥਿਤੀ ਉਦੋਂ ਪੈਦਾ ਹੋਈ ਜਦੋਂ ਵ੍ਹਾਈਟ ਹਾਊਸ ਨੇ ਸੋਮਵਾਰ ਨੂੰ ਨਵੇਂ ਟੈਰਿਫਸ ਦਾ ਐਲਾਨ ਕੀਤਾ। ਅਮਰੀਕਾ ਦਾ ਕਹਿਣਾ ਸੀ ਕਿ ਇਹ ਕਦਮ ਕੈਨੇਡਾ ਵੱਲੋਂ ਅਮਰੀਕੀ ਗੱਡੀਆਂ, ਡੇਅਰੀ ਅਤੇ ਸ਼ਰਾਬ ਦੇ ਵਪਾਰ ਵਿਚ ਕੀਤੇ ਜਾ ਰਹੇ ਕਥਿਤ ਵਿਤਕਰੇ ਦੇ ਜਵਾਬ ਵਿਚ ਚੁੱਕਿਆ ਗਿਆ ਹੈ।